ނޮޅިވަރަންފަރުގައި ތޫނު ހަތިޔާރު ބޭނުންކޮށްގެން މީހުންނަށް ބިރު ދެއްކި ދެމީހަކު ހައްޔަރުކޮށްފި

ތޫނު ހަތިޔާރު ބޭނުންކޮށްގެން މީހުންނަށް ބިރު ދެއްކި ދެ މީހަކު މަސްތުވާތަކެތިކަމަށް ޝައްކުކުރެވޭ އެއްޗެހިތަކަކާއެކު ހދ ނޮޅިވަރަންފަރުން ހައްޔަރުކޮށްފި އެވެ.

ފުލުހުން މި ދެ މީހުން ހައްޔަރުކޮށްފައިވަނީ މިމަހުގެ 21 ވަނަ ދުވަހު އެވެ. ފުލުހުން މައުލޫމާތު ދޭ ގޮތުގައި ތޫނު ހަތިޔާރު ބޭނުންކޮށްގެން ބިރު ދެއްކި މައްސަލައިގައި ހައްޔަރުކޮށްފައިވަނީ  އުމުރުން 25 އަހަރުގެ ފިރިހެނަކާއި 19 އަހަރުގެ ފިރިހެނެކެވެ.

ފުލުހުން ބުނީ މި ދެމީހުން ހައްޔަރުކޮށްފައިވަނީ މިމަހުގެ 21 ވަނަ ދުވަހުގެ ރޭ މެންދަމު ނޮޅިވަރަންފަރު މަގުމައްޗަށް ތޫނު ހަތިޔާރު ހިފައިގެން ނުކުމުގެ މީހުންނަށް ބިރުދައްކަމުންދާ ކަމަށް ކުޅުދުއްފުށީ ޕޮލިސް ސްޓޭޝަނަށް ހުށަހެޅުނު މައްސަލައާއި ގުޅިގެން ފުލުހުން ހިންގި ހާއްސަ އޮޕަރޭޝަނެއްގައި ކަމަށެވެ. އެގޮތުން އެ ދެމީހުން ހައްޔަރުކޮށްފައިވަނީ މިމަހުގެ 21 ވަނަ ދުވަހުގެ ހެނދުނު 10:50 ހާއިރު އެ ދެމީހުންގެ ތެރެއިން އުމުރުން 25 އަހަރުގެ މީހާ ދިރިއުޅޭ ގޭގައި ނިދާފައި ތިއްބައެވެ.

އެ ދެ މީހުން ހައްޔަރުކޮށް އެމީހުން ނިދާފައި ތިބި ކޮޓަރިއާއި އެ ދެމީހުންގެ ހަށިގަނޑު ބަލައި ފާސްކުރިއިރު އޭގެ ތެރެއިން އުމުރުން 25 އަހަރުގެ މީހާ އަތުން މަސްތުވާތަކެތިކަމަށް ޝައްކުކުރެވޭ އެއްޗެއް އަޅާފައިހުރި 25 ރަބަރު ޕެކެޓް ފެނިފައިވާ ކަމަށް ފުލުހުން މައުލޫމާތުދެއެވެ.

މި ދެމީހުންނަކީވެސް ތޫނު ހަތިޔާރު ބޭނުންކުރުމާއި މީހުންނަށް ބިރުދެއްކުމުގެ ކަށުގެ ރެކޯރޑް އޮންނަ ދެމީހުން ކަމަށް ފުލުހުން ބުނެއެވެ. މި ދެ މައްސަލަ ކުޅުދުއްފުށީ ޕޮލިސް ސްޓޭޝަނުން ދަނީ ތަޙްޤީޤް ކުރަމުންނެވެ.