ދިރާގުން ހިލޭ ގުޅާލެވޭ ވަގުތު އިތުރުކޮށް ޕޯސްޓްޕެއިޑް ދެޕެކޭޖެއްގެ ޚިދުމަތް ފުޅާކޮށްފި

ދިރާގުގެ ނަންބަރުތަކުން ހިލޭ ގުޅާލެވޭ ވަގުތު އިތުރުކޮށް ޕޯސްޓްޕެއިޑް ދެޕެކޭޖެއްގެ ޚިދުމަތް ފުޅާކޮށްފި އެވެ.

ދިރާގުން މިއަދު ބަދަލު ގެނެސްފައި ވަނީ ސިލްވަރ ޕެކޭޖާއި ބްރޯންޒް ޕެކޭޖްގެ ޚިދުމަތަށެވެ. މިގޮތުން 250 ރުފިޔާގެ ސިލްވާ ޕެކޭޖް ގެންގުޅޭ ފަރާތްތަކަށް މިހާރު 390 މިނެޓް ލިބިގެންދާނެއެވެ. އަދި  150 ރުފިޔާގެ މަހުފީ ހިމެނޭ ބްރޯންޒް ޕެކޭޖްގައި ކުރިން ހިމެނުން 160 ހިލޭ މިނެޓްގެ ބަދަލުގައި މިހާރު 190 މިނެޓް ލިބެއެވެ.

މީގެ އިތުރުން ދިރާގުން ވަނީ މިދިޔަ މަހުގެ 1 އިން ފެށިގެން ޕޯސްޓްޕެއިޑްގެ އިތުރު ޕެކޭޖްތަކެއްގެ ޚިދުމަތްވެސް ފުޅާކޮށްފައެވެ. އެގޮތުން ކުރިން 1500 މިނެޓް ލިބޭ ޕްލެޓިނަމް ޕެކޭޖްގެ ވަގުތު ވަނީ 2300 މިނެޓަށް އިތުރުކޮށްފައެވެ. އަދި 1000 މިނެޓް ހިމެނޭ ޑައިމަންޑް ޕެކޭޖްގެ ވަގުތު 1500 މިނެޓަށް ވަނީ އިތުރުކޮށްފައިވާއިރު ކުރިން 660 މިނެޓްގެ މައްޗަށް އެކުލެވޭ ގޯލްޑް ޕެކޭޖްގައި މިހާރު ހިމެނެނީ 1000 މިނެޓެވެ.

ދިރާގުން ވަނީ ދާދިފަހުން ޓަޗްނެޓް ބޭނުން ކުރާ ފަރާތްތަކަށް ޕޯސްޓްޕެއިޑް އަންލިމިޓެޑް ޕެކޭޖެއް ވެސް ތަޢާރަފް ކޮށްފައެވެ.