ކުޅުދުއްފުށީ ޕަބްލިކް ހެލްތް ޔުނިޓުގެ ހިދުމަތްތައް އާ އިމާރާތަކަށް ބަދަލުކޮށްފި

ކުޅުދުއްފުށީގައި ދޭ ޕަބްލިކް ހެލްތު ޔުނިޓުގެ ޚިދުމަތްތައް ހޮސްޕިޓަލުގެ ގޯތި ތެރޭގައި ހުންނަ އޮފީސް ބިލްޑިންގ އަށް ބަދަލުކޮށްފި އެވެ.

ކުރިން ޕަބްލިކް ހެލްތް ޔުނިޓްގެ ހިދުމަތް ދެމުން އައީ ކުޅުދުއްފުށީ ހޮސްޕިޓަލުގެ ތެރޭގައި އެ ޔުނިޓަށް ހާއްސަކޮށްފައި ހުންނަ ބައެއްގައި އެވެ.

މިނޫހަށް މައުލުމާތު ދެއްވަމުން ކުޅުދުއްފުށީ ހޮސްޕިޓަލުގެ އެކްޓިން ޑެޕިއުޓީ މެނޭޖަރ މުހައްމަދު ހަސަން ވިދާޅުވީ އިމާރާތް ބަދަލު ކުރީ ހޮސްޕިޓަލަށް ދިމާވެފައިވާ ޖާގައިގެ ދަތިކަން ހައްލު ކުރުމަށް ކަމަށެވެ. އަދި ކުރިން ޕަބްލިކް ހެލްތް ޔުނިޓުގެ ޚިދުމަތް ދެމުން ގެންދިޔަ ތަނުގައި ޑައިލެސިސް ސެންޓަރެއް ޤާއިމް ކުރުމުގެ މަސައްކަތް މިހާރު ކުރިއަށްދާ ކަމަށްވެސް ވިދާޅުވިއެވެ.

މުހައްމަދު ހަސަން ވިދާޅުވީ ހޮސްޕިޓަލުގެ ބޭރުގައި ޕަބްލިކް ހެލްތް ޔުނިޓު ހުރުމުން ކުޑަކުދިން، އިތުރު އެހެން ބަލިތަކަށް ހުށަހަހެޅުމުގެ ފުރުސަތު ކުޑަކޮށްދޭނެ އެވެ.

ޕަބްލިކް ހެލްތު ޔުނިޓު ހިންގަނީ ދެބަޔަކަށް ބަހާލައިގެންނެވެ. މިގޮތުން ޔުނިޓު 1 ގައި ކުރިއަށް ގެންދަނީ ބަރުދަން ބެލުމާއި، ވެކްސިން ދިނުމާއި، އާއިލާ ބިނާކުރުމާއި މާބަނޑު މީހުންނަށް ފަރުވާ ދިނުމެވެ. އަދި ޔުނިޓު 2 ގައި ކުރިއަށް ގެންދަނީ ޓީ ބީ ފަދަ ބަލިތަކަށް އަހުލުވެރި ކުރުމުގެ ޕްރޮގްރާމް ތަކާއި ގޭގެއަށް ޒިޔާރަތްކުރުންފަދަ މަސައްކަތްތަކެވެ.

ޕަބްލިކް ހެލްތް ޔުނިޓުގެ ހިދުމަތްތައް އާ އިމާރާތަށް ބަދަލުކޮށްފައިވަނީ މިމަހުގެ 16 ވަނަ ދުވަހެވެ.  އެ އިމާރާތަކީ ހެލްތު ކޯޕަރޭޝަން ކުރިން ހިންގި އިމާރާތެވެ.