ޕީޕީއެމް ކުޅުދުއްފުށީ ގޮފީގެ ނައިބު ރައީސް މަޤާމުން އިސްތިއުފާދީފި

ޕުރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ކުޅުދުއްފުށީ އަސުރުމާ ގޮފީގެ ނައިބު ރައީސް އެ މަގާމުން އިސްތިއުފާ ދެއްވައިފި އެވެ.

މަގާމުން އިސްތިއުފާ ދެއްވިކަން ކުޅުދުއްފުށި އޮންލައިން އަށް ކަށަވަރު ކޮށްދެމުން އަސުރުމާގޮފީގެ ނައިބު ރައީސް އަލީ ހުސައިން (ރޯޝަނީގެ) ވިދާޅުވީ އިސްތިއުފާ ދެއްވި މައިގަނޑު ސަބަބަކީ އެ ގޮފީގެ ރައީސް މުހައްމަދު އަލީ އާއި ދެމެދު ޚިޔާލު ތަފާތު ވުން ތަކެއް ހުރުންކަމަށެވެ. އަދި އެކަންތައް ހައްލު ނުވެ ދިގުލައިގެން ދިއުމުން އަލީ ހުސައިނަށް ތާއީދުކުރައްވާ ބޭފުޅުންވެސް، އޭނާ އެމަގާމުން އިސްތިއުފާ ދެއްވުމަށް އެދެމުން އަންނަ ކަމަށް އޭނާ ވިދާޅުވި އެވެ.

ޕީޕީއެމްގެ މެމްބަރުންނާއި ބައްދަލުކުރުމަށް ޖަލްސާއެއް ބޭއްވުމަށް ރައީސަށް ދަންނަވާފައިވާނޭ ކަމަށާއި، ނަމަވެސް އެކަންވެސް  މިއަދާ ހަމައަށް ވެސް ނުވާކަމަށް އަލީ ވިދާޅުވި އެވެ. އަދި 9 މެމްބަރުން ހިމެނޭ ހިންގާ ކޮމިޓީގެ ބައްދަލުވުމަކުން 5 މެމްބަރުންނަށް ވުރެ ގިނަ މެމްބަރުން ހާޒިރު ނުވުމާއި މުހައްމަދު އަލީގެ ގޭގައި ކޮމިޓީގެ ބައްދަލުވުންތައް ބޭއްވުންވެސް އިސްތިއުފާގެ ސަބަބު ތަކުގެ ތެރޭގައި ހިމެނޭ ކަމަށް އަލީ ވިދާޅުވި އެވެ.

“އަޅުގަނޑު މިހާރު ދަންނަވާފަ ވާނީ ރައްޔިތުންނާ ބައްދަލު ކޮށްލަން ޖަލްސާ އެއް ބާއްވަންވެސް. އެކަމެއްވެސް އަދި ނުވޭ. ދެން 9 މެމްބަރުން މި ހިމެނޭ ހިންގާ ކޮމިޓީގެ ބައްދަލުވުމެއްގަ ވެސް 5 މެމްބަރުންނަށް ވުރެ ގިނައެއް ނުވޭ.” އަލީ ވިދާޅުވި އެވެ.

އިސްތިއުފާ ދެއްވާ ފޮނުވި ސިޓީގައި އަސުރުމާ ގޮފީގެ ރައީސަށް ވަރަށް ބޮޑަށް ފާޅު ވިދާޅުވެ، އެއީ ހުދުމުހުތާރު ބޭފުޅެއް ކަމަށް ވަނީ ފާހަގ ކޮށްފައެވެ. އިސްތިއުފާގެ މި ސިޓީގެ ކޮޕީއެއް ކުޅުދުއްފުށި އޮންލައިނަށްވެސް ވަނީ ލިބިފައެވެ.

އަސުރުމާ ގޮފީގެ ނައިބު ރައީސް އިސްތިއުފާ ދީފައި ވަނީ މިމަހުގެ 23 ވަނަ ދުވަހު އެވެ. މީގެ އިތުރުން މަޤާމާއި ހަވާލުވިތާ 3 މަސް ދުވަސް ނުވަނީސް ރައީސް ގެ އިތުބާރު ނެތް ކަމުގެ ވޯޓެއް ނެގުމަށް ޕީޕީއެމް އިން މަސައްކަތް ކޮށްފައިވެއެވެ.

އަސުރުމާ ގޮފީގެ ރައީސާއި ބައެއް މެމްބަރުންނާއި ދެމެދު ވަނީ ވަރަށް ބޮޑަށް ޚިޔާލު ތަފާތުވުން ތައް އުފެދިފައެވެ. ނައިބު ރައީސް އެ މަގާމުން އިސްތިއުފާދިން ނަމަވެސް ޕާޓީއިން ވަކިވެފައެއް ނުވެއެވެ.

އަސުރުމާގޮފީގެ ރައީސް މުހައްމަދު އަލީ ވިދާޅުވީ  އިސްތިއުފާގެ ސިޓީ ލިބިފައިވާ ކަމަށެވެ. އެހެންނަމަވެސް ސިޓީގައި އެވާ އެއްވެސް ވާހަކައަކަށް ރައްދު ދޭން ބޭނުން ނުވާ ކަމަށް މުހައްމަދު އަލީ ވިދާޅުވި އެވެ.