2479 ދަރިވަރުންނާއެކު ދިރާސީ އައު އަހަރުގެ ކިޔެވުން ފެށިއްޖެ

ކުޅުދުއްފުށީގެ 5 ސްކޫލު ގައި ޖުމްލަ 2479 ދަރިވަރުންނާއެކު ދިރާސީ އައު އަހަރުގެ ކިޔެވުން ފެށިއްޖެ އެވެ.

މިއަދު ދިރާސީ އަހަރުގެ ކިޔެވުން ފެށުނުއިރު ކުޅުދުއްފުށީގެ 2 ޕްރީ ސްކޫލަށް ވަނީ ޖާގައިގެ ދަތިކަމާއި ބަޖެޓްގެ ދަތިކަން ކުރިމަތި ވެފައެވެ. ކުޅުދުއްފުށީގެ އެންމެ ދުވަސްވީ އެއް ސްކޫލު ކަމަށްވާ އަމީރު އަމީން ސްކޫލުގައި މިއަހަރު 497 ދަރިވަރުން އައު ދިދައެއްގެ ދަށުން ތައުލީމް ހާސިލްކުރާނެކަމަށް އެސްކޫލުން މައުލޫމާތު ދެއްވައެވެ. 5 ކްލާސްރޫމްގެ މައްޗަށް އެކުލެވޭ މި ސްކޫލަކީ އެޑިއުކޭޝަން މިނިސްޓްރީގެ އައު މުޤައްރަރު ތަންފީޒު ކުރަމުންދާ ސްކޫލެއްވެސް މެއެވެ.

މިގޮތުން 319 ދަރިވަރުން ތައުލީމް ހާސިލްކުރަމުންދާ އިރުމަތި އަވަށު ޕްރީސްކޫލުގައި 3 ކްލާސް ރޫމުގައި ކިޔަވައިދޭނެއެވެ. 5 ސެޝަނަށް ކުރިއަށްގެންދާ މި ސްކޫލުގައި އިތުރު 3 ކްލާސް ރޫމު އެޅުމުގެ މަސައްކަތް މިހާރު ދަނީ ކުރިއަށެވެ. އޮފީސް މުވައްޒަފުންނާއި ޓީޗަރުންގެ އެއްވެސް ދަތިކަމެއް އެސްކޫލުގައި ނެތްކަމަށް އެސްކޫލުން މަޢުލޫމާތު ދެއެވެ.

އަމީރު އަމީންގެ އިތުރުން ދެން އާ މުޤައްރަރު ތަންފީޒުކުރާ ކުޅުދުއްފުށީގެ އަނެއް ސްކޫލަކީ އަފީފުއްދީން ސްކޫލެވެ. މިއަދު ސްކޫލުގެ ކިޔެވުން ނުފެށޭނެކަމަށް ކުރިން ރަށު ތެރޭގައި އަޑު ފެތުރިފައި ވީނަމަވެސް އެހެން ސްކޫލު ތަކެކޭ އެއްފަދައިން އަފީފުއްދީން ސްކޫލުގައިވެސް ވަނީ ކިޔެވުން ފަށާފައެވެ. ބައޮލޮޖީ އަދި ކޮމްޕިއުޓަރ ޓީޗަރެއްގެ އިތުރުން ޕްރައިމަރީގެ ގްރޭޑް ތަކަށް ޓީޗަރުން ލިބުމުގައިވެސް އެސްކޫލަށް ވަނީ ގޮންޖެހުން ތަކަކާއި ކުރިމަތި ލާންޖެހިފައެވެ. އެހެން ނަމަވެސް މިއަހަރަކީ އަފީފުއްދީންގެ ދަރިވަރުން އަލަށް އޯލެވެލް އިމްތިހާނުގައި އިށީންނާނެ އަހަރުވެސް މެއެވެ. ދިމާވި އެކިއެކި ސަބަބުތަކާހުރެ އެއްދަންފަޅިއަށް ބަދަލު ނުވިނަމަވެސް މިއަހަރު ފެށޭއިރު 15 ކުލާހުގައި އެސްކޫލުގެ 495 ދަރިވަރުން ތައުލީމް ހާސިލްކުރާނެއެވެ.

މިއަހަރުގެ ކިޔެވުން ފެށުނު އިރު އެއްމެ ބޮޑު ބަދަލެއް އައިސްފައިވަނީ ދަރިވަރުންގެ އެންމެ އާބާދީ ބޮޑު ހދ އަތޮޅު ތައުލީމީ މަރުކަޒަށެވެ. ވަށާ ޖެހޭ ތައުލީމުގެ ދަށުން މިއަހަރު އެއް ދަންފަޅިއަށް ބަދަލުކޮށްފައިވާ އޭއީސީއަކީ އަހަރު ފެށެންވާއިރަށް ފުރިހަމަވާންޖެހޭ ގިނަ ކަންކަން ފުރިހަމަވެފައިވާ ސްކޫލެއް ކަމަށް ސްކޫލުގެ ޕްރިންސިޕަލް ޒިޔާދު ރަޝާދު ވަނީ މީގެ ކުރިން ވިދާޅުވެފައެވެ. މިސްކޫލުގައި މިއަހަރުން ފެށިގެން ގްރޭޑް 4 އިން މަތީގެ ދަރިވަރުންނަށް ޔުނީފޯމާއެކު ބުރުގާ ވަނީ މަޖުބޫރުކޮށްފައެވެ. 26 ކްލާސް ރޫމުގެ މައްޗަށް އެކުލެވޭ މި ސްކޫލުގައި މިއަހަރު 704 ދަރިވަރުން ތައުލީމް ހާސިލްކުރާނެއެވެ.

ޖަލާލުއްދީން ސްކޫލު ދިރާސި އައު އަހަރާ ކުރިމަތި ލީއިރު ޕްރިންސިޕަލެއް ހަމަޖެހިފައެއް އަދި ނުވެއެވެ. ޑެޕިއުޓީ ޕްރިންސިޕަލްގެ ބެލުމުގެ ދަށުން މިއަހަރު 463 ދަރިވަރުން ތައުލީމް ހާސިލްކުރާ މިސްކޫލަށް 2 ޓީޗަރުން ފިޔަވާ ހުރިހާ ޓީޗަރުން ހަމަވެފައިވާ ކަމަށް އެސްކޫލުން މައުލޫމާތު ދެއްވައެވެ. ސްކޫލުގެ ދަރިވަރުންގެ ނަތީޖާ އެއްއަހަރުން އަނެއް އަހަރަށް ރަނގަޅުވަމުން އަންނައިރު ގައުމީ ގަދަ ދިހައިގައި ހިމެނޭ އެސްކޫލުގެ ދަރިވަރުންގެ އަދަދުވެސް އަންނަނީ އިތުރުވަމުން ނެވެ. މިދިޔަ އަހަރު އެއްދަންފަޅިއަށް ބަދަލުވެފައިވާ ޖަލާލުއްދީން ސްކޫލަކީ އުތުރުގައި ހުރި ސާނަވީ އަދި މަތީ ސާނަވީ ތައުލީމު ފޯރުކޮށްދޭ އެންމެ ފެންވަރު ރަނގަޅު ސްކޫލެވެ.

ކުޅުދުއްފުށީގެ 5 ސްކޫލުގެވެސް މިއަހަރުގެ އަމާޒަކީ ވޭތުވެދިޔަ އަހަރަށްވުރެ ހުރިހާ ގޮތަކުން ކާމިޔާބު އަހަރަކަށް މިއަހަރު ހެދުމެވެ. މިކަމަކީ ހަމައެކަނި މުދައްރިސުން ނުވަތަ ސްކޫލުގެ އެހެނިހެން މުއައްޒަފުންގެ ޒިންމާގެ ދަށުގައި އޮންނަ ކަމެއް ނޫނެވެ. މިއީ ދަރިވަރާއި އެދަރިވަރުގެ ބެލެނިވެރިޔާ ވެސް އޭގައި ޝާމިލްވާކަމެކެވެ. ގޮންޖެހުންތަކެއް ހުރި ނަމަވެސް އެންމެން އެއް ރޫޚެއްގައި މަސައްކަތް ކޮށް މިފެށުނު ދިރާސީ އަހަރަކީ ފޮނި މޭވާ ލިބޭނެ އަހަރަކަށް ހެދުމަކީ އުނދަގޫ ކަމެއް ނޫނެވެ.