ކުކުޅާއި ބަކަރި ގެންގުޅެން ދަސްކޮށްދޭ ޕްރޮގްރާމެއް ހަނިމާދޫގައި ހިންގައިފި

ކުކުޅާއި ބަކަރި ގެންގުޅެން ދަސްކޮށްދޭ ޕްރޮގްރާމެއް ހަނިމާދޫގައި ހިންގައިފި އެވެ.

“އެނިމަލް ހަޒްބެންޑަރީ ޓްރެއިނިންގ ޕްރޮގްރާމް 2012 ” ގެ ނަމުގައި މިދިޔަ ނޮވެމްބަރ މަހުގެ 18 އިން އިއްޔެގެ ނިޔަލަށް ހަނިމާދޫ އެގްރިކަލްޗަރ ސެންޓަރުގައި ކުރިއަށް ދިޔަ މި ޕްރޮގްރާމަކީ ދިރޭ ޖަނަވާރު ގެންގުޅޭނެ ގޮތާ ބެހޭ ގޮތުން މައުލޫމާތު ދިނުމަށް ހިންގުނު ޕްރޮގެރާމެކެވެ.  މިގޮތުން މި ޕްރޮގްރާމުގައި ބޮޑަށް ކިޔަވައިދީފައި ވަނީ ބަކައްޓާއި ކުކުޅު މެނޭޖްކުރާނެ ގޮތްތައްކަމަށް މިނިސްޓްރީ އޮފް ފިޝަރީސް އެންޑް އެގްރިކަލްޗަރގެ އެގްރިކަލްޗަރ އޮފިސަރ ހަސަން ޝައުބީ ވިދާޅުވިއެވެ.

“މި ޕްރޮގްރާމަކީ ޓީ.އޯ.ޓީގެ (ތަމްރީނު ދޭމީހުން ތަމްރީނު ކުރުމުގެ) ދަށުން ހިންގުނު މިފަދަ ފުރަތަމަ ޕްރޮގްރާމް. ޖަނަވާރުން ގެންގުޅޭނެ ގޮތް ތައް މި ދަސްކޮށްދެނީ. އެކަމަކު އަޅުގަނޑުމެން ރާއްޖޭގަ ވީމަ ހަމައެކަނި ކުކުޅާއި ބަކަރި ކަހަލަ އެއްޗެއްސަށް މިބެލީ.” ޝައުބީ ވިދާޅުވި އެވެ.

މި ޕްރޮގްރާމުގައި ޖަނަވާރުތަކަށް ކާންދޭނެ ގޮތްތަކާއި، ދިމާވާ މައްސަލަތަކާއި، ޖަނަވާރުންނަށް ޖެހޭ ބަލިތަކާއި، އޭގެ ފަރުވާއާއި ބެހޭގޮތުން ވަނީ ބައިވެރިންނަށް މައުލޫމާތު ދީފައެވެ.

އެގްރިކަލްޗަރ ސެންޓަރުގެ މުއައްޒަފުންނާއެކު ޖުމުލަ 17 ބައިވެރިން ވަނީ މި ތަމްރީނު ޕްރޮގްރާމު ފުރިހަމަ ކޮށްފައެވެ.