ކުޅުދުއްފުށީ ޕޮލިސް ސްޓޭޝަނަށް ގެއްލުންދިން މައްސަލައިގައި އިތުރު 5 މީހެއްގެ ޝަރީއަތުގެ އަޑުއެހުން މިއަދު ބާއްވައިފި

ފެބްރުއަރީ 8 ވަނަ ދުވަހު ކުޅުދުއްފުށީ ޕޮލިސް ސްޓޭޝަނަށް ގެންލުންދިން މައްސަލައިގައި ދައުވާލިބޭ މީހުންގެ ތެރެއިން އިތުރު 5 މީހެއްގެ ޝަރީއަތުގެ އަޑުއެހުމެއް މިއަދު ބާއްވައިފި އެވެ.

ފެބްރުއަރީ 7 ވަނަ ދުވަހު ވެރިކަން ބަދަލުވުމާއިގުޅިގެން ރާއްޖޭގެ އެކި ކަންކޮޅުތަކުގައި ހިންގި ހަމަނުޖެހުންތަކުގައި އެދުވަހު ކުޅުދުއްފުށީ ޕޮލިސް ސްޓޭޝަނަށް ހަމަލާދިން މީހުންގެ ތެރެއިން މިއަދު 10 މީހެއްގެ އަޑުއެހުމެއް ބާއްވަން އޮތްނަމަވެސް އޭގެ ތެރެއިން އެއްބަޔަކު ރަށުގައި ނެތުމުގެ ސަބަބުން މިއަދު ބޭއްވިފައިވަނީ 5 މީހެއްގެ ބައެވެ.

މީގެ ތެރެއިން ކުޅުދުއްފުށި ލޯންލީހާޓް މުއާޒް އަބޫބަކުރުގެ މައްޗަށް އުފުލާފައިވަނީ ފުލުހުންގެ ދައުރު އަދާކުރަން ހުރި މީހަކަށް ހަމަލާދިން ކަމުގެ ދައުވާއެވެ. އެހެން މީހުންގެ މައްޗަށް ކޮށްފައިވަނީ ފުލުހުންގެ ދައުރު އަދާކުރަން ދަތި ކުރި ކަމުގެ ދައުވާ އެވެ. އެމީހުންނަކީ، އަބްދުﷲ ޒުބެއިރު، ހީވާޒް، ހަސަން ނާޡިމް، ބަހާއު، މުހައްމަދު އިބްރާހިމް ސަހާމާ، ހުސައިން އާދަމް ވައްތީނިގެ، އަހުމަދު މުހައްމަދު ރިސްތާ، އަހުމަދު ހަސަން ސުހާނީ، ސަމްއޫން އިބްރާހިމް އަޅިވިލާގެ، ހަސަން އަލީ ކަސްތޫރިގެ، އަހުމަދު އާދަމް ކަރަންކާގެ، އަދި  ސްޓަރލިންގ ،މުހައްމަދު އިބްރާހިމް އެވެ.

މިއަދުގެ އަޑުއެހުމުގައި ދައުލަތުގެ ފަރާތުން ހުށަހެޅި ހެއްކެއްގެ ހެކިބަސް ނަގާފައިވެއެވެ. އޭނާ ހެކިބަސް ދީފައިވަނީ މި ފަސް މީހުންނާ ދެކޮޅަށެވެ. ދައުވާއަށް ފަސް މީހުންވެސް ވަނީ އިންކާރުކޮށްފައި އެވެ.

އެ ދުވަހުގެ ހަމަނުޖެހުމާއި ގުޅިގެން ރާއްޖޭގެ އެކި ކަންކޮޅުތަކުގައި ޖުމްލަ 409 މީހެއްގެ މައްޗަށް ޓެރަރިޒަމްގެ ދައުވާ ދައުލަތުން އުފުލާފައިވެއެވެ. ކުޅުދުއްފުށިން އެކަނިވެސް 40 އަށްވުރެ ގިނަ މީހުންގެ މައްޗަށް ދައުވާ އުފުލާފައި ވެއެވެ.

ކުޅުދުއްފުށީ ޕޮލިސް ސްޓޭޝަނަށް ގެއްލުންދިން މައްސަލައިގެެ އިތުރު އަޑުއެހުމެއް ދެން އޮންނާނީ މިމަހުގެ 20 ވަނަ ދުވަހުއެވެ.