މިލިޔަނުން ގެއްލުންވި ފެންބޮޑުވުމަށްފަހު ހޯރަފުށީގެ ރައްޔިތުން އާއްމު ހާލަތަށް

މިއަހަރުގެ އޮކްޓޯބަރު މަސް ހއ. ހޯރަފުށީގެ ރައްޔިތުންނަށް ނިމިގެން ދިޔައީ ވަރަށް ހިތްދަތި ގޮތަކަށެވެ. މުޅިދުނިޔޭގެ އެކިހިސާބުތަކަށް ވެސް މޫސުން ގޯސްވި އެދުވަސްވަރު، ރާއްޖެއަށް ކުރި ވިއްސާރައިގައި ހޯރަފުއްޓަށް ވަނީ ވަރަށް ބޮޑުވަރު ވެފައެވެ. މެދުނުކެނޑި ގިނަ އިރު ވާރޭ ވެހުމުގެ ސަބަބުން މަގުތަކުގައި ފެންބޮޑު ވިއެވެ. އަދި ފެންގަނޑު ގޭގޭތެރެއަށް ވަދެ ގޭތެރޭ ގެންގުޅޭ ސާމާނުތައް ހަލާކުވެ ރައްޔިތުން ހާލުގައި ޖެހުނެވެ.

ހޯރަފުށީ ކައުންސިލްގެ ރައީސް މުޙައްމަދު މަޢުރޫފް ވިދާޅުވީ ގޮތުން ވިއްސާރައިގައި 3.5 މިލިޔަން ރުފިޔާގެ ގެންލުން ހޯރަފުއްޓަށް ވަނީ ލިބިފައެވެ. މައުރޫފު ވިދާޅުވީ 163 ގެއަކަށް ގެންލުން ވެފައިވާ ކަމަށާއި، 700 އެއްހާ މީހުންނަށް މިކަމުގެ އަސަރު ކޮށްފައިވާ ކަމަށެވެ. އަދި މިހާރު ޑިޒާސްޓަރ މެނޭޖްމަންޓް ސެންޓަރުގެ މިންގަނޑުތަކަށް ބަލާ 3 ކެޓަގަރީ އަކަށް ގެންލުންތައް ބަހާފައިވާ ކަމަށެވެ.

“163 ގެއަކަށް ގެއްލުން ލިބިފަ ވަނީ. 700 އެއްހާ މީހުނަށް އަސަރު ކުރި. ދެން ޑިޒާސްޓަރ ގެ މިންގަނޑު ތަކަށް ބަލާ އޭ، ބީ ސީ، 3 ކެޓަގަރީ އަށް ބަހާފަ ވަނީ.” މައުރޫފު ވިދާޅުވި އެވެ.

ހޯރަފުށީގައި ފެންބޮޑު ވުމުގެ ސަބަބުން އެރަށުގެ ރައްޔިތުންނަށް ސަރުކާރުންނާއި އެކިއެކި އަމިއްލަ ފަރާތްތަކުން ވަނީ އެހިތެރިކަން ފޯރުކޮށްދީފައެވެ. މިގޮތުން ޕޮލިހާއި، އެމްއެންޑީއެފް، ޖީ.އެމް.އާރު، އެލިޔާ، ސަން ޓްރެވަލް، ޗަމްޕާ، އަދި ވިލާ ފައުންޑޭޝަން އިންވަނީ ވަރަށް ބޮޑަށް އެހީތެރިކަން ފޯރުކޮށްދީފައެވެ.

“އަޅުގަނޑު މިފުރުސަތުގަ ފާހަގަ ކުރަން އެކި ފަރާތް ތަކުން އަޅުގަނޑުމެނަށް ވެދިން އެހީ ތެރިކަން. އަދިވެސް އެހީ ވެދޭނެ ފަރާތެއް ހުރި ކަމަށްވާ ނަމަ އަވަސް ކުރަން ވެސް އެދެން. އެއީ އޭރުން ރައްޔިތުންނަށް ފައިދާ ވާނީ.” މައުރޫފު ވިދާޅުވި އެވެ.

ބޯކޮށް ވާރޭ ވެހި ހޯރަފުށީގައި ފެންބޮޑުވުމުގެ ސަބަބުން ހޯރަފުށީ ސިއްހީ މަރުކަޒުގެ އޮފީސް ބައި ގައި ހުރި ތަކެއްޗަށް ފެނުގެ އަސަރުކޮށް އެތަނަށް ވެސް ބޮޑެތި ގެއްލުންތަކެއް ވެފައިވާއިރު އެރަށުގެ ގިނަ ގެ ތަކުގައި ފެންބޮޑުވެ ގޭތެރޭ ގެންގުޅޭ ވަރަށް ގިނަ ތަކެތި ވަނީ ހަލާކުވެފައެވެ. އެހެން ނަމަވެސް މިހާރު ރަށް ވަނީ އާއްމު ހާލަތަކަށް އައިސްފައެވެ.