މި އަހަރުގެ މިހާތަނަށް އެންމެ ގިނައިން ހުށަހަޅާފައިވަނީ ކުޑަކުދިންނަށް ޖިންސީ ގޯނާކުރުމުގެ މައްސަލަ: ހދ އެފްސީއެސްސީ

މިއަހަރުގެ އޮކްޓޯބަރ މަހުގެ ނިޔަލަށް ކުޑަކުދިންނަށް ޖިންސީ ގޯނާކުރުމުގެ 13 މައްސަލައަކާއެކު ކުޑަކުދިންނާ ގުޅުންހުރި ޖުމްލަ 41 މައްސަލަ ހުށަހަޅާފައިވާކަމަށް ހދ ފެމިލީ އެންޑް ޗިލްޑްރަން ސާރވިސް ސެންޓަރުން ބުނެފިއެވެ.

ކުޅުދުއްފުށި އޮންލައިން އިން ކުރި ސުވާލަކަށް ޖަވާބު ދެއްވަމުން އެ ސެންޓަރުން ބުނެފައި ވަނީ ކުޑަކުދިންނަށް ޖިންސީ ހާނިއްކައާ ގުޅުންހުރި 13 މައްސަލައަކާއި ޖިސްމާނީ ހާނިއްކަގެ 3 މައްސަލައެއް ހުށަހަޅާފައިވާ ކަމަށެވެ.

މިއަހަރުގެ މިހާތަނަށް ހުށަހެޅުނު މައްސަލަތަކަށް ބަލާއިރު ދެން އެންމެ ގިނައީ ކުޑަކުދިންގެ އަހުލާގީ މައްސަލަތަކާ ގުޅިގެން އެ ސެންޓަރަށް ހުށަހެޅިފައިވާ މައްސަލަތަކެވެ. އަހުލާގީ 11 މައްސަލައެއް ހުށަހަޅާފައިވާއިރު އާއިލީ މައްސަލައިގެ ގޮތުގައި 7 މައްސަލައެއް ހދ އަތޮޅުން ހުށަހަޅާފައިވެ އެވެ.

މީގެ އިތުރުން 18 އަހަރުން މަތީގެ މީހުންގެ ޖުމްލަ 6 މައްސަލައެއް ހުށަހަޅާފައިވާއިރު އޭގެތެރޭގައި ގެވެށި އަނިޔާގެ 3 މައްސަލައެއް ހުށަހަޅާފައި ވެއެވެ.

2011 ވަނަ އަހަރުގެ ޖެނުއަރީ އިން އޮކްޓޯބަރ މަހުގެ ނިޔަލަށް ކުޑަކުދިންނަށް ޖިންސީ ގޯނާ ކުރުމުގެ 14 މައްސަލައެއް ހދ ފެމިލީ އެންޑް ޗިލްޑްރަން ސާރވިސް ސެންޓަރަށް ހުށަހަޅާފައި ވެއެވެ. އޭގެ ކުރީ އަހަރު ކުޑަކުދިންނަށް ޖިންސީ ގޯނާ ކުރުމުގެ ޖުމްލަ 10 މައްސަލަ ހުށަހެޅިފައި ވެއެވެ. މިމައްސަލަތަކުގެ ތެރެއިން ފުލުހުންނަށް ފޮނުވައިގެން ތަހުގީގު ހިންގި މައްސަލަތަކާ ގުޅޭ މައުލޫމާތު ވަނީ ލިބޭގޮތް ނުވެފައި އެވެ.