ސްކޭން މެޝިން ހަލާކުވިތާ ދެމަސް ފަހުން ދިއްދޫ ހޮސްޕިޓަލަށް އާ ސްކޭން މެޝިނެއް ގެނެސްފި

ހއ. އަތޮޅު ހޮސްޕިޓަލުގައި ހުންނަ ސްކޭން މެޝިން ހަލާކުވެފައި ހުންނަތާ ދެމަސް ދުވަސް ވީފަހުން އެ ހޮސްޕިޓަލަށް އާ ސްކޭން މެޝިނެއް ގެނެސްފި އެވެ.

ކުރިން އެ ހޮސްޕިޓަލްގައި ހުންނަ މެޝިން ހަލާކުވެގެން އާމެޝިނެއް ހޯދުމަށް މީގެ ދެމަސްކުރިން ވަނީ އެދިފައެވެ.

މިނޫހަށް މައުލޫމާތު ދެއްވަމުން އެ ހޮސްޕިޓަލް ހިންގުމާއި ހަވާލުވެ ހުންނެވި، އެޑްމިނިސްޓްރޭޓިވް އޮފިސަރ މުހައްމަދު ރަޝީދު ވިދާޅުވީ، މިދިޔަ ބުރާސްފަތި ދުވަހު އައު މެޝިނެއް ގެނެސް އެމެޝިނުގެ ބޭނުން މިހާރު ކުރަމުންދާކަމަށެވެ. އެ ހޮސްޕިޓަލްގައި މަހެއްގެ މައްޗަށް 30 ނުވަތަ 40 ސްކޭން ހައްދަންޖެހޭ ކަމަށް މުޙައްމަދު ރަޝީދު ވިދާޅުވިއެވެ.

ހޮސްޕިޓަލްއަށް ދިމާވާ ބައެއް ދަތިތައް ހާމަކުރަމުން މުޙައްމަދު ރަޝީދު އިތުރަށް ވިދާޅުވީ، ކޮންޓްރޯލް ޑްރަގްސް ލިބުމުގައި އަދިވެސް ވަރަށް ދަތިވާކަމަށާއި، ލިބޭ ބައެއް ބޭސް ވެސް ލިބޭއިރު މުއްދަތު ކުރުވެފައި ހުރުމުން ބޭނުން ނުކުރެވި ދާކަމަށެވެ.

ހއ ދިއްދޫން މައުލޫމާތު ދިން މީހަކު ބުނީ ދިއްދު ހޮސްޕިޓަލުން ކުރިން ލިބެމުންދިޔަ ބައެއް ޚިދުމަތްތައް ލިބުމުގައި ދަތިތަކެއް މިހާރު ކުރިމަތި ވާކަމަށާއި އަދި އާސަންދަ އިން ބޭސްލިބޭނޭ ގޮތެއް ދިއްދޫގައި ލިބެން ނެތުމުން ރައްޔިތުންނަށް ތަފާތު ދަތިތަކާއި ކުރިމަތި ވަމުން ދާ ކަމަށެވެ.

3958 މީހުން ގެ އާބާދީއެއް އޮންނަ ދިއްދޫ އަކީ ހއ ގެ ވެރިކަން ކުރާ ރަށެވެ. އެއަތޮޅުގެ ގިނަ ބަޔަކު އަތޮޅު ހޮސްޕިޓަލުގެ ބޭނުން ކުރަމުން ދެއެވެ. އަތޮޅު ހޮސްޕިޓަލުގައި މިވަގުތު ހުރިހާ ޑޮކްޓަރުން ހަމައެވެ.