ށ. ފުނަދޫގައި ކޯލާވާޓަރު ބޭނުންކުރަމުން ދިޔަ 2 މީހަކާއި މަސްތުވާތަކެތިކަމަށް ޝައްކުކުރެވޭ އެއްޗެއް ހުރި ރަބަރު ޕެކެޓަކާއެކު ބަޔަކު ހައްޔަރުކޮށްފި

ށ. ފުނަދޫގައި ކޯލާވާޓަރު ބޭނުންކުރަމުން ދިޔަ 2 މީހަކާއި މަސްތުވާތަކެތިކަމަށް ޝައްކުކުރެވޭ އެއްޗެއް ހުރި ރަބަރު ޕެކެޓަކާއެކު ބަޔަކު ހައްޔަރުކޮށްފި އެވެ.

މީގެ ތެރެއިން ކޯލާވަޓަރު ބޭނުންކުރަމުން ދިޔަ މައްސަލައާއި ގުޅިގެން ފުލުހުން ހައްޔަރުކޮށްފައިވަނީ 20 އަހަރުގެ މީހަކާއި 23 އަހަރުގެ މީހެއް ކަމަށް ފުލުހުން މައުލޫމާތުދެއެވެ.

ފުނަދޫ ޕޮލިސް ސްޓޭޝަނުން މިހާރު ކުރިއަށްގެންދާ އޮޕަރޭޝަނެއްގައި ފުނަދޫގެ ދަށްފަޅު ސަރަހައްދު ބަލައި ފާސްކުރަމުން ދަނިކޮށް އެތަނުގައި އެހެލާފައި އޮތް ލޯންޗެއްގެ ތެރޭގައި ތިއްބައި ފެނިގެން ކަމަށް ފުލުހުން ބުނެއެވެ.

ފުލުހުން ބުނީ ރޭ ހައްޔަރުކުރި މި ދެމީހުން ތިބި ލޯންޗުތެރެ ބަލައި ފާސްކުރިއިރު އޮޑި ކޮލޯން ކޯލާވަރޓަރު ފުޅިއަކާއި 500 އެމްއެލްގެ ފެން ހުރި ލައިފް ފުޅިއަކާއި ބިއްލޫރި ތައްޓެއްގެ އިތުރުން މަސްތުވާތަކެތިކަމަށް ޝައްކުކުރެވޭ އެއްޗެއް ހުރި އެއްކޮށްފައި ހުރި ސިނގިރެޓް ކުޑިތަކެއް ފެނިފައިވާ ކަމަށެވެ.

މީގެ އިތުރުން މިމަހުގެ 24 ވަނަ ދުވަހުގެ ރޭ ހަމަ އެރަށުން މަސްތުވާތަކެތިކަމަށް ޝައްކުކުރެވޭ އެއްޗެއް ހުރި ރަބަރު ޕެކެޓަކާއެކު 18 އަހަރުގެ މީހަކު ވަނީ ހައްޔަރު ކޮށްފައި އެވެ. އޭނަވެސް ހައްޔަރުކޮށްފައިވަނީ ފުނަދޫ ދަށްފަޅު ސަރަހައްދުން ކަމަށް ފުލުހުން ބުނެއެވެ.

މަސްތުވާތަކެތިކަމަށް ޝައްކުކުރެވޭ ރަބަރު ޕެކެޓް ފެނިފައިވަނީ ފުލުހުން އޭނާ ހައްޔަރުކުރަން އުޅުމުން އެއްޗެއް އެއްލާލިތަން ފެނިގެން އެސަރަހައްދު ބަލައި ފާސްކުރިއިރު އެސަރަހައްދުންނެވެ.

މި ދެ މައްސަލަ މިހާރު އަންނަނީ ފުލުހުން އިތުރަށް ތަހުގީގު ކުރަމުންނެވެ.