ރޭސިންގ އެސޯސިއޭޝަންގެ ޕިސްޓަންކަޕްގައި ކުޅުދުއްފުށީގެ ޒުވާނެއް ބައިވެރިވަނީ

މޯލްޑިވްސް މޮޓޯ ރޭސިންގ އެސޯސިއޭޝަނުން ބާއްވާ ޕިސްޓަންކަޕް 2013 ގައި ކުޅުދުއްފުށީގެ ޒުވާނެއް ބައިވެރިވާނެއެވެ.

ރޭސިންގ އެސޯސިއޭޝަނުން އިންތިޒާމްކުރާ މިއަހަރުގެ ޕިސްޓަންކަޕްގައި ކުޅުދުއްފުށިން ބައިވެރިވަނީ  ކުޅުދުއްފުށީ ނަޖަފް، އިބްރާހިމް އަލީ، 18 އެވެ.

މިމުބާރާތުގެ މެނޭޖިންގ ޓީމުގެ މެމްބަރެއް ކަމަށްވާ އިސްމާއިލް އަގްލީމް މިނޫހަށް މައުލޫމާތު ދެމުން ބުނީ މިއީ  ސައިކަލު އަދި ކާރު ރޭސް ޖަހާ ޒުވާނުން ހުނަރު ދައްކާލާ، ރާއްޖެއިން ބޭރުގެ މުބާރާތްތަކަށް އަހުލުވެރިކުރުމަށް ބޭއްވޭ މުބާރާތެއް ކަމަށެވެ.  ސައިކަލުތަކުގެ ކެޕޭސިޓީއަށް ބަލާ ވަނަ ހޮވޭ މި މުބާރާތުގައި ގާތްގަނޑަކަށް 90 ރޭސަރުން ބައިވެރިވާކަމަށްވެސް އަގްލީމް ބުންޏެވެ.

މިމަހުގެ 25 އަދި 26 ގައި  އޮންނަ މި މުބާރާތުގައި ސައިކަލުގެ 10 އިވެންޓް ކުރިއަށްދާނެއެވެ. އަދިކާރު ރޭހުގެ 4 އިވެންޓް ކުރިއަށްދާނެއެވެ. 25 ވަނަ ދުވަހު ކޮލިފިކޭޝަންގެ ރައުންޑްތައް ބޭއްވުމަށް ހަމަޖެހިފައި ވާއިރު ރޭސް އޮންނާނީ 26 ވަނަ ދުވަހު ކަމަށް ރޭސިންގ އެސޯސިއޭޝަނުން މަޢުލޫމާތު ދެއެވެ.

މިއީ ރޭސިންގ އެސޯސިއޭޝަނުން އިންތިޒާމު ކޮށްގެން ބާއްވާ 5 ވަނަ މުބާރާތެވެ.