ލޫމިއާ ސީރީޒްގެ އަގުހެޔޮ ފޯނެއް ނޮކިޔާއިން ނެރެފި

މަޝްހޫރު މޯބައިލް ފޯނު ކޮމްޕެނީ ނޮކިއާ އިން ވަރަށް ފަހުން ތަޢާރަފް ކޮށްފައިވާ ލޫމިއާ ސީރީޒްގެ އަގުހެޔޮ ފޯނެއް އެކުންފުނިން ބާޒާރަށް ނެރެފި އެވެ.

މޯބައިލް ފޯނުގެ ދުނިޔޭގައި މިހާރު ފިޔަޖަހަމުން އަންނަ ނޮކިއާ ލޫމިއާ 920 ސީރީޒް އެކޭ އެއްގޮތަށް ވިންޑޯޒް 8 އަޅާފައިވާ އަދި ލޫމިއާ 920 އާއެއްފަދަ ސިފަތަކެއް ލިބިފައިވާ ލޫމިއާ 620 ނެރެފައި ވަނީ ބައެއް ސްޕެސިފިކޭޝަންތައް ދަށްކުރުމަށް ފަހު، އަގުހެޔޮކޮށް ގަންނަން ބޭނުންވާ ފަރާތްތަކަށެވެ. ލޫމިއާ 620 އެމެރިކާގައި ވިއްކަނީ 249 ޑޮލަރަށެވެ.

މިފޯނުގައި 3.8 އިންޗި ހުންނައިރު ސްކްރީނުގައި 800 ގުނަ 400 ޕިކްސެލް ހުރެއެވެ. ޕްރޮސެސަރ އަކީ ޑުއަލްކޯ ސްނެޕްޑްރެގަން އެސް ފޯ މޮޑެލް 1 ޖީބީ ގެ ޕްރޮސެސަރ އެކެވެ. އަދި 5 މެގަޕިކްސެލް ކެމެރާއަކާއި 512 އެމްބީގެ ރެމް އަދި 8 ޖީބީގެ ސްޓޯރޭޖް ހިމެނެއެވެ. 8 ޖީބީގެ ސްޓޯރޭޖް 64 ޖީބީގެ މައިކްރޯ އެސްޑީ ކާޑަކާއެކު އިތުރު ކުރެވެއެވެ.

މީގެ އިތުރުން ވައިފައި، 3 ޖީ، އަދި ބްލޫޓޫތު 3.0 ހިމެނިފައި ވެއެވެ.

ނޮކިއާ ލޫމިއާ 620 އޭޝިއާގެ މާކެޓަށް އަންނާނީ ޖެނުއަރީ ގައެވެ. އަދި އޭގެ ފަހުން ޔޫރަޕާއި މެދުއިރުމަތީގައި ރިލީޒް ކުރާނެއެވެ.

ނޮކިއާ ލޫމިއާ 620 އާދައިގެ މީހުންނަށް ގަނެވޭނެ އަގަކަށް ނެރުނު އިރު، ލޫމިއާ 920 އަކީ މަތީފަންތީގެ ފޯނެކެވެ. އަދި މެދުފަންތީގެ މީހުންނަށް ލޫމިއާ 820 ވެސް ވަނީ ނޮކިއާ އިން ނެރެފައެވެ.