އެވިޑް ޓްރެއިނިންގ ސެންޓަރުގެ އޯޕަން ޑޭ ކުޅުދުއްފުށީގައި ބާއްވައިފި

އެވިޑް ޓްރެއިނިންގ ސެންޓަރުގެ އޯޕަން ޑޭ ކުޅުދުއްފުށީގައި ބާއްވައިފި އެވެ.

އިއްޔެ ހަވީރު ޤައުމީ އިދާރައިގާ ކުރިއަށްދިޔަ މި ޕުރޮގްރާމްގައި އަންނަ އަހަރުގެ ޖެނުއަރީގައި އެސެންޓަރުން ފެށުމަށް ހަމަޖެހިފައިވާ ކޯސްތަކާ ބެހޭ މައުލޫމާތުދީ އެޕްލިކޭޝަން ފުރުންވެސް ކުރިއަށް ދިޔައެވެ.

މި އޯޕަން ޑޭ އާއި ބެހޭގޮތުން މި ނޫހަށް މައުލޫމާތު ދެއްވަމުން އެވިޑް ގެ ޓީޕީ ކޯޑިނޭޓަރ ހައްވާ ރިޔާޒާ ވިދާޅުވީ މި ޕުރޮގްރާމަކީ ޖެނުއަރީގައި ފެށުމަށް ހަމަޖެހިފައިވާ ކޯސްތަކާއި ބެހޭ މައުލޫމާތު ފޯރުކޮށްދީ ޤާބިލު ބައެއް އުފެއްދުމަށް ހުރި ފުރުޞަތުތައް އަންގައިދިނުގެ ގޮތުން ބާއްވާ ޕުރޮގްރާމެއް ކަމަށެވެ. އަދި ކުޅުދުއްފުއްޓަކީ މިކަމަށް ހުޅުވާލުމުން އެންމެ ބޮޑު ތަރުހީބު ލިބުން ރަށް ކަމަށް އޭނާ ވިދާޅުވި އެވެ.

މިއަދުގެ އޯޕަން ޑޭ ގައި އެޕްލިކޭޝަން ފުރިހަމަ ކުރި ކޮންމެ ދަރިވަރަކު ވަނީ ގުރުއަތެއް ނަގާފައެވެ. މީގެ ތެރެއިން 3 ދަރިވަރަކަށް ވަނީ ސްކޯލަރޝިޕެއް ލިބިފަ އެވެ. އަދި ގުރުއަތުން ހޮވުނު ބައެއް ދަރިވަރުންނަށް ކޯހުގެ ބައެއް ޚަރަދުތައް އެވިޑުން ކުރާ ގޮތަށް ވެސް ވަނީ ހަމަޖެހިފައި އެވެ.

މިއީ މާލެ ފިޔަވާ އެހެން ތަނެއްގައި އެވިޑްގެ އޯޕަން ޑޭ ބޭއްވި ފުރަތަމަ ފަހަރެވެ.