ށ. ފުނަދޫއިން ބަނގުރާ ކައްކައި ބޭނުންކުރަމުންދިޔަ ބަޔަކު ހައްޔަރު ކޮށްފި

ފުލުހުން ކުރިއަށްގެންދާ ހާއްސަ އޮޕަރޭޝަނެއްގައި، ށ. ފުނަދޫއިން ބަނގުރާ ކައްކައި ބޭނުންކުރަމުންދިޔަ ބަޔަކު ހައްޔަރު ކޮށްފި އެވެ.

ފުޅާދާއިރާއެއްގައި ބަނގުރާ ކައްކައި ބޭނުންކުރަމުން ދިޔަ ކަމުގެ ތުހުމަތުގައި ފުލުހުން ހައްޔަރުކޮށްފައިވަނީ 18 އަހަރުން ދަށުގެ 2 ކުއްޖަކާއި 04 މީހެކެވެ. ހައްޔަރުކުރި ކުޑަކުދިންގެ ތެރޭގައި ހިމެނެނީ 17 އަހަރުގެ ކުއްޖަކާއި 15 އަހަރުގެ ކުއްޖެކެވެ. އަދި އަނެއް 4 މީހުންގެ ތެރޭގައި ހިމެނެނީ 20 އަހަރާއި 25 އަހަރާއި ދެމެދުގެ ޒުވާނުން ކަމަށް ފުލުހުން މައުލޫމާތު ދެއެވެ.

ފުލުހުން ބުނިގޮތުގައި އެމީހުން ހައްޔަރުކޮށްފައިވަނީ ފުލުހުންނަށް ލިބުނު އިންޓެލިޖެންސް މަޢުލޫމާތަކާއި ގުޅިގެން ހިންގި އޮޕަރޭޝަނެއްގައި އެވެ. އަދި އެ އެންމެން ފުލުހުންގެ ބެލުމުގެ ދަށަށް ގެނެސް ބެލިބެލުމުން އެތަނުން އެކެއްގެ އަތުން ފެނުނު ގެލެކްސީ ޓެބެއްގައި އެ 6 މީހުން ބަނގުރާ ކައްކަން ތައްޔާރުވާ މަންޒަރާއި ބަނގުރާ ކައްކަން ގެންގުޅޭ ތަކެތި ތައްޔާރު ކުރާ މަންޒަރު ދައްކުވައިދޭ ފޮޓޯތައް ހުރިކަމަށް ފުލުހުން މައުލޫމާތު ދެއެވެ.

މި މައްސަލައާއި ގުޅިގެން ފުލުހުން ކުރި މަސައްކަތުން އެމީހުން ބަނގުރާ ކައްކަން ބޭނުން ކުރަން ގެންގުޅުނު ކަމަށް ބެލެވޭ އާލާތްތަކާއި ބަނގުރާކަމަށް ޝައްކު ކުރެވޭ އެއްޗެއް ހުރި 20  ލީޓަރު ހޯދާފައިވެއެވެ.

ފަހަކަށް އައިސް މަސްތުވާތަކެތީގެ ގިނަ މައްސަލަތަކެއްގައި ށ. ފުނަދޫއިން މީހުން އަންނަނީ ހައްޔަރުކުރަމުންނެވެ.

މަސްތުވާތަކެތީގެ ވަބާއިން ސަލާމަތްވެފައިވާ އަތޮޅަކަށް އެ އަތޮޅު ހެދުމުގެ ގޮތުން ށ.ފުނަދޫގައި ކުރިއަށްގެންދިޔަ މި އޮޕަރޭޝަނުން ހައްޔަރު ކުރި މި މީހުންގެ މައްސަލަ ފުލުހުން މިހާރު ދަނީ ތަހުގީގު ކުރަމުންނެވެ.