ވައިކަރަދޫ މެޖިސްޓްރޭޓް ކޯޓުގެ އައު އިމާރާތުގެ ބިންގާ އަޅައިފި

ވައިކަރަދޫ މެޖިސްޓްރޭޓް ކޯޓުގެ  އައު އިމާރާތުގެ ބިންގާ ދިވެހިރާއްޖޭގެ  އުއްތަމަ ފަނޑިޔާރު އަލްއުސްތާޛު އަޙްމަދު ފާއިޒު ޙުސައިން އަޅުއްވައި ދެއްވައިފި އެވެ.

އިއްޔެ މިކަމަށްޓަކައި އޮތް ޚާއްސަ ރަސްމިއްޔާތުގައި އުއްތަމަ ފަނޑިޔާރު ދެއްކެވި ވާހަކަފުޅުގައި ރަށެއް ކުރިއަރައިގެންދާނީ އެރަށެއްގައި ހިންގާ ޖަރީމާއެއްގެ ޚަބަރު ނޫސްތަކުގެ ފަލަ ސުރުޚީއަށް އަރައިގެން ނޫންކަމަށް ވިދާޅުވިއެވެ. އަދި ބިންގާ އެޅިގެން ދިޔަ އައު އިމާރާތުގެ ސަބަބުން ވައިކަރަދޫގެ ރައްޔިތުންނަށް ފައިދާ ތަކެއް ލިބިގެންދާނެކަމަށް ވިދާޅުވިއެވެ.

އުއްތަމަ ފަނޑިޔާރުގެ އިތުރުން ވައިކަަރަދޫ ކޯޓްގެ މެޖިސްޓްރޭޓަރ މުހައްމަދު ނިޔާޒް ވެސް އިއްޔެގެ ރަސްމިއްޔާތުގައި ވާހަކަފުޅު ދައްކަވާފައިވެއެވެ. މިރަސްމިއްޔާތުގައި އަތޮޅު ކައުންސިލްގެ ރައީސާއި ވައިކަރަދޫ ކައުންސިލްގެ ރައީސާއި، ކުޅުދުއްފުށީ ކޯޓްގެ މެޖިސްޓްރޭޓާއި އަދިވެސް  މިސަރަހައްދުގެ މުއައްސަސާތަކުގެ އިސްވެރިން ވަނީ ބައިވެރިވެފައެވެ.

ވައިކަރަދޫ މެޖިސްޓްރޭޓް ކޯޓްގެ އާއިމާރާތަކީ 2008 ވަނަ އަހަރު އެޅުމަށް ހަމަޖެހިފައި އޮތް އިމާރާތެކެވެ. އެހެން ނަމަވެސް އެކިއެކި ސަބަބު ތަކާހުރެ ކޯޓްގެ އިމާރާތް އެޅުން  ލަސްވެގެންގޮސްފައިވެއެވެ.

10 މަސްދުވަހުން ނިންމުމަށް އަލިހަވާސް ކޮންސްޓްރަކްޝަން އެންޑް ކާޕެންޓްރީ ޕްރައިވެޓް ލިމިޓެޑާ ހަވާލުކޮށްގެން ކުރެވޭ މި އިމާރާތުގެ ޖުމްލަ އަގަކީ 3,867,745.85 ރުފިޔާ އެވެ.

މިހާރު ވައިކަރަދޫ މެޖިސްޓްރޭޓް ކޯޓު ހިންގަމުން އަންނަނީ، ރަށު ކައުންސިލް އިދާރާގެ ޢިމާރާތުގެ އެއް ބައިގައެވެ. އަލަށް އިމާރާތް ކުރެވޭ ކޯޓުގެ މި އިމާރާތަކީ 100 ފޫޓު 100 ފޫޓުގެ އިމާރާތެކެވެ.