ހަނިމާދޫ ސަޢާދާ ޕްރީ ސްކޫލު ބަދަލުތަކާއެކު ދިރާސީ އާއަހަރަށް ކުރިމަތިލާއިރު ދަތިތައްވެސް ގިނަ

ދިރާސީ އަހަރަށް ކުރިމަތިލާއިރު ހަނިމާދޫ ސަޢާދާ ޕްރީ ސްކޫލަށް ވެސް ގިނަ ދަތި ތަކެއް ކުރިމަތިވެފައިވާ ކަަމަށް އެސްކޫލް ހިންގުމާ ހަވާލުވެހުންނެވި ހަނިމާދޫ ޒުވާނުންގެ ޖަމިއްޔާގެ ރައީސް އިބްރާހިމް ޚަލީލް ވިދާޅުވެއްޖެ އެވެ.

ކުޅުދުއްފުށީ އޮންލައިނުން ކުރި ސުވާލަކަށް ޖަވާބު ދެއްވަމުން ޚަލީލް ވިދާޅުވީ މުވައްޒަފުން ނެތުމުގެ ދަތިކަން ވަރަށް ބޮޑަށް އިހްސާސް ކުރެވޭ ކަމަށެވެ. ސްކޫލުގައި ތިބީ 4 ޓީޗަރުންކަން ފާހަގަ ކުރައްވަމުން ޚަލީލް ވިދާޅުވީ އިދާރީ މަސައްކަތްތައް ކުރާނެ އޮފީސް މުވައްޒަފެއް ނެތުމުން ވަރަށް ގިނަ އުނދަގޫތަކާއި ކުރިމަތިވާ ކަމަށެވެ. އެހެން ނަމަވެސް މިއަހަރު މަސައްކަތު މީހެއް ސްކޫލުގައި މަސައްކަތް ކުރާނެކަމަށް ޚަލީލް ވިދާޅުވި އެވެ.

“4 ޓީޗަރުން ސްކޫލުގަ ކިޔަވައިދޭނީ. އޮފީސް މުވައްޒަފެއް ނެތީމަ އިދާރީ މަސައްކަތްތައް ކުރަން ޖެހެނީ ޓީޗަރުންނަށް. ބައެއް ފަހަރު އެބަޖެހޭ އަޅުގަނޑުމެން ޖަމިއްޔާގެ މެމްބަރުންނަށް ވެސް ކުރަން.” ޚަލީލް ވިދާޅުވިއެވެ.

ޚަލީލް ވިދާޅުވީ ހަނިމާދޫ ކައުންސިލްގެ އެހީއާއެކު ޒުވާނުންގެ ޖަމިއްޔާ ގުޅިގެން ސްކޫލުގައި އިމާރާތް ކޮށްފައިވާ އައު އިމާރާތުގެ ތިރީ ބައިގެ ބޭނުން ވެސް މިއަހަރު ކުރަމުން ދާނެ ކަމަށެވެ. އަދި މިދިޔަ އަހަރު ތަކުގައި ދަރިވަރުންގެ އަތުން 50 ރުފިޔާގެ ފީއެއް ނެގި ނަމަވެސް އެޑިޔުކޭޝަން މިނިސްޓްރީގެ ހުއްދަ ލިބިގެން ފީ 100 ރުފިޔާއަށް ބޮޑުކޮށްފައިވާ ކަމަށްވެސް ޚަލީލް ވިދާޅުވިއެވެ.

ދިރާސީ އާއަހަރަށް ތައްޔާރު ވުމުގެ ގޮތުން ހަނިމާދޫ ޒުވާނުންގެ ޖަމިއްޔާ އިން ވަނީ މިދިޔަ ހަފްތާގެ ތެރޭގައި ސްކޫލުގައި ގިނަ މަސައްކަތްތަކެއް ކޮށްފައެވެ. އެގޮތުން ފެން އިސްކުރުބަރިއެއް ހެދުމުގެ އިތުރުން ކްލާސް ރޫމުތަކުގައި ކުލަލުމާއި ކުރެހުންތައް ކުރެހެން ކުރިއަށް ގެންގޮސްފައި ވެއެވެ.

ސަޢާދާ ޕްރީ ސްކޫލުގައި މިދިޔަ އަހަރު 125 ދަރިވަރުން ތައުލީމް ހާސިލްކުރި ނަމަވެސް މިއަހަރު އެއަދަދު ވަނީ 140 ށް އިތުރު ވެފައެވެ. މި ސްކޫލަކީ 2001 ވަނަ އަހަރުން ފެށިގެން ހަނިމާދޫގެ ޒުވާނުންގެ ޖަމިއްޔާއިން އެރަށުގައި ހިންގަމުން އަންނަ ޕްރީ ސްކޫލެކެވެ.