އެމްޑީޕީން ކުޅުދުއްފުށީގައި ބޭއްވި ބޮޑު ޖަލްސާގައި ކުޅުދުއްފުށީގެ އެއްވެސް މެމްބަރަކަށް ވާހަކަ ދައްކާނެ ފުރުޞަތެއް ނުދިން

– ކުޅުދުއްފުށީގައި ބާއްވާ ޖަލްސާއެއްގެ އެޖެންޑާއެއް ރައީސް ނަޝީދަކަށް ނުހެއްދެވޭނެ: ކައުންސިލުގެ ރައީސް ރަމީޒް

އެމްޑީޕީން ބޮޑުތިލަދުންމަތީ ވައުދުގެ ދަތުރުގެ ނަމުގައި ކުރިއަށް ގެންދިޔަ ހަރަކާތްތައް ނިންމުމަށް ރޭ ކުޅުދުއްފުށީގައި ބޭއްވި ހާއްސަ ޖަލްސާގައި ކުޅުދުއްފުށީގެ އެމްޑީޕީގެ އެއްވެސް މެމްބަރަކަށް ވާހަކަ ދައްކާނެ ފުރުޞަތެއް ނުދީ ޖަލްސާ ނިންމާލައިފި އެވެ.

މިކަމާއި ގުޅިގެން ކުޅުދުއްފުށީ ކައުންސިލްގެ ރައީސް އިބްރާހިމް ރަމީޒް ވިދާޅުވީ، މިއީ ކުޅުދުއްފުށީގެ އެއްވެސް ރައްޔިތަކު ޤަބޫލު ކުރާނެ ކަމެއް ނޫން ކަމަށާއި އެކަމާމެދު ހިތާމަ ކުރައްވާ ކަމަށެވެ.

” ކުޅުދުއްފުށީ ރައްޔިތެއްގެ ހައިސިއްޔަތުން އަދި ކުޅުދުއްފުށީ ރައްޔިތުން އިންތިޚާބުކޮށްފަ ހުރި މީހެއްގެ ހައިސިއްޔަތުން އަޅުގަނޑު ބުނާނީ ކޮންމެ މީހަކަށް ވެސް ޚިޔާލު ފާޅުކުރުމުގެ މިނިވަންކަން އޮންނަން ޖެހޭނޭ. މިޖަލްސާގަ ބޮޑަށް ފެނިގެން މިދިޔައީ މަތިއުތުރާއި ގުޅުން ނެތް ރައްޔިތުންގެ މަޖިލީހުގެ މެމްބަރުން ވާހަކަފުޅު ދެއްކެވިތަން.” ހިތްޕުޅު ހަމަޖެހިވަޑައިނުގެން ހުރެ ރަމީޒް ވިދާޅުވި އެވެ.

ރަމީޒު ވިދާޅުވީ ކުޅުދުއްފުށީ އެމްޑީޕީ “ސްޓިއަރިންގ” ކޮމިޓީން ކުރިން ނިންމާފައިވަނީ އެޖަލްސާގައި އެމްޑީޕީގެ 4 މެމްބަރަކު ވާހަކަ ދެއްކުމަށެވެ. އެއީ އަންހެނުންގެ ކޮމިޓީގެ މެމްބަރަކާއި އަތޮޅު ކައުންސިލްގެ މެމްބަރަކާއި ރަށު ކައުންސިލް މެމްބަރެއްގެ އިތުރުން އެމްޑީޕީ ކުޅުދުއްފުށީ ގޮފީގެ މެމްބަރެއް ކަމަށެވެ. އަދި އެޖެންޑާ ހައްދަވާފައިވަނީ ރައީސް ނަޝީދު ކަމަށާއި ނަޝީދަށް ކުޅުދުއްފުށީގެ އެޖެންޑާ ނުހެއްދެވޭނެ ކަމަށްވެސް ރަމީޒު ވިދާޅުވިއެވެ.

މިކަމާ ގުޅިގެން އެމްޑީޕީ ދެކުނު ދާއިރާގެ ނައިބު ރައީސް އަލީ މުހައްމަދު ވިދާޅުވީ ރޭގެ ޖަލްސާގެ އެޖެންޑާގައި ވާހަކަ ދެއްކެވި ބޭފުޅުންނަކީ ބޮޑުތިލަދުންމައްޗާއި ގުޅުމެއް ނެތް ބޭފުޅުން ކަމަށާއި މިއީ ޤަބޫލުކުރަން ދަތި ކަމެއް ކަމަށެވެ. އަދި މިއީ އެއްގޮތަކަށް ވެސް ޤަބޫލުކުރެވޭނެ ކަމެއްނޫން ކަމަށް އަލީ ވިދާޅުވި އެވެ.

މިޖަލްސާގައި އެމްސީ (ޖަލްސާ ހުށަހަޅާދޭ މީހާ) ގެ ގޮތުން ކައުންސިލް މެމްބަރު ޖަމްޝީދު މުހައްމަދު އުޅުއްވިއިރު ދާއިރާއަށް ނިސްބަތްވާ ފަރާތެއްގެ ގޮތުން ވާހަކަ ދައްކަވާފައި ވަނީ ހަމައެކަނި ރައްޔިތުންގެ މަޖިލީހުގެ ކުޅުދުއްފުށީ އުތުރު ދާއިރާގެ މެމްބަރު އަބްދުލް ޤަފޫރެވެ. އެހެން ނަމަވެސް އެމްޑީޕީ ބޮޑު ތިލަދުންމަތީ ދަތުރު ފެށުމުގެ ގޮތުން ށ. މިލަންދޫ ގައި ބޭއްވި ޖަލްސާގައާއި، ހއ.ދިއްދޫގައި ބޭއްވި ޖަލްސާގައި އެއަތޮޅު އަތޮޅު ކައުންސިލްގެ މެމްބަރުން ވަނީ ވާހަކަ ދައްކާފައެވެ. ވައުދުގެ  ދަތުރުގެ ޖަލްސާ ބޭއްވި ކުޅުދުއްފުށި ފިޔަވާ ކޮންމެ ރަށެއްގައި ވެސް ރަށު ކައުންސިލްގެ މެމްބަރަކާއި ދާއިރާގެ މެމްބަރުން ވަނީ ވާހަކަ ދައްކާފައެވެ.

މިނޫހަށް އެނގިފައިވާ ގޮތުގައި ރޭގެ ޖަލްސާގައި ވާހަކަ ދެއްކުމަށް  ބައެއް މެމްބަރުން ވަނީ ސްޕީޗް ވެސް ތައްޔާރު ކޮށްފައެވެ.