ހަނިމާދޫ އެއަރޕޯޓް އިންޓަނޭޝަނަލް ކުރުމަށްޓަކައި ކުރަންޖެހޭ ބައެއް ކަންކަމުގައި ސިފައިން އެހީތެރިވާން ފަށައިފި

ހަނިމާދޫ އެއަރޕޯޓް އިންޓަނޭޝަނަލް ކުރުމަށްޓަކައި ކުރާ ބައެއް މަސައްކަތްތަކުގައި ސިފައިން އެހީތެރިވާން ފަށައިފި އެވެ.

ހަނިމާދޫ އެއަރޕޯޓް އިންޓަރނޭޝަނަލް ކުރުމުގެ ގޮތުން ހަނިމާދޫގެ އެއަރޕޯޓް ހިމެނޭ ސަރަހައްދުގައި ސިފައިން ކުރަމުންދަނީ މައިގަނޑު ގޮތެއްގައި ފެންސް ޖެހުމުގެ މަސައްކަތްތަކެވެ.

އެގޮތުން އެއަރޕޯޓްގެ ރަންވޭ ވަށާ ފެންސްޖެހުމުގެ މަސައްކަތާއި، ފެންސް ޖަހަންޖެހޭ ސަރަޙައްދުގެ ވަލުތެރޭގެ ގަސްތައްކޮށައި އެ ސަރަޙައްދު ސާފުކޮށް ރަންވޭ އިން ފެށިގެން ކްލިއަރެންސް ބޭނުންވާ 500 މީޓަރު އޭރިއާއެއް ސާފުކޮށް ނިމިފައިވާ ކަމަށް އެންއެންޑީއެފް އިން މައުލޫމާތު ދެއެވެ.

އެމްއެންޑީއެފް އިން މައުލޫމާތު ދޭގޮތުގައި ހަނިމާދޫގެ އެއަރޕޯޓްގެ ރަންވޭގައި 1500 މީޓަރ ދިގުމިނުގެ ބޮޑު ސަރަޙައްދެއްގައި ފެންސް ޖެހުމުގެ މަސައްކަތް ކުރަމުންދާއިރު، ފެންސް ދަގަނޑުތައް ވެލްޑިންގ ކުރުމާއި ފެންސްގެ ބުޑު ހެދުމަށްޓަކައި ދެ ފޫޓްގެ އުސްމިނުގައި 500 މީޓަރުގެ ކޮންކްރީޓް ފާރުބުރިއެއް ރޭނުމުގެ މަސައްކަތް މިހާރު ދަނީ ކުރެވެމުންނެވެ.

އަދި ކުރިއަށް އޮތް ހަފްތާއެއްގެ ތެރޭގައި ކޮންކްރީޓްގެ މަސައްކަތް އެއްކޮށް ނިންމާ، ދާ ޖެހުމުގެ މަސައްކަތް ފެށޭނެ ކަމަށް އެމްއެންޑީއެފް އިން މައުލޫމާތު ދެއެވެ.

އެމްއެންޑީއެފްގެ ނޯދަން އޭރިއާގެ ސިފައިން ކުރަމުން އަންނަ މި މަސައްކަތުގައި އެއަރޕޯޓް ކޮމްޕެނީގެ މުވައްޒަފުންނާއި އަމިއްލަ ކުންފުންޏެއްކަމުގައިވާ އައިލެންޑް އެކްސްޕާޓްގެ އެއްބާރުލުން ލިބެމުންދާ ކަމަށް އެ ފަރާތުން މައުލޫމާތު ދެއެވެ.

މި ނޫހަށް މައުލޫމާތު ލިބިފައިވާ ގޮތުގައި އެއަރޕޯޓް އިންޓަނޭޝަނަލް ކުރުމަށްޓަކައި ކުރަންޖެހޭ މަސައްކަތްތައް ނިންމުމަށް ސަރުކާރުން ކަނޑައަޅާފައިވާ ދުވަހަކީ އަންނަ ފެބްރުއަރީ މަހުގެ 2 ވަނަ ދުވަހެވެ.