ކައުންސިލަށް ލިބުނު ބަޖެޓުގައި ޕްރީ ސްކޫލުތަކުގެ ޓީޗަރުންގެ މުސާރަ ހިމަނާފައެއް ނެތް: ކުޅުދުއްފުށި ކައުންސިލުގެ ރައީސް

ކުޅުދުއްފުށީ ކައުންސިލަށް މި އަހަރަށް ލިބުނު ބަޖެޓުގައި، ކުޅުދުއްފުށީގެ ޕްރީ ސްކޫލުތަކުގެ ޓީޗަރުންގެ މުސާރައަށްވާ ފައިސާ ހިމަނާފައި ނެތްކަމަށް ކައުންސިލުގެ ރައީސް އިބްރާހީމް ރަމީޒް ވިދާޅުވެއްޖެ އެވެ.

ރަމީޒް މިހެން ވިދާޅުވެފައިވަނީ ރޭ ކުޅުދުއްފުށީ އަމީރު އަމީން ސްކޫލުގެ ބެލެނިވެރިންނަށް އެ ސްކޫލުގެ ފަރާތުން ބޭއްވި ބައްދަލުވުމެއް ޝަރަފުވެރިކުރައްވާ ދެއްކެވި ވާހަކަފުޅުގަ އެވެ. ރަމީޒް ވިދާޅުވީ ސްކޫލުގެ  ކިޔެވުން މިއަހަރު ފެށެނީ ވަރަށް ގިނަ ގޮންޖެހުންތަކާއެކު ކަމަށާއި އެހެންކަމުން ބެލެނިވެރިންގެ އެއްބާރުލުން ވަރަށް ބޮޑަށް ބޭނުންވާ ކަމަށެވެ. އަދި ސްކޫލުން ހުޅުވާލާ ފުރުޞަތުތަކުގެ ބޭނުން ބެލެނިވެރިން ހިފުމަށް ނަސޭހަތްތެރި ވެލެއްވި އެވެ.

ކުޅުދުއްފުށި އޮންލައިނަށް އެނގިފައިވާ ގޮތުގައި ކައުންސިލުން މިއަހަރަށް ތައްޔާރުކޮށް ފިނޭންސަށް ފޮނުވި ބަޖެޓުގައި ޕްރީ ސްކޫލުގެ ޓީޗަރުންގެ މުސާރަ ހިމަނާފައި ވީނަމަވެސް މަޖިލީހުން ފާސްވެގެން އައި ބަޖެޓުގައި އެ ބައި ހިމަނާފައެއް ނުވެއެވެ.

ރޭގެ ބައްދަލުވުމުގައި އެ ސްކޫލުގެ އެޑްމިނިސްޓްރޭޓަރ އާއިޝަތު މުހައްމަދު ވަނީ މި އަހަރު ސްކޫލުން ކުރަން ނިންމާފައިވާ ކަންތައްތަކުގެ މައްޗަށް އަލިއަޅުވާލާ ވާހަކަދައްކަވާފައި އެވެ. އަދި ސްކޫލުގެ ޓާގެޓްތައް ވިދާޅުވެދެއްވާ ބެލެނިވެރިންގެ ފަރާތުން ލިބޭ އެއްބާރުލުން ފާހަގަކޮށް ޝުކުރުއަދާކޮށްފައިވެއެވެ. މީގެ އިތުރުން އެސްކޫލުގެ ޓީޗަރ ސާދުނާ އިބްރާހިމް ވަނީ ދަރިވަރުންނާއި ބެލެނިވެރިންގެ ކިބައިން ފެންނަ ނޭދެވޭ ކަންތައްތައް ފާހަގަކޮށް އެކަންތައްތައް ރަނގަޅުކުރުމަށް ނަސޭހަތްތެރިވެފަ އެވެ.

ގަޑިއެއްހާއިރަށް ދިގު ދެމިގެން ދިޔަ މިބައްދަލުވުމުގައި ސްކޫލުގެ ގިނަ އަދަދެއްގެ ބެލެނިވެރިން ވަނީ ބައިވެރިވެފަ އެވެ.