އިރުމަތި އަވަށު ޕްރީ ސްކޫލް އޮފީސް ފަޅާލާ 8000 ހެއްހާ ރުފިޔާ ވަގަށް ގެންގޮސްފި

އިރުމަތި އަވަށު ޕްރީ ސްކޫލް އޮފީސް ފަޅާލާ 8000 ހެއްހާ ރުފިޔާ ވަގަށް ގެންގޮސްފި އެވެ.

ކުޅުދުއްފުށީ ގައި ހުންނަ ދެ ޕްރީސްކޫލުގެ ތެރެއިން އެއް ސްކޫލު ކަމުގައިވާ އިރުމަތީ އަވަށު ޕްރީސްކޫލް (އައިޕީއެސް) ފަޅާލާފައި ވަނީ އެސްކޫލުގެ އޮފީހުގެ ކުޑަދޮރެއް ހަލާކު ކޮށްލައިގެންނެވެ. އެތަނުން ގެއްލިފައިވާ ފައިސާއަކީ އޮފީހުގެ ވަތްގަނޑެއްގައި ބަހައްޓާފައި ހުރި ފައިސާއެވެ.

މިކަމާއި ގުޅިގެން އައި.ޕީ.އެސް ގެ ސެކެޓްރީ ހުސައިން އަލީ ބުނީ މިކަން ކުރި ބަޔަކު އޮފީހުގެ ތެރެއަށް ވަނުމަށް ބޮޑު ދޮރުގައި ހިފާފައިވާ ކަމަށާއި އެހެން ނަމަވެސް ވަދެފައި ހުރީ ކުޑަ ދޮރު ހަލާކު ކޮށްލައިގެން ކަމަށެވެ. އަދި އެއް މޭޒުގެ ވަތް ގަނޑާއި، ކުޑަދޮރުގައި ޖަހާފައިހުރި ދާގަނޑާއި އެދޮރުވެސް ވަނީ ބޭނުން ނުކުރެވޭ ވަރަށް ހަލާކުވެފައިވާކަމަށް މައުލޫމާތު ދިނެވެ.

“ހަ މޭޒު މި އިންނަނީ. އޭގެ ތެރެއިން އެއް މޭޒުގެ ވަތްގަނޑު މިވަނީ ވަރަށް ބޮޑަށް ހަލާކު ވެފަ. ދޮރުގަ ޖަހާފަ އިން ދާގަނޑުވެސް ވަނީ ވަރަށް ބޮޑަށް ބަނޑިވެފަ.” ހުސައިން ބުންޏެވެ.

ބަލާބެލުމަށް ކޮމްޕިއުޓަރު އަދި އެނޫން ވެސް އިތުރު އެއްޗަކަށް ގެންލުންދީފައިވާ ކަން އަދި ފާހަގަ ނުކުރެވޭ ކަމަށާއި އަދިވެސް ބަލަމުން ކަމަށް ހުސައިން އިތުރަށް ފާހަގަ ކުރިއެވެ.

ފުލުހުންގެ މީޑިއާ އޮފިޝަލް ހަސަން ހަނީފް މިނޫހަށް މައުލޫމާތު ދެއްވަމުން ވިދާޅުވީ މިކަމުގެ ރިޕޯޓް ކޮށްފައިވަނީ ހެނދުނު 7:10 ގައި ކަމަށެވެ. އޭނާ ވިދާޅުވީ ފައިސާތައް ވަގަށް ނަގާފައިވަނީ ކުޑަދޮރެއް ހަލާކު ކޮށްލައިގެން އޮފީހުގެ ތެރެއަށް ވަދެ އެތަނުގައި ހުރި މޭޒެއްގެ ވަތްގަނޑު ހަލާކު ކޮށްލައިގެން ނެވެ.

ޕޮލިހުންގެ މީޑިޔާ އޮފިޝަލު ވިދާޅުވީ މިކަމާއި ގުޅިގެން އަދި އެއްވެސް ފަރާތެއް ހައްޔަރު ކޮށްފައި ނުވާ ކަމަށާއި މައްސަލަ ތަހުގީގު ކުރުމަށް ސްކޫލް އޮފީހުގައި ފޮރެންސިކް ޓީމް ހަރަކާތް ތެރި ވަމުންދާކަމަށެވެ.