ކުޅުދުއްފުށީ ހޮސްޕިޓަލުގެ ފާހާނާތަކުން ފެނުގެ ހިދުމަތް ގަޑިއެއްހާ އިރަށް މެދުކެނޑިއްޖެ

ކުޅުދުއްފުށީ ހޮސްޕިޓަލުގެ ފާހާނާތަކުން ފެނުގެ ހިދުމަތް ގަޑިއެއްހާ އިރަށް މެދު ކެނޑިއްޖެ އެވެ.

ކުޅުދުއްފުށީ ހޮސްޕިޓަލުގެ ފާހާނާތަކުން ފެނުގެ ހިދުމަތް ކެނޑިފައިވަނީ މިރޭ ގާތްގަނޑަކަށް 7:30 ހާއިރުކަމަށް މައުލޫމާތު ލިބެއެވެ. އެހެންނަމަވެސް ގަޑިއެއްހާ އިރުފަހުން އަލުން ހިދުމަތް ލިބެން ފެށިއެވެ.

މިކަމާ ގުޅޭގޮތުން ހޮސްޕިޓަލުގެ މެނޭޖަރ އިބްރާހީމް ވަހީދު ވިދާޅުވީ، ފެނުގެ ހިދުމަތް ކަނޑާލާފައިވަނީ ހޮސްޕިޓަލުގައި މިހާރު ހަދަމުންދާ ޑައެލެސިސް ސެންޓަރުގެ މަސައްކަތެއް ކުރުމަށްކަމަށެވެ. އަދި ތަނުގެ ތެރޭގައި ބޮޑު މަސައްކަތްތަކެއް ކުރެވެމުންދާއިރު ކުޑަވަގުތު ކޮޅަކަށް ފެނުގެ ހިދުމަތް މެދުކެނޑުމަކީ ހަމަ ވެދާނެކަމެއް ކަމަށެވެ. އަދި، މިރޭ ފެނުގެ ހިދުމަތް މެދުކަނޑާލީ ކުރިން އެކަން އެންގުމަށްފަހު ކަމަށް ވަހީދު ވިދާޅުވި އެވެ.

ހޮސްޕިޓަލުގައި އެޑްމިޓްކޮށްފައި އޮތް ބަލިމީހެއްގެ އެހީތެރިއަކަށް ހުރި މީހަކު ބުނީ އެފަރާތަށް އެކަން އަންގާފައި ނުވާކަމަށާއި އެ ވޯޑުގައި އޮތް އެއްވެސް މީހަކަށް ފާހާނާތަކުން ފެން ކަނޑާލާކަން އަންގާފައި ނުވާކަމަށެވެ. އޭނާ ބުނީ ފެން ނުލިބޭކަން އެނގުނީ ފާހާނާކުރަންދިޔައިރު ފެން ނާންނާތީ ކަމަށެވެ. އަދި އެވަގުތު އެތަނުން ދިމާވި ހޮސްޕިޓަލުގެ އެއްވެސް މުވައްޒަފަކަށް އެކަން އެނގިފައި ނުވާކަމަށް އޭނާ ބުންޏެވެ.

ކުޅުދުއްފުށި އޮންލައިން އަށް އެނގިފައިވާ ގޮތުގައި މިރޭގެ އެ ވަގުތުގައި ހޮސްޕިޓަލުގައި ފެން ކަނޑާލައިގެން ކުރަންޖެހޭ ކަހަލަ މަސައްކަތެއް ކޮށްފައެއް ނުވެއެވެ.