ސައިފް ރަސްގެފާނު ވާހަކަ (11)

.

ޑިސެމްބަރ 29 ވަނަ ދުވަހުގެ ބަޔާ ގުޅޭ

އެއްދުވަހަކު އަޠަމްޠުމް ވަހުސުލް ފުލާހް އަށް ގޮވާލައްވައިފިއެވެ. ވަހުސުލް ފުލާހް އާދޭހޭ ބައްޕާއޭ ވިދާޅުވީމައި އޭނާ ބުންޏެވެ. އޭ ދަރިފުޅާއެވެ. މިހާރު ކަލޭތިޔަވަނީ ހަނގުރާމައިގެ އެންމެހާ ފަންނުތަކުގައި ވަރަށްމަތީ ދަރަޖައަކަށް ގޮސްފައެވެ. އެހެންނަމަވެސް އަދި ކަލެއަށްނޭގޭ އެއްކަމެއް އެބައޮތެވެ. ވަހުސުލް ފުލާހް އެއީ ކޮންކަމެއްތޯ ވިދާޅުވީމާ ބުންޏެވެ. އަހަރެންނާއެކީ ނިކަން އައިސްބަލާށެވެ. އަދި ކުޅިވަރުދެކެން މިތާ ހުންނާށެވެ. ދެން އޭގެ ދެބަފައިން ހިގާގޮސް ނިކަންބިޔަ ގަހެއްގެ ދޮށުގައި ހުއްޓިއްޖެއެވެ. އެގަހަކީ އެބަގީޗާގެ ތެރޭގައިވާ، އެހެން ހުރިހާގަހަކަށްވުރެ ބިޔަކޮށް ވަރުގަދަކޮށް ހެދިފައިވާ ގަހެކެވެ. ގަހުގެ ފަތްތައް އެންމެ ވައްތަރީ ކެޔޮގަހުގެ ފަތާއެވެ. މިގަހުގައި ފޮޅޭ މަލުގެވަސް މާވަހަރުގެ ވަހާއި އެއްފަދައެވެ. އަދި އެގަސްކައިރީގައި އެފާޑުގެ އެނޫން ނުވަގަސް ވެއެވެ. އަދި އެއިން ކޮންމެގަހެއްގައިވެސް ހަލާކުކޮށްލެވިފައިވާ ތައްގަނޑެއް ހުއްޓެވެ. އެތަންތަން ދެކެވަޑައިގެންފައި ވަހުސުލް ފުލާހް ވިދާޅުވިއެވެ. މިގަސްތައް ހަލާކުވެފައިމިވަނީ ކޮންފަދަ ސަބަބަކުން ބާވައޭހީވެއެވެ.

ޒަހަލުގެ ހައްޤުގައި މިއީބުނާ ތެދެކެވެ. މިހުރީ ވިސްނުން ހައިރާންކޮށްލާފަދަ ކަންކަމެވެ. އަޠަމްޠުމް ބުންޏެވެ. އޭ އިއްޒަތްތެރި ދަރިފުޅާއެވެ. އަހަރެން އަހަރެންގެ އަސްމައްޗަށް ސަވާރުވެގެން އައިސް އަތުގައިމިވާ ތަނބުބުރި އެއިން ގަހެއްގައި ޖަހައިފި ކޮންމެފަހަރަކު ގަހުން އެތަންތަން ހަލާކުވެގެން ދަނީއެވެ. މިގޮތުން ޚަރާޤުއްސަޖަރު މިނަމުން އަހަރެން މަޝްހޫރުވެފައި ވެއެވެ. އަހަރެންގެ އަސްލު ނަމަކީ އަޠަމްޠުމް އެވެ. ދެން ވަހުސުލް ފުލާހް ވިދާޅުވިއެވެ. އޭ ބައްޕާއެވެ. ނިކަން ބައްޕާގެހުރި ގަދަފަދަކަން އަޅުގަނޑު ދުށުމައްޓަކައި، އެގަސްތަކާ ކޮންމެވެސް ހަމަލައެއް ދެއްވަ ބައްލަވާށެވެ. ދެން އަޠަމްޠުމް ފުންމައިގެންގޮސް އޭނާގެ ބުރައުން ކުލައިގެ އަހަށް ( ސިންގާއެއްގެ މިސާލުގައި ) ސަވާރުވެއްްޖެއެވެ. އަދި ހަނގުރާމައިގެ ހަތިޔާރުތަކުގެ ތެރެއިން ދަގަނޑު ތަނބުބުރިއެއް ހިފައިގެންއައިސް ގަހާތަންކޮޅެއް ދުރަށް ހުއްޓިހުރެ ވަހުސުލް ފުލާހްއަށް ދަންނަވައެވެ. އަހަރެން ގަހުގައި މިތަނބުބުރިން ޖެހީމާ އެގަހަށްވާގޮތް ދެކެން ހުންނާށެވެ. ދެން އެއްކަލަ ތަނބު ބޯމަތީގައި އަނބުރާލާ، މުޅިހަށިގަނޑުގައި ހުރިބާރު މުލައްދަނޑިޔަށް ލާފައި އެގަހުގައި އެބަ އަޅާވިހެލިއެވެ. ނަމަވެސް ގަހަށް ކުޑަވެސް އަސަރެއް ނުކުރިއެވެ. ދެން ކުއްލިއަކަށް ވަހުސުލް ފުލާހާދިމާއަށް އެނބުރި ގޮވާލިއެވެ. އޭ ދަރިފުޅާއެވެ. އަހަރެންނަށް ހީވަނީ މިހާރު އަހަރެންގެ ނަސީބު ފުރަގަސްދީފިހެންނެވެ. ހަމައެފަދައިން ދަރިފުޅުގެ ނަސީބުގެތަރި އަރަން ފަށައިފިހެންނެވެ. ދެން ވަހުސުލް ފުލާހު ވިދާޅުވިއެވެ. ނިކަން ތިޔަތަނބު އަޅުގަނޑުގެ އަތަށް ދެއްވާފައި ވާގޮތެއް ބައްލަވަން ހުންނަވާށެވެ. ދެން އެމަނިކުފާނު އެތަނބުގައި ހިއްޕަވައި ގަހާ ހަމަލާ ދެއްވައިފިއެވެ. ވަހުސުލް ފުލާހުގެ އެތިފަހަރު ދޫކުރައްވާފައި ބެއްލެވިއިރު ތަނބުހުރީ ގަސްފޫދުއްވާލާފައި ކައިވަތަކަށް އަނެއްފަރާތަށް ނުކުމެފައެވެ. އަދި އަސްމަތީގައި އިންނަވައިގެން ކައިވަތަކަށް ނިކުމެފައިވާ ތަނބުގެ އެބުރީގައި ހިއްޕަވައި އެބަ ލުހެލެއްވިއެވެ. ހަމަ އެބޮނޑީގައި އަނެއްގަހާ ދިމާކުރެއްވިއެވެ. މިގޮތުން އެމަނިކުފާނުގެ ހަމަލާތައް ހުއްޓަވައިލެއްވީ ސާޅީސްތަން އެގަސްތަކުން ފޫދުއްވާ ލެއްވުމަށްފަހުގައެވެ. އޭރު އެއްވެސްކަހަލަ ވަރުބަލިކަމެއް ވަހުސުލް ފުލާހަކަށް ނުލިބެއެވެ. ހުއްރާޤުއްސަބަރު މިތަންދެކެފައި އެމަނިކުފާނު ގޮވައިގެންގޮސް ކުރިން ހަމަލާދެއްވި ގަސްގަހަށްވުރެ ދިހަބައިބޮޑު، ބިޔަ އަދި އެސަރަހައްދުގައިހުރި އެންމެ ވަރުގަދަ ގަސްދައްކަވައިފިއެވެ.

ދެން ސާއަތެއްހާއިރު އަރާމުކުރުމަށްފަހު ވަހުސުލް ފުލާހް އަސްމައްޗަށް ސަވާރުވެ، އެއްކަލަ ތަނބުބުރި ހިއްޕަވައިގެން ވަޑައިގެން، އަޑުގެކޮޅަށް އޭ ޒަހަލްއޭ އަހަރެންނަކީ ވަހުސުލް ފުލާހޭ ގޮވާލައްވައި، ގަހަށް އެތިފަހަރެއް ބޭލުއްވިއެވެ. މިދޫކޮށްލެއްވި ތަނބުބުރި ގަހުގެ އެއްފަރާތުން ވަދެގެންގޮސް އަނެްފަރާތަށް ނުކުމެއްޖެއެވެ.

ހުއްރާޤުއްސަބަރު މިތަން ދެކެފައި ހައިރާންވެ އަންތަރީސް ވެއްޖެއެވެ. އަދި ބޮލުގައިހުރި ތާޖުނަގައި ބިންމައްޗަށް ގުޅަކޮށްޖަހައި މޫނުމަތީން ލޭއޮހޮރެންދެން އަމިއްލައަށް ތަޅައި ގަދައަށް ރުޅިއައިސްގެން ހަޅެލަވައިގަތެވެ. އަދި ގޮވާލިއެވެ. އޭ ޒަހަލެވެ. އަހަރެންގެ ރަށުގައި އަހަރެންގެ ބިމުގައި އަހަރެން މި ތަރުބިއްޔަތުކުރި ދަރިއަކީ ހިޔާނާތްތެރި ހަރާމް ދަރިއެކެވެ. މިގޮތަށް ހަޅޭލަވައިގެންފައި ވަހުސުލް ފުލާހް އާއި ދިމާއަށް ބުންޏެވެ. އަހަރެންގެ އެއްވެސް އެހީއެއް ކަލޭގެމައްޗަކަށް ދެނެއް ނެތެވެ. އަދި އަހަރެން އިތުރަށް ކަލެއަށް ބުނެދޭނޭ އެއްވެސް އެއްޗެއް ވިޔަސް ނެތެވެ. އަދި އެ ގަދަފަދަ ރުޅިން ފުރިގެންވާހާލުގައި މިހެންވެސް ބުންޏެވެ. ކަލޭގެ އަތްމަތީގައި ނޫޙު އަލައިހިއްސަލާމްގެ ދުޢާގެ އަސަރުހިނގުން އެބައޮތެވެ. މިހެން އެކަންވޭތޯބަލަން ކަލޭ ދާނޭތަނަކަށް ދާށެވެ. މިބިމަކީ މިއީ ކަލޭގެ ބިމެއްވެސް ނޫނެވެ. އަދި ކަލޭގެ މައިންބަފައިންގެ ބިމެއްވެސް ނޫނެވެ. އަދި ކީއްހެއްޔެވެ. މިއީ ޒަމާނުއްސުރެ އަހަރެމެންގެ ކާބަފައިންގެފަރާތުން އައިސްފައިވާ އަހަރެމެންގެ ބިމެކެވެ. އޭ ހަރާމް ދަރިޔާއެވެ. އަވަހައް ކަލޭ މިތަނުން އެނބުރި ހިނގައިދާށެވެ. މިގޮތުން ކަންތައް ނުކުރިނަމަ ހަމަ އިސާހިތަކު ތޫނު ހަތިޔާރަކުން ކަލޭގެބޯ ކަނޑައިގަންނަހުށީމެވެ.

އަޠަމްޠުމް ރުޅިއައިސްގެން ވަހުސުލް ފުލާހާދިމާއަށް އެއްޗެތިގޮވައި ޤަތުލު ކުރާނޭ ވާހަކަ ބުނުމުން، އޭނާގެ ކަނޑިން ސަލާމަތް ވުމަށްޓަކައި އަސްމަތިން ފައިބާވަޑައިގެން އަސް ދޫކޮށްލައްވާފައި، ފައިމަގުގައި ޖަންގަލިތަކާ ދިމާއަށް ދުވެވަޑައިގަންނަވަން ފައްޓަވައިފިއެވެ. މިގޮތުގައި ޞަހަރާތަކާއި ހަނަފަސް ބިންތައް، ފަރުބަދަތަކާއި ވާދީތައް ކަޑައްތުކުރައްވަމުން ވަޑައިގަންނަވާއިރު އެމަނިކުފާނުގެ ދެލޯފުޅުން ހޯސްލާފައި ކަރުނަ އޮހޮރެއެވެ. އަދި ކީރިތި ކުރައްވަމުން އެމަނިކުފާނުގެ ނަސީބުފުޅުގެ ދެރަކަމާއިމެދު ހިތާމަ ކުރައްވަމުން ދެވޭ ނުދެވޭތަނެއް އެނގިވަޑައިނުގަންނަވާ ހާލުކޮޅުގައި ދެރޭ ދެދުވާ ވަންދެން ދަތުރު ކުރައްވައިފިއެވެ. މިހާރު ފަރިއްކުޅުއްވަނީ ގަސްގަހުގެ ފަތްޕިލާ ވެއްޔެވެ. ފެންފޮދު ހިއްޕަވަނީ ގަސްގަހުންނާއި އުސްތަންތަނުން އޮހިގެން އަންނަ ފެންތިކިތިއްކެވެ.

މިފަދަ ހާލުކޮޅުގައި ދަތުރު ކުރައްވާތާ ތިންވަނައަށް ވީދުވަހު، ބައްރުގައިވާ ހޮހަޅައެއްގެ ކައިރިއަށް ވަޑައިގެންނެވިއްޖެއެވެ. އެއީ އެދުވަހުގެ ހެނދުނުކޮޅެވެ. އޭރު އެފަދަތަނަކަށް އެމަނިކުފާނު ބޭނުންފުޅުވެފައިވަނީ ނިހާޔަތުގެ ދަރަޖައަކަށެވެ. ދެންހަމަ އެތާނގައި މަޑުކޮށްލެއްވިތަނާ އިންސާނެއްގެ އަޑު އިވިވަޑައިގެންފިއެވެ. ދެން އެމީހާގެ އަތުން ހިތްހަމަޖެހޭފަދަ ގަދަފަދަކަމެއް ހަށިކޮޅަށް ލިބޭނޭ ފަރިއްކޮޅަކަށް އެދިވަޑައިގެން ސަލާމް ޖައްސަވާނީއޭ ހިއްތަވައި އެތަނަށް ވަދެވަޑައިގެންފިއެވެ. އެހިނދު އެމީހެއްގެ ދެލޮލުން ނުބައިފާޑެއްގެ މަންޒަރެއް ދައްކައިގެން ބިރުވެރި ސިފައްގައި އިން އަޖަމީއަކު އެތަނުން ދެކެވަޑައިގަތެވެ. ދެން އެމީހާގެ ކައިރިއަށް ވަޑައިގެން ސަލާމް ކުރުމުގެގޮތުން އިޝާރާތް ކުރެއްވީމާ، އެ އަޖަމީކަލޭގެ އެމަނިކުފާނާ ދިމާއަށް ބަލާލައި އެކަނިވެރިއަކު މިތާހުއްޓައި ފެނިގެން އަހައިފިއެވެ. ތިޔައީ ކޮންތާކުން ކޮންތާކަށްދާ މީހެއްހޭ. ވަހުސުލް ފުލާހް ވިދާޅުވިއެވެ. އަހަންނަކީ ވަޠަނެއްނެތް ބީރައްޓެއްސަކީމުއެވެ. ދުނިޔޭގެތެރެއަށް ގެއްލިގެން ރަށެއް ގެދޮރެއްނެތި ޖަންގަލީގައި މަގުދަންނަ މީހަކާއިނުލައި ދެދުވަސްވަންދެން ދެރޭ ނުދެވޭ ތަނެއްނުއެނގި މިހާތަނަށް އާދެވުނީއެވެ. ދެން ކަލޭގެ އަޑު އިވިގެން މިތަނަށް ވަނީއެވެ. މިހިސާބަށް ވިދާޅުވެފައި އެމަނިކުފާނަށް ކީރިތިފުޅު ކުރެއްވިއްޖެއެވެ.

އެމަނިކުފާނު މިދެންނެވި ވާހަކަފުޅުގެއަޑު އަޖަމީ ކަލޭގެ އަހާފައި ހައިރާންވިއެވެ. އަދި ހިނިތުން ކޮށްލާފައި ބުންޏެވެ. އޭ ދަރިފުޅާއެވެ. އަހަރެންގެ ދީނުގެ ހައްޤަށްޓަކައި ބުނަމެވެ. އަހަރެންގެ ބޭނުން ފުދިއްޖެއެވެ. އަހަރެން މި ހޮހަޅުގައި މަނުކުފާނުގެ އިންތިޒާރުގައި ހުންނަތާ މިހާރު ކިތަންމެ ދުވަހެއް ވެއްޖެއެވެ. ދެން ވަހުސުލް ފުލާހު ހައިރާންކަމާއިއެކު ވިދާޅުވިއެވެ. އަޅުގަނޑުގެ އިންތިޒާރުގައި ސާހިބާ ތިޔަ އިންނެވީ ކީއްވެތޯއެވެ؟ އޭނާ ދެންނެވިއެވެ. އޭ ދަރިފުޅާއެވެ. އަހަރެންގެ ނަމަކީ އަބްދުލް ހަޔިބުއެވެ. އަހަރެން ކިޔެވި ބައެއްފޮތުން އަހަރެންނަށް އެނގިފައިވަނީ މިހޮހަޅުގައި ގަނޑުވަރެއް ވާކަމާއި އެގަނޑުވަރުގެ ޚައްދާމުންނަށް ތިބޭނީ ޖިންނީންކަމެވެ. އަދި އެގަނޑުވަރުގައި ވަރަށް ފައިދާބޮޑު ކަނޑިއެއް ވާނެއެވެ. އެކަނޑިލިބޭނީ މިބިމަށް އަންނަ ގެދޮރުނެތި ޣަރީބުވެފައިވާ ވަހުސުލް ފުލާހު ކިޔާ ކުއްޖަކަށެވެ. ވަހުސުލް ފުލާހު މި އަބްދުލް ހަޔިބު ދެއްކި ވާހަކައާއިމެދު އަޖާއިބުފުޅުވެ އަންތަރީސް ވެވަޑައިގެންހުންނަވާ ވިދާޅުވިއެވެ. ތިޔަ ކަނޑިގެ ފައިދާއަކީ ކޮބައިތޯއެވެ؟ ދެން އޭނާ ދެންނެވިއެވެ. އެއީ ސީމިޔާގެ ޢިލްމުން ހެދިފައިވާ އެއްޗެކެވެ. އަދި އޭގެ ޚަބަރުތައްވެސް އަހަރެން ދަންނަމެވެ. އަހަރެންގެ އަތުގައިވާ ކާބަފައިންގެ ކިބައިން ވާރުތަވެގެން ލިބިފައިހުރި ފޮތްފޮތުން އެނގޭގޮތުގައި އެކަނޑި އުފެއްދީ ވަރަށްބޮޑު ޙަކީމެކެވެ. އެކަނޑިން މީހެއްގެ ގައިގާ ޖަހައިފިނަމަ ހަމަ ވަޤުތުން އެމީހަކު މަރުވެދާނެއެވެ. މިހެންކަމުން އަހަރެންއައިސް މަނިކުފާނުގެ އިންތިޒާރުގައި މިހޮހަޅުގައި އިންނަތާ ކިތަންމެދުވަހެއް ވީފަހުން އަދަކީ ހައްޤު ފާޅުވިދުވަހެވެ. އަހަރެންގެ އަޚުންނާއި އަހުލުވެރީންނަށްވުރެ، އަހަރެންގެ ކައިރީގައި މިއަދު އިއްޒަތްތެރިއަކީ ތިޔައީއެވެ. މިހޮހަޅުގެ ތެރޭގައިވާ ގަނޑުވަރެއްގައި އެކަނޑި އޮންނާނެއެވެ. ދަރިފުޅު އެތެރެއަށް ވަދެ އެކަނޑި ހިފައިގެން އަންނާށެވެ. އެތަނުގެތެރެއިން ފަހަރުގައި މެދުވެރިވެދާނޭ ކޮންމެ ނުރައްކަލެއް އަހަރެން މިތާނގައި ހުރެގެން ހަމަޖައްސާނަމެވެ. އެކަންތައް އެނގޭނޭ ދެވަނަ އެއްވެސްމީހެއް ނުހުންނާނެއެވެ. ދެން ވަހުސުލް ފުލާހު އާއެކޭ ވިދާޅުވެ އެބުނާ ގަނޑުވަރުގެތެރެއަށް ވެދެވަޑައި ގަންނަވައިފިއެވެ. އޭރު އަބްދުލް ހަޔިބު ގަދައަޑުން އިސްމުތައް ކިޔެވުމާއި ފަންޑިތައިގެ އަޒްމަތައް އެންދުމުގައި މަޝްޣޫލުވެގެން އުޅެއެވެ.

ވަހުސުލް ފުލާހު އެގަނޑުވަރަށް ވަޑައިގެން ބެއްލެވިއިރު އެކަނޑިއޮތީ ސާފުރަނުން އަތްކަން އެޅިފައިވާ އެތްދަތުގެ ދާނެއްގެ މަތީގައެވެ. ދެން ވަހުސުލް ފުލާހު ވަޑައިގަންނަވާ އެދާންކޮޅުގެ ކައިރިއަށް ހުއްޓިވަޑައިގަންނަވާ އެކަނޑިކޮޅު ނަންގަވައިފިއެވެ. އެވަގުތު އެމަނިކުފާނުގެ އަރިހަށް ބޮޑުމީހަކު ފަހަތްޕުޅުން އަންނާތީ ފެނިވަޑައިގެންފިއެވެ. އެހިނދު އެމަނިކުފާނު ހީފުޅުކުރެއްވީ މިފަހަރު އެމީހާގެ އަތްދޮށުވެ ހަލާކުވެ ދާނެކަމަށެވެ. ނަމަވެސް ސާބިތުކަމާއިއެކީ ކުރިޔަށް ހިންގަވައި ދޮރުކައިރިއަށް ވަޑައިގެން އަބްދުލް ހަޔިބަށް ވިދާޅުވިއެވެ. ޒަހަލުގެ މަތިވެރިކަމުގެ ހައްޤުގައި ބުނަމެވެ. އަހަރެންގެ ބޭނުން ފުދިއްޖެއެވެ. އަބްދުލް ހަޔިބު ހީލަތުގެގޮތުން ކަނޑި އަތުލައިގަތުމުގެ ބޭނުމުގައި ބުންޏެވެ. އޭދަރިފުޅާއެވެ. އަހަރެންގެ ފުރާނައަށްވުރެ މިއަދުކަލޭ އަހަރެންގެ ކައިރީގައި އިއްޒަތްތެރިކަން ބޮޑެވެ. ތިޔަކަނޑި އަހަރެންގެ އަތަށް ދޭށެވެ. ވަހުސުލް ފުލާހު ވިދާޅުވިއެވެ. އަހަރެން މިތަނުން ސަލާމަތްވެގެން ބޭރަށް ނުކުތީމައި ކަނޑި އަތުލާށެވެ. އަދި އަހަންނަކީ ކަލޭގެ އަޅުންގެތެރެއިން މީހަކު ކަމުގައި ހުންނަހުށީމެވެ. މިހެން ވިދާޅުވިނަމަވެސް އެމަނިކުފާނު ހިތްޕުޅަށް މިހާރު އަރާކަހަލައެވެ. މިކަނޑި އޭނާގެއަތަށް މިހާރު ދީފިނަމަ އެންމެ ފުރަތަމަ މަރާލާނީ އަހަރެންނެވެ. އަހަރެން މިގެނައި ކަނޑިއަކީ ކޮންމެވެސްބޮޑު ރަސްކަލަކު ހައްދަވާފައިވާ އަގުމާތްވެގެންވާ ކަނޑިއެކެވެ. މި އަބްދުލް ހަޔިބަކީ މަކަރުވެރި ހީލަތްތެރި، އަލިފާނަށް އަޅުކަންކުރާ މީހެކެވެ. ދެން މިމަނިކުފާނުގެ އަތްޕުޅު އަބްދުލް ހަޔިބާ ދިމާއަށް ދިއްކޮށްލެއްވުމުން އެއަތްޕުޅުގައި ހިފައިގެން އެމަނިކުފާނު ހޮހަޅުން ބޭރަށް ނެރެފިއެވެ. ހޮހަޅުން ބޭރަށް އެމަނިކުފާނަށް ނުކުމެވަޑައި ގަނެވުމާއެކީ އަބްދުލް ހަޔިބު ދެންނެވިއެވެ. އޭ ދަރިފުޅާއެވެ. ޚަބަރަކީ ކޮބައިތޯއެވެ. ނިކަން އަޅުގަނޑު ބަލައިލަން އެކަނޑި ދައްކަވާ ބައްލަވާށެވެ. ވަހުސުލް ފުލާހު އެވަގުތު އެމަނިކުފާނުގެ އަމިއްލަ ނަފްސުގެމައްޗަށް ބިރުވެތިވެ ވަޑައިގެންވާހާލު ވިދާޅުވިއެވެ. އަހަރެންގެ އަތުން މިކަނޑި އަތުނުލާށެވެ. އަހަރެންނަށް ދާންޖެހޭނީ ފައިމަގުގައި އެކަނި ހިނގާފައެވެ. މިހެން ވިދާޅުވެ ފުރުޞަތުގެ ބޭނުން ކުރައްވައި ކަނޑިން ޖެއްސެވި ޖެއްސެވީނުން އޭނާގެ ބޯ ހަށިގަނޑުން ވަކިކޮށްލައްވައިފިއެވެ.

 

(ނުނިމޭ)

ނޯޓް: ވާހަކައަކީ ހ.ވައިޖެހޭގޭ އަޙުމަދު ރަޝީދު، ސ.ހިތަދޫ އިބްރާހީމް ޝާކިރު، ގ.ކިޔަވާގޭ އަބްދުއްޝުކޫރު: 18 ޑިސެމްބަރ 1966 ގައި ދިވެހިބަހަށް ތަރުޖަމާކޮށް އަތުލިޔުމުން ލިޔެފައިވާ ވާހަކައެކެވެ.