އިކޮނޮމިކް މިނިސްޓްރީން ދޫކުރާ ލުއި ލޯނަށް އެދޭ ފަރާތްތަކަށް ފަންނީ އެހީ ކުޅުދުއްފުށީގައި ހުންނަ ބީޑީއެސްސީ އިން ދެނީ

އިކޮނޮމިކް މިނިސްޓްރީން ދޫކުރާ ލުއި ލޯނަށް އެދޭ ފަރާތްތަކަށް ފަންނީ އެހީ ކުޅުދުއްފުށީގައި ގާއިމްކޮށްފައިވާ ބިޒްނަސް ޑިވެލޮޕްމަންޓް ސާވިސް ސެންޓަރ (ބީޑީއެސްސީ) އިން ދޭން ފަށައިފި އެވެ.

އެސެންޓަރުން ހާމަކުރައްވާ ގޮތުގައި އެތަނުން ވިޔަފާރުއާއި ގުޅޭ ފަންނީ އިރުޝާދާއި، މައުލޫމާތު ރައްޔިތުންނަށް ފޯރު ކޮށްދޭނެއެވެ. އަދި ލޯނު ނެގުމަށް ފޯމް ފުރުމާއި ހަމައިން ވިޔަފާރި ހިންގުމުގެ ހުރިހާ މައުލޫމާތެއް ވެސް އެފަރާތުން ފޯރު ކޮށްދޭނެއެވެ.

ބީޑީއެސްސީ  ގެ ފަރާތުން ވާހަކަ ދެއްކެވި އަހުމަދު ޔާސިމް  ވިދާޅުވީ ސަރުކާރުގެ ރަސްމީ ގަޑިތަކުގައި އެ އޮފީހުން މައުލޫމާތު ދެއްވާއިރު ފޯނު މެދުވެރިކޮށްވެސް އެހީ ތެރިކަން ފޯރުކޮށްދެމުން ދާކަމަށެވެ.

އިކޮނޮމިކް މިނިސްޓްރީ އިން ވަނީ މިމަހުގެ 17 ވަނަ ދުވަހު ލޯނަށް އެދުމުގެ ފުރުސަތު އިތުރު ކޮށްފައެވެ.  މި ލޯން ދޫކުރުމުގައި، ދާދި ފަހުން ކުރި ވިއްސާރައިގައި ބޮޑެތި ގެއްލުންތަކެއް ލިބުނު ރަށްރަށުގެ ދަނޑުވެރިންނަށް ލޯންގެ 60 ޕަސެންޓް ދޫކުރުމައި އިސްކަން ދޭނެ ކަމަށް އެ މިނިސްޓްރީން ވަނީ ބުނެފައި އެވެ.  ބާކީ 40 ޕަސެންޓް ދޫކުރާނީ އާންމުކޮށް ދަނޑުވެރިކަން ކުރާ ފަރާތްތަކަށް ކަމަށް ވެސް މިނިސްޓްރީން ހާމަކުރެއެވެ.

އަންނަ އަހަރުގެ ފެބްރުއަރީ 6 ކަށް ލޯނަށް އެދި ހުށައެޅުމުގެ ފުރުސަތު ހަމަވާނެއެވެ. އިކޮނޮމިކް މިނިސްޓްރީން ހާމަކުރައްވާ ގޮތުގައި ލޯން ދޫކުރާ އެންމެ ބޮޑު އަދަދަކީ 320،000 ރުފިޔާއެވެ. . އަދި ލޯނަށް އެދެވޭ އެންމެ ކުޑަ މިންވަރަކީ 50،000ރ. އެވެ

އިންޓްރަސްޓްގެ ގޮތުގައި 6.83 ޕަސެންޓް ދައްކަން ޖެހޭ، މި ލޯނު 8  އަހަރު ދުވަހުގެ ތެރޭގައި ދައްކަން ޖެހޭނެއެވެ.