އުތުރުގެ ތިން އަތޮޅުގެ ސްކޫލުތަކުގެ ބަޖެޓްގައި މަސައްކަތް ކުރާ ފަރާތްތަކަށް ވޯކްޝޮޕެއް ބާއްވައިފި

އުތުރުގެ ތިން އަތޮޅު ކަމުގައިވާ ހއ، ހދ، އަދި ށ އަތޮޅު ގެ ސްކޫލުތަކުގެ ބަޖެޓް ސެކްޝަނުގައި މަސައްކަތް ކުރާ ފަރާތްތަކަށް އަމާޒުކޮށްގެން ވޯކްޝޮޕެއް ބާއްވައިފި އެވެ.

މިމަހު ގެ 8 އިން 13 ގެ ނިޔަލަށް ހަނިމާދޫ އިޖްތިމާއީ މަރުކަޒުގައި ކުރިއަށްދިޔަ މި ވޯކްޝޮޕަކީ މި 3 އަތޮޅުގެ ސްކޫލުތަކުގައި ފައިސާގެ ހުއްދަދީ، ފައިސާގެ ލިޔެކިޔުންތައް ލިޔެ، އަމަލީ ގޮތުން ފައިސާގެ މުއާމަލާތް ތަކުގައި އުޅުއްވާ ފަރާތްތަކަށް އަމާޒުކުރެވުނު ވޯކްޝޮޕެކެވެ.

ހަނިމާދޫ ސްކޫލްގެ ޕްރިންސިޕަލް އަބްދުލް ހަންނާން އިދުރީސް މި ނޫހަށް މައުލޫމާތު ދެއްވަމުން ވިދާޅުވީ ސްކޫލުތަކުގެ ބަޖެޓް ދާއިރާގެ ފަރާތްތަކަށް ބޭއްވުނު ވޯކްޝޮޕެއް ނަމަވެސް މިކަހަލަ ފުރުސަތެއް ހަނިމާދުއަށް ލިބުމުން އެހެން މުއައްސަސާތަކުގެ ފަރާތްތައް ވެސް ބައިވެރިވެފައިވާ ކަމަށެވެ. މިގޮތުން ކައުންސިލް އިދާރާ އާއި އެއާޕޯޓާއި، ޕޮލިސް އަދި އެމްއެންޑީއެފް ގެ ފައިސާ އާއި ބެހޭ ބައިގާ އުޅުއްވާ ފަރާތްތަތް ވަނީ މި ވޯކްޝޮޕްގައި ބައިވެރިވެފައެވެ.

“ތިން އަތޮޅުގެ ބަޖެޓް ސެކްޝަނުގަ އުޅޭ ފަރާތްތަކަށް މި އަމާޒު ކުރެވުނީ. އެކަމަކު ބަޖެޓް ވީމަ ގާތް ގަނޑަކަށް އެއްގޮތަކަށް މަސައްކަތް ހުންނާނީ. ދެން މިރަށަށް މިކަހަލަ ފުރުސަތެއް ލިބުނީމަ އެހެން ފަރާތް ތަކުންވެސް ބައިވެރިވި.” އަބްދުލް ހަންނާނު ވިދާޅުވިއެވެ.

އެޑިއުކޭޝަން މިނިސްޓްރީގެ ބަޖެޓް ސެކްޝަންގެ ފަންނީ ބޭފުޅުން ކިޔަވައިދެއްވި މި ވޯކްޝޮޕް 44 ބައިވެރިން ވަނީ ފުރިހަމަ ކޮށްފައެވެ.