ގޯތި ދޫކުރުމުގެ މައްސަލައިގައި އިހުތިޖާޖުކުރި ދުވަހު ރައްޔިތުންނަށް އޮޅޭގޮތަށް މައުލޫމާތު ދެމުން ދިޔަ ބައެއްގެ މައްސަލަ ފުލުހުން ބަލަން ފަށައިފި

ގޯތި ދޫކުރުމުގެ މައްސަލައިގައި  މިމަހުގެ 6 ވަނަ ދުވަހު ކުރި އިހްތިޖާޖަށް މީހުން ގެނައުމަށްޓަކައި، ރައްޔިތުންނަށް ހަގީގަތް އޮޅޭގޮތަށް އަޑުގަދަކުރާއިން ގޮވި މައްސަލަ ކުޅުދުއްފުށީ ޕޮލިސް ސްޓޭޝަނުން ބަލަން ފަށައިފި އެވެ.

ފުލުހުންގެ ތަރުޖަމާނު ވިދާޅުވީ މިމަހުގެ 6 ވަނަ ދުވަހު ކުޅުދުއްފުށީގައި ކުރިއަށްދިޔަ އިހުތިޖާޖަށް މީހުން ގެނައުމަށްޓަކައި، ރައްޔިތުންނަށް ހަގީގަތް އޮޅޭގޮތަށް މައުލޫމާތު ފަތުރަމުން ދިޔަ ބައެއްގެ މައްސަލައެއް އާންމު ފަރާތަކުން ހުށަހެޅުމާ ގުޅިގެން، ބައެއް މީހުން ހާޒިރުކޮށް ސުވާލުކޮށްފައިވާ ކަމަށެވެ. އަދި އެއީ ކިހިނެތް ހިނގާފައިވާ ކަމެއްތޯ ބަލަމުން އަންނަކަމަށް ފުލުހުންގެ ތަރުޖަމާނު ވިދާޅުވި އެވެ.

ތަރުޖަމާނު ވިދާޅުވީ  މިމައްސަލައާ ގުޅިގެން އެއްވެސް މީހަކު ހައްޔަރުކޮށްފައިނުވާނެ ކަމަށާއި، ފުލުހުންނަށް މައްސަލައެއް ހުށަހަޅާފައިވާތީ އެކަން ސާފުކުރުމަށް ބައެއް މީހުން ހާޒިރުކޮށް މައުލޫމާތު އޮޅުންފިލުވާފައިވާ ކަމަށެވެ.

ގޯތީގެ މައްސަލައިގައި އެ ދުވަހު އިހުތިޖާޖުކުރި ފަރާތްތަކުން އަޑުގަދަ ކުރާއިން ގޮވާފައިވަނީ ގޯތި ހޯދުމަށް ފޯމު ހުށަހަޅާފައިވާ ފަރާތްތައް ރަށު ކައުންސިލް އިދާރާއަށް އައުމަށެވެ. އެގޮތަށް ގޮވުމުގެ ސަބަބުން ބައެއް ރައްޔިތުންނަށް އޮޅުން އަރާފައިވެއެވެ. އަދި ފަހުން، އެއީ ކައުންސިލުގެ އެނައުންސްމަންޓެއް ނޫންކަމަށް ކައުންސިލުގެ އަޑުގަދަ ކުރާއިން ވަނީ ގޮވާފަ އެވެ.

ކުޅުދުއްފުށީ ކައުންސިލުގެ ރައީސް އިބްރާހީމް ރަމީޒް ވިދާޅުވީ އެކައުންސިލުން މިމައްސަލަ ފުލުހުންނަށް ހުށަހަޅާފައި ނުވާނެ ކަމަށެވެ.

ގޯތި ދޫކުރުން ލަސްވާކަމަށްބުނެ މިމަހުގެ 6 ވަނަ ދުވަހު ކައުންސިލް އިދާރާ ކުރިމަތީގައި ވަނީ ރައްޔިތުންގެ ބަޔަކު އިހުތިޖާޖް ކޮށްފައެވެ. އިހުތިޖާޖު ކުރި މީހުންނާ ކައުންސިލުން ބައްދަލު ކުރުމަށްފަހު، ގޯއްޗަށް އެދި ހުށަހަޅާފައިވާ ފޯމުތައް އިވޭލުއޭޓް ކުރުމުގެ މަސައްކަތް ކައުންސިލުން ކުރިއަށްގެންދާއިރު އެކަން އޮބްޒާވްކުރުމަށް 10 މެމްބަރުންގެ ކޮމިޓީއެއް ވަނީ ނަގާފައެވެ.