ކުޅުދުއްފުށީގައި މިރޭ ދެ ސައިކަލެއް ޖެހި އެކްސިޑެންޓު ވެއްޖެ

ކުޅުދުއްފުށީ އަމީނީމަގުގައި ދެ ސައިކަލް ޖެހި އެކްސިޑެންޓެއް ވެއްޖެއެވެ.

މިރޭ ގާތްގަނޑަކަށް 8:50 ހާއިރު މި އެކްސިޑެންޓް ހިނގީ، އަމީނީމަގުގައި ދެކުނުން އުތުރަށް ދުއްވާފައިދިޔަ ސައިކަލަކާއި އުތުރުން ދެކުނަށް ދުއްވާފައި ދިޔަ ސައިކަލެއް ޖެހިގެންނެވެ. މިރޭގެ އެކްސިޑެންޓްގައި މަގުގެ ގަވައިދު ފަޅިން ދުއްވާފައިދިޔަ ކުޅުދުއްފުށީ ޖުޕިޓަރ އަލީ ފިރާޤުގެ ލޯމައްޗަށްށާއި ލޮލުގެ ތިރިން މޫނުމައްޗަށް ގެއްލުންތަކެއް ލިބިފައި ވެއެވެ.

އަމީނީމަގުގައި އެކްސިޑެންޓްވި ސަރަހައްދަކީ “ރޯޑް ޑިވައިޑާރ” ބޭނުންކޮށްގެން މަގުގެ ދެ ފަޅި ވަކިކޮށްފައިވާ ހިސާބެކެވެ.

މި އެކްސިޑެންޓުގައި މަގުގެ ނުގަވައިދު ފަޅިން ދުއްވާފައި ދިޔަ ކުޅުދުއްފުށީ ޒޭވަރު އަބްދުލްގާދިރުގެ އިނގިލަތަށް މަށައިގެން ދިއުން ފިޔަވައި މާބޮޑު އަނިޔާތަކެއް ލިބިފައެއް ނުވެއެވެ.

އަމީނީމަގު ރިއޯގެ ކައިރީގައި ހިނގި މިއެކްސިޑެންޓްގައި ބޮޑަށް އަނިޔާވި އަލީ ފިރާގަށް ކުޅުދުއްފުށީ ރީޖަނަލް ހޮސްޕިޓަލުގައި އެޑްމިޓްކޮށްގެން އަންނަނީ ފަރުވާ ހޯދަމުންނެވެ.

މި އެކްސިޑެންޓާއި ގުޅިގެން ފުލުހުންގެ މީޑިޔާއިން މިރޭ އިތުރު މައުލޫމާތެއް ލިބޭގޮތްވަނީ ނުވެފައި އެވެ.