ފަހުގެ ހަބަރު: ގޯތި ދިނުމުގެ މައްސަލައިގައި ކުޅުދުއްފުށީގައި މުޒާހަރާކުރަން ފަށައިފި

14:45

ގޯތި ދޫކުރުމުގެ މައްސަލައިގައި ކައުންސިލާ މަޝްވަރާކުރާނެ 10 މީހުންގެ ކޮމެޓީއެއް ނެގުމުގެ މަސައްކަތް ދަނީ ކުރަމުން. އެެހެންނަމަވެސް އެކޮމެޓީއަށް އަދި މީހުން އައްޔަންކޮށްފައެއް ނުވެއެވެ. މައުލޫމާތު ލިބިފައިވާ ގޮތުގައި ކައުންސިލް އިދާރާގެ ތެރޭގައި މުޒާހަރާކުރި މީހުންގެ ތެރެއިން އެއް ބަޔަކު ކޮމެޓީ ނެގުމުގެ މަސައްކަތުގައި ދަނީ ހަރަކާތްތެރިވަމުންނެވެ.

ކައުންސިލް އިދާރާގެ ބޭރުގައި މިވަގުތު އެއްވެސް ބަޔަކު ހަރަކާތްތެރިވާ ތަނެއް ނުފެނެއެވެ.

13:15

ގޯތި ދޫކުރުމުގެ މައްސަލައިގައި ހދ އަތޮޅު ކައުންސިލް މެމްބަރ ނަސްރުﷲ އިސްމާއީލް މިއަދު ނެރުއްވާފައިވާ ބަޔާނުގައި ބުނެފައިވަނީ ކުޅުދުއްފުށީގެ ރައްޔިތުންނަށް ބޯހިޔާވަހިކަން ފޯރުކޮށް ދިނުމަކީ ކުޅުދުއްފުށީ ކައުންސިލްގެ އެންމެ އިސްވާޖިބު ކަމުގައި ދެކޭ ކަމަށާއި އެހެން ނަމަވެސް ފެންނަން އޮތް ހަޤީޤތަކީ، ގޯތި ގެދޮރުގެ ހޯދާ ދިނުމުގައި ކުޅުއްފުށީ ކައުންސިލުން އިހުމާލުތަކެއް ވެފައިވާ ކަމަށެވެ.

އެގޮތުން ލާމަރުކަޒީ ގާނޫނުގައި ބުނެފައިވާ ސިޔާސަތުތައް ރަށު ކައުންސިލުން ކަނޑައަޅާފައިނުވާ ކަމަށް ނަސްރުﷲ ވިދާޅުވި އެވެ. އަދި ބިމާ ގުޅޭ ގޮތުން ކައުންސިލުގެ ވިސްނުން އެނގިވަޑައިނުގަންނަވާ ކަމަށް ވެސް ވިދާޅުވި އެވެ.

“މިރަށުގެ (ކުޅުދުއްފުށީގެ) ރައްޔިތުންނަށް ލޮބުވެތި ރައްޔިތުންނަށް، މިރަށަށް ހެދިފައިވާ ލޭންޑް ޔޫސް ޕްލޭނާއި ބޭހޭ ފުރި ހަމަ މަޢުލޫމާތު ލިބެން ޖެހޭނެ ކަމުގައި އަޅުގަނޑު ދެކެވެ. ގޯތި ދެވޭނެ އަދަދާއި، ކަންކަން ހިންގަމުންދާނޭ އުސޫލުތައް ރައްޔިތުންނަށް އަންގައި ދެވެވެން ވާނެއެވެ. އެކަން އެހެން ކުރެވެމުން ނުދާނަމަ، ކޮންމެ ރަށެއްގެ ކޮންމެ ބަޔަކު ތިބި ކައުންސިލެއް ކަމުގައިވީ ނަމަވެސް، އެ ކައުންސިލެއް އެވަނީ ނުހަނު ބޮޑު އިހުމާލަކުން އިހުމާލު ވެފައި ކަމުގައި ނޫނީ ނުވާނެ” ނަސްރުﷲ އިސްމާއީލް މިއަދު ނެރުއްވާފައިވާ ބަޔާނުގައި ވިދާޅުވެފައި ވެއެވެ.

ބަޔާން ނިންމަވާލައްވަމުން، ވީ އެންމެ އަވަހަކަށް ކުޅުދުއްފުށިން ބޯހިޔާވަހި ކަމަށް ބޭނުން ޖެހިފައިވާ ފަރާތް ތަކަށް ގޯތި ދޫކޮށް، ބޯހިޔާވަހިކަން މިހާރުން މިހާރަށް ފޯރުކޮށް ދިނުމަށް ރަށު ކައުންސިލަށް ގޮވާލާފައި ވެއެވެ.

ގޯތި ދޫކުރުމުގެ މައްސަލައިގައި ހދ. އަތޮޅު ކައުންސިލްގެ މެމްބަރު ނަސްރުﷲ އިސްމާޢިލް ވަނީ މިއަދު ބަޔާނެއް ނެރެފައެވެ.

13:00

ރަށު ކައުންސިލުން ބުނެފައިވަނީ ބިން ދެވެން އަންނަނީ އަތޮޅު ކައުންސިލުން ހުއްދަ ދިނުމުން ކަމަށެވެ. އެހެން  ނަމަވެސް ކައުންސިލުން ހުއްދައަށް އެދުނީ މުޒާހަރާގެ ބައިވެރިން އަތޮޅު ކައުންސިލަށް ދިޔުމަށް މިސްރާބު ޖެހުމުންކަމަށް މަޢުލޫމާތު ލިބިއެވެ.  އަދި ހުއްދައަށް އެދުމާއެކު އަތޮޅު ކައުންސިލްގެ ރައީސް ވަނީ ހުއްދަ ދީފައެވެ.  ހުއްދަ ދިން ކަމުގެ ފެކްސް މެސެޖްގެ ކޮޕީއެއް މިނޫހަށްވެސް ވަނީ ލިބިފައެވެ.

12:00

ރަށު ކައުންސިލްގެ އެދުމުގެ މަތިން މުޒާހަރާގެ ބައިވެރިންގެ ތެރެއިން 10 މީހުންގެ ކޮމިޓީއެއް އެކުލަވާލުމުގެ މަސައްކަތް ކުރިއަށް އެބަދޭ.

11:00

މިކަމުގައި ދެން ކުރިއަށްދާންވީ ގޮތެއް ބެލުމަށް މުޒާހަރާގެ ބައިވެރިން އަތޮޅު ކައުންސިލާއި ބައްދަލު ކުރަމުން އެބަދޭ. އަތޮޅު ކައުންސިލް އިދާރާގައި ބާއްވަމުން ދާ މި ބައްދަލު ކުރުމުގައި އަތޮޅު ކައުންސިލްގެ ރައީސާއި ކުޅުދުއްފުށީގެ އުތުރު ދާއިރާ ތަމްސީލުރާ އަތޮޅު ކައުންސިލްގެ މެމްބަރަކުވެސް ބައިވެރިވޭ

10:45

މުޒާހަރާގައި އިސްކޮށްއުޅޭ ފަރާތަކުން މިނޫހަށް މައުލޫމާތު ހިއްސާކުރަމުން ބުނީ އެމީހުން ފްލެޓެއް އަދި ރޯހައުސް އެއް ވެސް ބޭނުން ނުވާކަމަށެވެ. އޭނާ ބުނިގޮތުގައި އެމީހުން ބޭނުންވަނީ ބަންޑާރަ ގޯއްޗެވެ. އަދި  ބޭނުންވަނީ މިއަދުން މިއަދަށް ގޮތެއް ނިންމަން ކަމަށާއި އެމީހުންގެ ވާހަކަ ތަކަށް ކައުންސިލުން އެއްބާރުލުން ދޭކަމަށްވެސް ބުންޏެވެ. އެންމެ ފަހުން ގޯތި ދޫކުރީ 2006 ވަނަ އަހަރުކަން ފާހަގަ ކުރަމުން އެފަރާތުން ބުނީ ކައުންސިލުން އެބުނާ ގަވާއިދެއް އޭރުވެސް އޮތް ކަމަށެވެ.

ކައުންސިލުން މިއަދު ބުނެފައިވަނީ މާކުރިން ހަދާފައިވާ ގަވާއިދެއްގެ ދަށުން ދެވެން އަންނަނީ 100 ގޯތި ކަމަށެވެ. އެހެން ނަމަވެސް މައުލޫމާތު ހިއްސާކުރި ފަރާތުން ބުނީ 1000 ގޯތި ދެވޭހާ ތަންވެސް މިރަށުގައި އެބައޮތް ކަމަށާއި މިއީ ވަކި ޕާޓީއަކަށް ނިސްބަތްވާ ކަމެއްް ކުރާ ކަމެއް ނޫން ކަމަށެވެ. އަދި މިކަން ކުރުމަށް ދާން ޖެހުނު ކޮންމެ ތަނަކަށް ގޮސް އެބަޔަކާ ބައްދަލުކުރުމަށް ތައްޔާރަށް ތިބި ކަމަށްވެސް އެފަރާތުން ބުންޏެވެ.

ކުޅުދުއްފުށިން ގޯތި ދޫކުރުން ލަސްވާކަމަށްބުނެ ރައްޔިތުންގެ ތެރެއިން ބަޔަކު ކައުންސިލް އިދާރާގެ ކުރިމަތީގައި މުޒާހަރާ ކުރަން ފަށައިފި އެވެ.

މިއަދު ހެނދުނު ފެށި މި މުޒާހަރާގައި އަދި މިހާތަނަށް އެއްވެސް ހަމަނުޖެހުމެއް ހިނގާފައެއް ނުވެއެވެ. އެހެންމަވެސް އެ ސަރަހައްދަށް އެއްވެ ތިބި މީހުންނާއި ކައުންސިލަރުންނާ ދެމެދު ހޫނު ބަހުގެ ހަމަލާތަކެއް ބަދަލުކުރެވެމުންދާ ކަމަށް އެސަރަހައްދުގައި ހުރި ކުޅުދުއްފުށި އޮންލައިންގެ ރިޕޯޓަރ މައުލޫމާތު ދެއެވެ.

ކުޅުދުއްފުށީގައި މުޒާހަރާކުރަމުންދާ މީހުން ގޮވަމުންދަނީ 2007 ވަނަ އަހަރު ކުޅުދުއްފުށިން ދޫކުރަން ނިންމި 100 ގޯއްޗަށް އެދި  1000 އަށްވުރެ ގިނަ ފޯމް ހުށަހަޅާފައިވާއިރު އޭގެ ތެރެއިން ޝަރުތު ހަމަވާ އެންމެނަށް ގޯތި ދޫކުރުމަށެވެ.

އެއްވެ ތިބި މީހުްގެ ތެރެއިން ބަޔަކާއި ކައުންސިލްގެ ބައެއް އިސް ބޭފުޅުން ކައުންސިލް އިދާރާގެ ތެރޭގައި ބައްދަލުވުމެއް ވަނީ ބާއްވާފައި އެވެ. އެ ބައްދަލުވުމުގައި ރައްޔިތުންގެ ޝަކުވާތަކަށް ޖަވާބު ދެއްވަމުން ދިޔައީ ކައުންސިލްގެ ނައިބު ރައީސް އެވެ. ބައެއް ފަހަރު ވަރަށް ހޫނުކޮށްދިޔަ މި ބައްދަލުވުމުގައި އެއްވެސް ހަމަނުޖެހުމެއް ހިނގާފައެއް ނުވެއެވެ. އެއްވެ ތިބި މީހުން ބުނަނީ ގޯތި ދިނުމުގެ ކަންތައްތައް ކޮޅެއްގައި ނުޖެހެނީސް އިހުތިޖާޖު ހުއްޓާނުލާނެ ކަމަށެވެ.

ކައުންސިލުގެ ފަރާތުން ބުނަމުން އަންނަނީ މިހާރު އަމަލުކުރެވެމުންދާ ގަވާއިދުން ގޯތި ދޫކުރެވެން ނެތްކަމަށެވެ.

ތަފްސީލް އަންނަނީ