ކުރީގެ ރައީސް ނަޝީދު ކުޅުދުއްފުއްޓަށް ވަޑައިގަތުމުން ހޫނު މަރުހަބާއެއް ކިޔައިފި

ކުރީގެ ރައީސް ނަޝީދާއި އެމްޑީޕީގެ ވައުދުގެ ދަތުރުގެ ބައިވެރިން މިއަދު ހަވީރު ކުޅުދުއްފުއްޓަށް ވަޑައިގަތުމުން ވަރަށް ހޫނު މަރުހަބާއެއް ކިޔައިފި އެވެ.

ބޮޑުތިލަދުންމަތީ ވައުދުގެ ދަތުރުގެ ފަހު މަންޒިލެއްގެ ގޮތުން ރައީސް ނަޝީދު ކުޅުދުއްފުއްޓަށް ވަޑައިގަތީ މިއަދު އިރުއޮއްސި 6 ޖެހިއިރުއެވެ. ކުޅުދުއްފުށިން މަރުހަބާ ދެންނެވީ ރައްޔިތުންގެ މަޖިލީހުގެ ކުޅުދުއްފުށީ އުތުރު ދާއިރާގެ މެމްބަރު އަބްދުލް ގަފޫރު މޫސާ އާއި ކައުންސިލްގެ މެމްބަރުންނެވެ. އަދި އެމްޑީޕީ އާއި ނަޝީދަށް ތާއީދު ކުރާ ގިނަ ބަޔަކު ވެސް ވަނީ ރައީސް ނަޝީދަށް މަރުހަބާ ކިޔުމަށް އުތުރު ބަނދަރަށް އެއްވެފައެވެ.

އެމްޑީޕީގެ ޗެއަރޕަރސަން ރީކޯ މޫސާ މަނިކާއި، ކުރީގެ ޗެއަރ ޕާރސަން މާރިޔާ އަހުމަދު ދީދީ އަދި ރައްޔިތުންގެ މަޖިލީހުގެ އެމްޑީޕީއަށް ނިސްބަތްވާ ބައެއް މެމްބަރުން ބައިވެރިވި މި ވައުދުގެ ދަތުރުގެ ބައިވެރިން ކުޅުދުއްފުއްޓަށް އައުމުން ބޮޑުބެރުގެ ޚަރަކާތްތައްވެސް އެވަގުތު ދަތުރު ހިޔާގައި ކުރިއަށް ދިޔައެވެ.

މިރޭ އަމީރު އަމީން ސްކޫލާ ދިމާ ބަންޑާރަ މައިދާނުގައި 5 ގުރޫޕެއްގެ ބޮޑުބެރު ޚަރަކާތް ތަކެއްވެސް ކުރިއަށްދާނެއެވެ. އެއީ ކުރިނބީގެ ގުރޫޕަކާއި، ބާރަށުގެ ގުރޫޕަކާއި، މިލަންދޫގެ ގުރޫޕެއްގެ އިތުރުން ކުޅުދުއްފުށީގެ 2 ގުރޫޕެކެވެ.

މާދަމާ ޑޯޓުޑޯ ކެމްޕޭން ކުރުމަށް ހަމަޖެހިފައިވާއިރު މި ދަތުރުގެ ބޮޑުޖަލްސާ މާދަމާ ރޭ ބަންޑާރަމައިދާނުގައި އޮންނާނެއެވެ. އެމްޑީޕީއިން ބުނިގޮތުގައި މާދަމާ ރޭގެ ޖަލްސާއަކީ ވަރަށް ތަފާތު އަދި އާ ކަންތައްތަކެއް ހާމަކުރާނެ ޖަލްސާއެކެވެ.