މާލޭ މެޑިކަލްސްގެ ދަތުގެ ފަރުވާދޭ ޚާއްސަ ކޭމްޕެއް ކުޅުދުއްފުށީގައި ފަށައިފި

މާލޭ މެޑިކަލްސްގެ ފަރާތުން ހިންގާ ދަތުގެ ފަރުވާދޭ ޚާއްސަ ކޭމްޕެއް މިއަދު ކުޅުދުއްފުށީގައި ފަށައިފި އެވެ.

ޓްރިވެންޑްރަމްގެ އޮމެގާ ޑެންޓަލް ކްލިނިކްގެ ދަތުގެ ފަރުވާއަށް ޚާއްސަ ޑރ ޖޯރޖީ ސެލްވަރާޖް މި ކޭމްޕުގައި ދެއްވާ ފަރުވާ ތަކުގެ ތެރޭގައި ދަތް އުފުރުން، ފުޓުނި އެޅުން، ސާފުކުރުން، ރޫޓު ކެނަލް ޓްރީޓްމެންޓް އަދި ނަރުގަނޑު އެޅުވުން ފަދަ ފަރުވާތައް ހިމެނެެއެވެ.

ކުޅުދުއްފުށީ “މަތިވަރު” ގޭގައި ކުރިއަށްދާ މި ކޭމްޕް މިމަހުގެ 10 ވަނަ ދުވަހުގެ ނިޔަލަށް ކުރިއަށްދާނެއެވެ. މިއީ ޑރ ސެލްވަރާޖް ކުޅުދުއްފުށީގައި ފަރުވާ ދެއްވާ 7 ވަނަ ކޭމްޕެވެ.

މީގެ އިތުރުން ލޮލުގެ ފަރުވާދޭ ޚާއްސަ ކޭމްޕެއްވެސް މިމަހުގެ 12 އަދި 13 މި ދެ ދުވަހު މަތިވަރުގޭގައި ކުރިއަށްދާނެއެވެ.  ލޮލުގެ ފަރުވާދޭ އިންޑިޔާގެ އެންމެ ބޮޑު ނެޓްވާރކް ވާސަން އައިކެއަރ ހޮސްޕިޓަލްސް ގެ ލޮލުގެ ބަލިތަކަށް ޚާއްސަ ޑރ އަސްގަރް އައްބާސް އަދި އޮޕްޓޮމެޓްރިސްޓް ސެންތިލް ކުމާރް ފަރުވާ ދެއްވާ މި ކޭމްޕަކީ ކުޅުދުއްފުށީގައި މި 2 ޑަކްޓަރުން ފަރުވާ ދެއްވާ 3  ވަނަ ކޭމްޕެވެ.

މި ކޭމްޕްގައި ދެއްވާ ފަރުވާ ތަކުގެ ތެރޭގައި ލޮލުން ފެން އައުން، ހިރުވުން، ކަރުނަވަޅު ބެދުން، ފުސްވުން، ހަކުރުބައްޔާއި ލޭމައްޗަށް ދާ ބަލީގައި ލޮލަށް ލިބޭ ގެއްލުން ހިމެނެއެވެ. އަދި ލޭޒަރ ފަދަ އޮޕަރޭޝަންތައް ކުރައްވާފައިވާ ފަރާތްތައް ރިވިއު ކުރުމާއި މިފަދަ ކަންތައްތައް ކުރަން ބޭނުންވާ ފަރާތްތައް ސްކްރީންކޮށް ލޮލުގެ ނަމްބަރު ނެގުމާއި އައިނު އަދި ލެންސް ހެއްދުން ވެސް މި ކޭމްގައި ހިމެނޭ ކަމަށް މާލޭ މެޑިކަލްސް އިން މައުލޫމާތު ދެއެވެ.

މި ކޭމްޕަށް އެޕޮއިންޓްމެންޓް ހެއްދުމުގެ ކަންތައްތައް 9693535 އަށް ގުޅައިގެން ހަމަޖެހޭނެކަމަށް ކުޅުދުއްފުށީގައި އެ ކޭމްޕް އިންތިޒާމުކުރާ ފަރާތުން މައުލޫމާތު ދެއެވެ.