ހދ އަތޮޅުގައި ހުނަރުވެރި ވާހަކަދެއްކުންތެރިން އުފެއްދުމުގެ ބޭނުމުގައި އަތޮޅު ކައުންސިލުން ވޯކްޝޮޕެއް ފަށައިފި

ހދ އަތޮޅު ކައުންސިލާއި ދިވެހި ބަހުގެ އެކަޑަމީއާ ގުޅިގެން، ހދ އަތޮޅުގައި ހުނަރުހުރި ވާހަކަދެއްކުންތެރިންތަކެއް އުފެއްދުމުގެ ބޭނުމުގައި ސްކޫލުތަކުގެ މުދައްރިސުންނަށް އަމާޒުކޮށްގެން ޕުރޮގްރާމެއް ފަށައިފި އެވެ.

އިއްޔެ ހެނދުނު ފެށި މި ވޯކްޝޮޕަކީ ހދ އަތޮޅުގައި މޮޅެތި ހުނަރުހުރި ވާހަކަދެއްކުންތެރިން ތަކެއް އުފެއްދުމަށްޓަކައި، ދަރިވަރުންނަށް އެހުނަރު ދަސްކޮށްދޭ މުދައްރިސުން އެކަމަށް އަހުލުވެރި ކުރުވުމަށް ބޭއްވޭ ވޯކްޝޮޕެއް ކަމަށް އަތޮޅު ކައުންސިލްގެ ރައީސް ހުސައިން ރަޝީދު ވިދާޅުވި އެވެ.

ޤައުމީ އިދާރާގައި ކުރިއަށްދާ މި ވޯކްޝޮޕްގައި ކިޔަވައިދެއްވަނީ މަޝްހޫރު ވާހަކަދެއްކުންތެރިޔާ އަދި ދިވެހި ބަހުގެ މާހިރެއް ކަމަށްވާ އަންވަރު އިބްރާހިމެވެ.

އިއްޔެއިން ފެށިގެން 3 ދުވަހުގެ ނިޔަލަށް ކުރިއަށްދާ މި ވޯކްޝޮޕްގައި ހދ އަތޮޅުން 23 ޓީޗަރުން ބައިވެރިވެފައިވެއެވެ. ކުޅުދުއްފުށީގެ 5 ސްކޫލުން 10 ޓީޗަރުން ދަނީ މި ވޯކްޝޮޕްގައި ބައިވެރިވަމުންނެވެ.