ދެ ސައިކަލެއް ޖެހި ހިނގި އެކްސިޑެންޓުގައި އެތަނުން އެއް ސައިކަލު ދުއްވަން އިނީ ގޭބަންދަށް ހުކުމްކޮށްފައި ހުރި މީހެއް

ކުޅުދުއްފުށީ އަމީނީމަގުގައި ދެ ސައިކަލެއް ޖެހި މިރޭ ހިނގި އެކްސިޑެންޓްގައި އެތަނުން އެއް ސައިކަލު ދުއްވަން އިން މީހަކީ ކޯޓުގެ ހުކުމަކުން ގޭބަންދުކޮށްފައި ހުރި މީހެއްކަމަށް ފުލުހުން ބުނެފި އެވެ.

ފުލުހުން ބުނީ މިރޭ ކުޅުދުއްފުށީގައި ހިނގި އެކްސިޑެންޓުގައި، ގޭބަންދުކޮށްފައި ހުރި މީހަކު ޤަވާޢިދާ ޚިލާފަށް ބަންދުން އަމިއްލައަށް ވީއްލި މަގުމަތީގައި ސައިކަލު ދުއްވަނިކޮށް އޭނާ ދުއްވި ސައިކަލުން ޖެހި ފުލުހަކަށް އަނިޔާވެފައިވާ ކަމަށެވެ.

މިރޭ ގާތްގަނޑަކަށް 8:50 ހާއިރު މި އެކްސިޑެންޓް ހިނގީ، އަމީނީމަގުގައި ދެކުނުން އުތުރަށް ދުއްވާފައިދިޔަ ސައިކަލަކާއި އުތުރުން ދެކުނަށް ދުއްވާފައި ދިޔަ ސައިކަލެއް ޖެހިގެންނެވެ. މިރޭގެ އެކްސިޑެންޓްގައި މަގުގެ ގަވައިދު ފަޅިން ދުއްވާފައިދިޔަ ކުޅުދުއްފުށީ ޖުޕިޓަރ އަލީ ފިރާޤުގެ ލޯމައްޗަށްށާއި ލޮލުގެ ތިރިން މޫނުމައްޗަށް ގެއްލުންތަކެއް ލިބިފައި ވެއެވެ. އޭނާ އަކީ ކުޅުދުއްފުށީ ޕޮލިސް ސްޓޭޝަނުގައި މަސައްކަތްކުރާ ފުލުހެކެވެ.

އަމީނީމަގުގައި އެކްސިޑެންޓްވި ސަރަހައްދަކީ “ރޯޑް ޑިވައިޑާރ” ބޭނުންކޮށްގެން މަގުގެ ދެ ފަޅި ވަކިކޮށްފައިވާ ހިސާބެކެވެ.

މި އެކްސިޑެންޓުގައި މަގުގެ ނުގަވައިދު ފަޅިން ދުއްވާފައި ދިޔަ ކުޅުދުއްފުށީ ޒޭވަރު އަބްދުލްގާދިރުގެ އިނގިލަތަށް މަށައިގެން ދިއުން ފިޔަވައި މާބޮޑު އަނިޔާތަކެއް ލިބިފައެއް ނުވެއެވެ.

އަމީނީމަގު “ރިއޯ”ގެ ކައިރީގައި ހިނގި މިއެކްސިޑެންޓްގައި ބޮޑަށް އަނިޔާވި އަލީ ފިރާގަށް ކުޅުދުއްފުށީ ރީޖަނަލް ހޮސްޕިޓަލުގައި އެޑްމިޓްކޮށްގެން އަންނަނީ ފަރުވާ ހޯދަމުންނެވެ.

ފުލުހުން ބުނީ މިހާރު މިމައްސަލަ ތަހުގީގު ކުރަމުން އަންނަކަމަށެވެ.