ކުޅުދުއްފުށިން ގޯތި ދޫކުރުން ލަސްވާ މައްސަލައިގައި އިހުތިޖާޖެއް ފެށުމަށް ނިންމައިފި

ކުޅުދުއްފުށިން ބަންޑާރަ ގޯތި ހޯދުމަށް އެދި ފޯމް ހުށަހަޅާފައިވާ ފަރާތްތަކުން، މާދަމާ ކުޅުދުއްފުށީ ކައުންސިލް އިދާރާގެ ކުރިމަތީގައި އިހުތިޖާޖެއް ކުރުމަށް ނިންމައިފި އެވެ.

މިކަމުގައި އިސްކޮށްއުޅޭ ފަރާތެއް މިނޫހަށް މަޢުލޫމާތު ދެމުން ބުނީ މިއީ ކުޅުދުއްފުށިން ގޯތި ދޫކުރުން ލަސްވަމުން ދާތީ އާއި ފޯމު ހުށަހަޅާފައިވާ މީހުން ގެ ތެރެއިން ޝަރުތު ހަމަވާ އެންމެނަން ގޯތި ދިނުމަށް ގޮވާލާ ކުރާ އިޙްތިޖާޖެއް ކަމަށެވެ. އަދި އެކަށީގެންވާ ޖަވާބެއް ލިބެންދެން މި އިހްތިޖާޖް ކުރިއަށްގެންދާނެ ކަމަށްވެސް އެފަރާތުން ބުންޏެވެ.

އެފަރާތުން އިތުރަށް ބުނީ އެކި ފަހަރު މަތިން މިކަމާއި ބެހޭގޮތުން މަޝްވަރާކުރަމުންދާ ކަމަށާއި، އެންމެ ފަހުން މަޝްވަރާ ކޮށްފައިވަނީ ހުސްވި ޑިސެމްބަރު މަހުގެ 5 ވަނަ ދުވަހު ކަމަށެވެ. އަދި އެފަހަރު ޑިސެމްބަރ މަހުގެ 25 ގައި ގުރުއަތަށް ދާނެކަމަށް ކައުންސިލުން ބުނެފައިވާ އޭނާ ބުންޏެވެ.

ކުޅުދުއްފުށިން ދޫކުރާ 100 ގޯއްޗަށް އެދި 1025 ފަރާތަކުން 2007 ވަނަ އަހަރު ވަނީ ފޯމު ހުށަހަޅާފައި އެވެ. އޭގެ ފަހުން މިއަދާ ހަމައަށްވެސް ކުޅުދުއްފުށިން ގޯތި ދޫކޮށްފައެއް ނުވެއެވެ.

މި އިހްތިޖާޖް ފެށުމަށް ހަމަޖެހިފައިވަނީ މާދަމާ ހެނދުނު 9 ޖަހާއިރު އެވެ.  މިކަމުގައި ހުރިހާ ސިޔާސީ ޕާޓިތަކެއްގެ މީހުންވެސް އުޅޭކަން ފާހަގަކުރެވެއެވެ.