ވައުދުގެ ދަތުރުގެ ބައިވެރިންނަށް ނައިވާދޫން ފިނި ތަރުހީބެއް ލިބުނު ނަމަވެސް ބާރަށުން ލިބިގެން ދިޔައީ ހޫނު ތަރުހީބެއް

ބޮޑުތިލަދުންމަތީ ވައުދުގެ ދަތުރުގެ ބައިވެރިންނަށް ބާރަށުން ހޫނު ތަރުހީބެއް ކިޔައިފި އެވެ.

މިދިޔަ ނޮވެމްބަރ މަހުގެ 21 އިން މިމަހުގެ 10 އަށް  އެމްޑީޕީން ބޮޑު ތިލަދުންމައްޗަށް ކުރާ މިދަތުރުގައި ބުދަ ދުވަހުގެ މެންދުރު ވަނީ ނައިވާދު އަށް ޒިޔާރަތް ކޮށްފައެވެ. އެހެން ނަމަވެސް އެރަށުން ދަތުރުގެ ބައިވެރިންނަށް މާ އެދެވޭ ތަރުހީބެއް ވަނީ ނުލިބިފައެވެ.

މި ދަތުރުގެ ބައިވެރިން ބުދަ ދުވަހު ބާރަށަށް ގޮސްފައި ވަނީ ހަވީރު 5 ޖަހާ އިރުއެވެ.  އޭރު ރަށުގެ އުތުރު ޖެޓީ ވަނީ އެމްޑީޕީއަށް ސަޕޯޓް ކުރާ ފަރާތްތަކުން ފުރިފައެވެ.

ބާރަށަށް ކުރި ދަތުރުގައި ވަނީ އެމްޑީޕީގެ ޖަގަހައެއް ހުޅުވާފައެވެ. ޖަގަހަ ހުޅުވުމުގެ ރަސްމިއްޔާތުގައި ބާރަށު ކައުންސިލްގެ ރައީސް ވަނީ ވާހަކަ ދައްކަވާފައެވެ. ބޮޑިބަތާއި ފިހުނު މަހުން ބައިވެރިންނަށް ވަނީ ކެއުން ތައްޔާރު ކޮށްފައެވެ.

މީގެ އިތުރުން ބާރަށު މަދަރުސާގައި ވަނީ ދަތުރުގެ ބައިވެރިންނަށް ޖާފަތެއް އަރުވާފައެވެ. އަދި  އެމްޑީޕީގެ ޖަލްސާއެއް ވެސް ވަނީ ބާއްވާފައެވެ. މި ބައްދަލުވުމުގައި މިހާރުގެ ސަރުކާރަށް ފާޑު ކިޔާ ވާހަކަ ދައްކާފައި ވެއެވެ.

މިދަތުރުގެ ބައިވެރިން މިހާރު ވަނީ ކުޅުދުއްފުށި ފިޔަވާ ހދ ގެ ހުރިހާ ރަށަކަށް ޒިޔާރަތް ކޮށްފައެވެ.