އާއިލާއާ ޖެހުނު މައްސަލައެއްގައި ގެއިން ނުކުމެގެންދިޔަ ހޯރަފުށީ ކުޑަ އަންހެން ކުއްޖާ ފެނިއްޖެ

އާއިލާއާ ޖެހުނު މައްސަލައެއްގައި ގެއިން ނުކުމެގެންދިޔަ ހޯރަފުށީ ކުޑަ އަންހެން ކުއްޖާ ފެނިއްޖެއެވެ.

ހޯރަފުށިން ރޭ ގެންލުނު އުދަރެސް، ފާތިމަތު ޝިފާ، 16، ފެނުނީ ހޯދަމުން ދަނިކޮށް ފަތިހު ހަތަރުގަޑި ބައި ގައި އެރަށު ފިޝް ވިލެޖް ކައިރި ވިނަގަނޑު ތެރޭގައި ހުއްޓާ ކަމަށް ހޯރަފުށީ ކައުންސިލް އިދާރާގެ ރައީސް ވިދާޅުވިއެވެ.

މިނޫހަށް މައުލޫމާތު ދެއްވަމުން ކައުންސިލްގެ ރައީސް މުހައްމަދު މައުރޫފް ވިދާޅުވީ އެކުއްޖާ ގެއިން ނިކުމެގެން ދިޔައީ ކަމަކާ ހިތްހަމަނުޖެހިގެން ރޮއިހެދުމަށްފަހު ކަމަށާއި މިހާރު ފުލުހުން އެމައްސަލަ ބަލަމުންދާ ކަމަށެވެ. ރޭ 11:30 އިން ފެށިގެން އެކުއްޖާ ހޯދުމުގެ މަސައްކަތް ފުލުހުންނާއި އާއްމުން ކޮށްފައިވާ ކަމަށްވެސް މައުރޫފު ވިދާޅުވިއެވެ.

“ގޭތެރޭގަ މައްސަލައެއް ޖެހިގެން ދިޔައީ. އަޅުގަނޑުމެންނަކަށް ނޭނގެ އެއީ ކޮން މައްސަލައެއް ކަމެއް. މިހާރު ފުލުހުން އެމައްސަލަ ބަލަމުން އެދަނީ.” މައުރޫފު ވިދާޅުވިއެވެ.

ހދ. މަކުނުދޫ ކުއްޖަކު ވެސް ގެއްލިގެން ރިޕޯޓް ކުރުމުން ފުލުހުން މިހާރު ވަނީ ހޯދަން ފަށާފައެވެ.