ޖީއެސްޓީ ނުދައްކާ ފަރާތްތަކުގެ ލިސްޓުގައި ކުޅުދުއްފުށީގެ އެންމެ ބޮޑެތި ވިޔަފާރިތައް ހިމެނިއްޖެ

މިދިޔަ އަހަރުގެ 2 ވަނަ ކުއާޓަރ އާއި 3 ވަނަ ކުއާޓަރގެ ޖީއެސްޓީ ނުދައްކާ ފަރާތްތަކުގެ ލިސްޓުގައި ކުޅުދުއްފުށީގެ ބޮޑެތި ބައެއް ވިޔަފާރިތައް ހިމެނިއްޖެ އެވެ.

މޯލްޑިވްސް އިންލެންޑް ރެވެނިޔު އޮތޯރިޓީ (މީރާ) އިން އާންމުކޮށްފައިވާ ލިސްޓުގައި ކުޅުދުއްފުށީގެ ތިން ވިޔަފާރިވެރިއްގެ ވިޔަފާރިތައް ހިމަނާފައިވެއެވެ. އޭގެ ތެރޭގައި އާޕޮއިންޓް ކުންފުނީގެ ދަށުން ހިންގަމުން އަންނަ އާޕޮއިންޓް ހާޑްވެއަރ، އާޕޮއިންޓް 2، އާއުއްމީދު ދޯނި، އަދި ފުޅަނގި ދޯނި ހިމަނާފައި ވެއެވެ.

ކުޅުދުއްފުށިން ޖީއެސްޓީ ނުދައްކާ ފަރާތްތަކުގެ ގޮތުގައި ދެން ހިމަނާފައިވާ އެންމެ ބޮޑު އެއް ވިޔަފާރިތަކަކީ، ޖައުފަރު އަލީގެ ނަމުގައި ހިންގަމުން އަންނަ ވިޔަފާރިތަކެވެ. އޭގެ ތެރޭގައި ޖައުފަރު އަލީ ހިންގަމުން އަންނަ ޖޭއޭ ރެންޓަލްސް، އޮއިވާލި ކޮންސްޓްރަކްޝަން، ކާޕެންޓްރީ، ނަލަމައިޒާން، ސުފުރާމަތި، ޖޭއޭ ސްޓޯރ، ބަގުޑި ފިހާރަ، އެދެމާ އަދި ދަރުމަ ހިމެނެއެވެ. މިއިން އެއްވެސް ތަނަކުން މިދިޔަ އަހަރުގެ 2 އަދި 3 ވަނަ ކުއާޓަރގައި ޖީއެސްޓީ ދައްކާފައެއް ނުވެއެވެ.

އޭގެ އިތުރުން ދެން ކުޅުދުއްފުށީގެ ވިޔަފާރިއަކަށް އެ ލިސްޓުގައި ހިމަނާފައިވަނީ ކިނބިމާގެ އަބޫބަކުރު މޫސާގެ ހިތްއުފާ ކެފޭ އެވެ. އެހެންނަމަވެސް އެ ކެފޭއިން ޖީއެސްޓީ ނުދައްކާ އޮތްކަމަށް މީރާގެ ލިސްޓުގައިވަނީ މިދިޔަ އަހަރުގެ ފުރަތަމަ ކުއާޓަރ އާއި 3 ވަނަ ކުއާޓަރގައި އެވެ.

މީރާއިން ކުރިން ބުނެފައިވަނީ، ޖީ.އެސް.ޓީ ނުދައްކާ ފަރާތްތަކުގެ މަޢުލޫމާތު ހާމަކުރުމުގެ ކުރިން އެފަރާތްތަކަށް އެތަކެއް ފަހަރަކު ފޯނުން ގުޅާ، ޓެކްސް ނުދައްކާ ފަރާތްތަކަށް ޤާނޫނުގައި ކަނޑައެޅިފައިވާ އަދަބުތައް ކިޔައި ދެވިފައިވާ ކަމަށެވެ. އަދި އޭގެ އިތުރުން އީމެއިލް، އެސް.އެމް.އެސް އަދި އަތޮޅު ކައުންސިލްތައް މެދުވެރިކޮށްވެސް އެފަރާތްތަކަށް އެންގުމުގެ މަސައްކަތްކުރެވުނު ކަމަށެވެ.