ފެބްރުއަރީ 8 ގައި ކުޅުދުއްފުށީ ޕޮލިސް ސްޓޭޝަނަށް ގެންލުންދިން މައްސަލައިގެ ޝަރީއަތުގެ އަޑުއެހުމެއް ބާއްވައިފި

ފެބްރުއަރީ 8 ވަނަ ދުވަހު ކުޅުދުއްފުށީ ޕޮލިސް ސްޓޭޝަނަށް ގެންލުންދިން މައްސަލައިގެ ޝަރީއަތުގެ އަޑުއެހުމެއް މިއަދު ބާއްވައިފި އެވެ.

ފެބްރުއަރީ 7 ވަނަ ދުވަހު ވެރިކަން ބަދަލުވުމާއިގުޅިގެން ރާއްޖޭގެ އެކި ކަންކޮޅުތަކުގައި ހިންގި ހަމަނުޖެހުންތަކުގައި އެދުވަހު ކުޅުދުއްފުށީ ޕޮލިސް ސްޓޭޝަންއަށް ހަމަލާދިން މީހުންގެ ތެރެއިން މިއަދު ބާއްވަން އޮތީ 11 މީހެއްގެ ދައުވާއެވެ. އެކަމަކު ބޭއްވިފައިވަނީ 4 މީހެއްގެ ބައެވެ. އޭގެ ތެރޭގައި ކުޅުދުއްފުށީ ކައުންސިލުގެ ނައިބު ރައީސް ފާރޫގު މުހައްމަދާއި ކައުންސިލް މެމްބަރ ޝުކޫރު  ހިމެނެއެވެ.

މިއަދުގެ އަޑުއެހުމުގައި ދައުވާ ލިބޭ 4 މީހުންވެސް ވަނީ ދައުވާއަށް އިންކާރުކޮށްފައި އެވެ. އެހެންނަމަވެސް އެ ދުވަހުގެ މުޒާހަރާގައި ބައިވެރިވިކަމަށް ވަނީ އެއްބަސްވެފައި އެވެ.

މިއަދު ހެނދުނު 10 ޖެހިއިރު ކުޅުދުއްފުށީ މެޖިސްޓްރޭޓް ކޯޓުގައި ވަކިވަކިން ކުރިއަށްދިޔަ މި އަޑު އެހުން ތަކަށް މިއަދަށް ޗިޓް ފޮނުވާފައިވާ އެންމެން ވެސް ހާޒިރުވެފައިވެއެވެ.

8 ފެބްރުއަރީގައި އެމްޑީޕީގެ ސަޕޯޓަރުން ނުކުމެ ކުޅުދުއްފުށީ ޕޮލިސް ސްޓޭޝަންގެ ގޭޓު ހަލާކު ކޮށްލާފައި ވެއެވެ. އަދި ގާއުކުމުގެ ސަބަބުން އެ އިމާރާތަށް އެކިވަރުގެ ގެއްލުން ލިބިފައިވާއިރު، ބައެއް ފުލުހުންނަށް އަނިޔާވެފައިވެ އެވެ.

ޕޮލިސް ސްޓޭޝަން ކުރިމައްޗަށް ނުކުތް އެމްޑީޕީގެ މީހުންގެ ތެރޭގައި ކުޅުދުއްފުށީ ކައުންސިލާއި ހދ. އަތޮޅު ކައުންސިލްއަށް ނިސްބަތްވާ މެމްބަރުންވެސް ފެނިފައިވެއެވެ. އަދި ރަށު ކައުންސިލްގެ ބެލުމުގެ ދަށުގައި އޮންނަ، (މަދިރި މަރަން ރަށުތެރެއަށް ދުންޖަހާ) ފޮގް މެޝިންވެސް އެތަނުގައި ގެންގުޅުނު މަންޒަރުވެސް ފެނިފައިވެއެވެ.

އެ ދުވަހުގެ ހަމަނުޖެހުމާއި ގުޅިގެން ރާއްޖޭގެ އެކި ކަންކޮޅުތަކުގައި ޖުމްލަ 409 މީހެއްގެ މައްޗަށް ޓެރަރިޒަމްގެ ދައުވާ ދައުލަތުން އުފުލާފައިވާ އިރު 6 އަދި 7 ފެބްރުއަރީގައި މާލޭގައި ކުރިއަށްދިޔަ ހަމަނުޖެހުން ތަކުގައި ސަރުކާރުގެ މުއައްސަސާ ތަކާއި ސަލާމަތީ ބާރުތަކުގެ އިމާރާތް ތަކަށް ގެންލުންދިން މީހުންގެ މައްޗަށް ދައުވާ އުފުލާފައެއް ނުވެއެވެ.