އަންހެނުންތަކަކާ ގަދަކަމުން ބަދުއަހުލާގީ އަމަލު ހިންގި މައްސަލައިގައި ބާރީ 5 އަހަރަށް ޖަލަށް ލުމަށް ހުކުމްކޮށްފި

ޖަލާލުއްދީން ސްކޫލުގެ މަސައްކަތުމީހުންގެ ވަޒީފާގައި އުޅުނު 8 އަންހެނުންނާ ގަދަކަމުން ބަދުއަހުލާގީ އަމަލު ހިންގި މައްސަލައިގައި އެ ސްކޫލުގެ ސަރުދާރުކަމުގެ މަގާމުގައިހުރި އަބްދުލް ބާރީ 30 އެތިފަހަރުން ތައުޒީރުކޮށް 5 އަހަރަށް ޖަލަށްލުމަށް ހުކުމް ކޮށްފި އެވެ.

ކުޅުދުއްފުށީ މެޖިސްޓްރޭޓް ކޯޓުން މިއަދު ކޮށްފައިވާ ހުކުމުގައި ބުނެފައިވަނީ މި މައްސަލައިގައި ހެކިބަސް ދިން މީހުންގެ ހެކިބަހުންނާއި، އެމައްސަލައިގައި ހިމެނޭ 8 މީހުންގެ ބަހުންވެސް އަބްދުލް ބާރީ އެމީހުންނާއެކު ގަދަކަމުން ބަދުއަހުލާގީ އަމަލު ހިންގިކަން ޝަރީއަތަށް ސާބިތުވާ ކަމަށެވެ.

ޖަލާލުއްދީން ސްކޫލުގެ ސަރުދާރުކަމުގެ މަގާމުގައި ހުރި ކުޅުދުއްފުށީ މޭބިސްކަދުރުގެ އަބްދުލްބާރީ އަބްދުއްރަހުމާނު އެ ސްކޫލުގެ މަސައްކަތު މީހުންތަކަކާއެކު އެކި ފަހަރުމަތިން ބަދުއަހުލާގީ އަމަލު ހިންގާފައިވާ ކަމަށް އޭނާގެ މައްޗަށް ދައުލަތުން ކުރި ދައުވާގައި ބުނެފައިވެއެވެ.

މި މައްސަލަ ފުލުހުން ތަހުގީގު ކޮށް ދައުވާކުރަން ފޮނުވާފައިވަނީ މިދިޔަ އަހަރުގެ ކުރީ ކޮޅުއެވެ.