އެމްޑީޕީން ކުޅުދުއްފުށީ ދަތުރުހިޔާގައި ދަމާފައިވާ ދިދަ ފޮތިތައް ނެގުމަށް އަތޮޅު ކައުންސިލުން އަންގައިފި

ބޮޑުތިލަދުންމަތީ ވައުދުގެ ދަތުރުގެ ނަމުގައި އެމްޑީޕީން މިހާރު ކުރިއަށްގެންދާ ހަރަކާތުގައި، މިއަދު ކުޅުދުއްފުށީގައި ހުންނަ ދަތުރުހިޔާގައި އެޕާޓީގެ ފަރާތުން ދަމާފައިވާ ދިދަ ފޮތިތައް ނެގުމަށް އަތޮޅު ކައުންސިލުން އަންގައިފިއެވެ.

ކުޅުދުއްފުށީގައި ހުންނަ ދަތުރުހިޔާއަކީ ހދ އަތޮޅު ކައުންސިލުން ހަދާފައިހުރި އިމާރާތެކެވެ. އެތަނަކީ، ދަތުރުވެރިން ބޭނުންކުރުމަށް ދާދި ފަހުން ހަދާފައިހުރި ތަނެކެވެ.

މިކަމާއި ގުޅިގެން އަތޮޅު ކައުންސިލްގެ ރައީސް ހުސައިން ރަޝީދު “ކުޅުދުއްފުށި އޮންލައިން” އަށް ވިދާޅުވީ ކުޅުދުއްފުށީގައި އެ ކައުންސިލުން ހަދާފައިވާ ދަތުރުހިޔާ އަކީ ރައްޔިތުންގެ ފައިދާ އަށް ހަދާފައިވާ ތަނެއް ކަމަށާއި އެތަނާއި މެދު ކަން ކުރާނެ ވަކި ގޮތެއް އަދި ޤަވާއިދެއްވެސް ހަމަޖައްސާފައި ނުވާ ކަމަށެވެ. އަދި އެމްޑީޕީގެ މި އަމަލު އަތޮޅު ކައުންސިލްގެ އެހެން މެމްބަރުންނަށް މައްސަލަ އަކަށް ވާނަމަ އެކަން ބަލާނެ ކަމަށެވެ. ހުސައިން ރަޝީދު ވިދާޅުވީ އެމްޑީޕީއިން ދަތުރުހިޔާގައި އެޕާޓީގެ ދިދަ ދަމާހެދީ އަތޮޅު ކައުންސިލްގެ މެމްބަރެއްގެ ހުއްދައާއެކު ކަން އެނގިފައިވާ ކަމަށެވެ.

“މި ދަތުރު ހިޔާ އަކީ އެންމެންގެ ފަސޭހަޔަކަށް ހެދިފަ ހުންނަ ތަނެއް. އަޅުގަނޑަށް އެނގިފަ އޮތީ މެމްބަރެއްގެ ހުއްދަ ހޯދި ކަމަށް. މީ މައްސަލަ އެއް ކަމަށް އަޅުގަނޑު ނުދެކެން.” ހުސައިން ރަޝީދު ވިދާޅުވި އެވެ.

މިކަމާއި ގުޅިގެން އަތޮޅު ކައުންސިލްގެ ނައިބްރައީސް ޒަކަރިއްޔާ ހަސަން ވިދާޅުވީ އެއް މެމްބަރެއްގެ ހުއްދަ މިކަހަލަ ކަންކަމުގައި ނުހިނގާނެ ކަމަށާއި މިކަމުގައި އެމްޑީޕީން ހުއްދަ ނަގާފައި ނުވާކަމަށާއި ދިދަތަށް ނެގުމަށް މިހާރު އަންގާފައިވާ ކަމަށެވެ.

“އާއްމު ދަތުރުވެރިން ވާރެއާއި ހިޔާވެލާ ތިބެލުމަށް މިތަން ބޭނުން ކުރެވިދާނެ. އެކަމަކު އެއްވެސް ޕާޓީ ގެ ހަރަކާތަކަށް މިތަން ދޫކުރާކަށް ނޫން އަޅުގަނޑުމެން ހަމަޖައްސާފަ މިއޮތީއެއް. ދިދަތައް ނަގަން އެންގީ އެހެންވެ. އެމްޑީޕީން އެބަބުނޭ ނަގާނެ ކަމަށް.” ޒަކަރިއްޔާ ވިދާޅުވިއެވެ.

އެމްޑީޕީގެ މި ހަރަކާތާއި ގުޅޭގޮތުން އެމްޑީޕީ ދެކުނު ދާއިރާގެ ނައިބް ރައީސް އަލީ މުހައްމަދު ވިދާޅުވީ އެ ދަތުރު ހިޔާ އަކީ ވަކި ބަޔަކު ބޭނުން ކުރުމަށް ހަދާފައިވާ ތަނެއް ނޫން ކަމަށާއި އެންމެންނަށްވެސް އެތަނުގެ ބޭނުން ހިފެން ޖެހޭނެ ކަމަށެވެ. އަދި އަތޮޅު ކައުންސިލުން އެންގެވި ގޮތަށް ދިތަތައް ނަގާނެ ކަމަށްވެސް ވިދާޅުވިއެވެ. އެހެންނަމަވެސް އެ ދިދަ ތައް ނަގާނެ ވަކި އިރެއް ވިދާޅެއް ނުވެއެވެ. އަދި ކުރީގެ ރައީސް ވަޑައިގަތުމުގެ ކުރިން އެތަކެތި ނަންގަވާނަންތޯ ތަރުރާރުކޮށް ސުވާލުކުރުމުންވެސް ވަނީ ޖަވާބެއް ނުދެއްވާފައެވެ.

ހދ އަތޮޅު ކައުންސލްގެ ބެލުމުގެ ދަށުގައިވާ މި ދަތުރު ހިޔާ އަދި ވަނީ ރަށު ކައުންސިލާ ހަވާލު ނުކޮށެވެ.