ބޮޑުބެރުގެ ރަސްގެފާނު “ކައިރޭ” އާއެކު މިޝްގާލް ބޮޑުބެރު ގްރޫޕްގެ ޝޯއެއް މާދަމާރޭ

ބެރު ރަސްގެފާނުގެ ނަމުން މަޝްހޫރުވެފައިވާ ކުޅަދާނަ ބެރުޖެހުންތެރިއާ ހަސަން އަރީފު (ކައިރޭ) އާއެކު ކުޅުދުއްފުށީ މިޝްގާލް ބޮޑުބެރު ގުރޫޕުން މާދަމާ ރޭ ޝޯއެއް ބާއްވަން ހަމަޖައްސައިފި އެވެ.

މިޝްގާލް ބޮޑުބެރު ގުރޫޕުގެ ފަރާތުން ވާހަކަ ދެއްކި އެގުރޫޕުގެ ބެރުޖެހުން ތެރިއެއް ކަމަށްވާ އަހުމަދު ސަމީރު ބުނީ މި ޝޯއަކީ މިއަހަރުގެ ޤައުމީ ދުވަސް ފާހަގަ ކުރުމުގެ ގޮތުން ބޭއްވޭ ޝޯއެއް ކަމަށެވެ. އަދި މިޝޯ ގައި ރާއްޖޭގެ މަޝްހޫރު ބޮޑުބެރު ގުރޫޕެއް ކަމަށްވާ ” ފުރަދަން” ގެ ބެރުޖެހުންތެރިޔާ ހަސަން އަރީފު ނުވަތަ “ކައިރޭ” ވެސް ބައިވެރިވާނެ ކަމަށެވެ.

ކައިރޭއަކީ ކުރިން މަޝްހޫރު ހަރުބީ ގުރޫޕްގެ ބެރުޖެހުންތެރިއެކެވެ. އަދި ޓިވީއެމްއިން ކުރިއަށްގެންދިޔަ ބޮޑުބެރު ޗެލެންޖްގެ އެންމެ މޮޅު ބެރުޖެހުންތެރިޔާގެ މަގާމްވެސް ކައިރޭވަނީ ހޯދާފައި އެވެ.

މާދަމާ ރޭ 9 ޖަހާއިރު ފެށޭ މި ޝޯ ރަސްމީ ބޯޅަ ދަނޑުގައި 11:30 ވަންދެން ކުރިއަށްދާނެއެވެ. ކުޅުދުއްފުށީގެ ޖަމިއްޔާއެއް ކަމަށްވާ ޒިގްޒެގް ފޯ އޯލް ޔޫތު ލިންކޭޖް ގެ އެހީތެރިކަން މިޝޯއަށް ވަރަށް ބޮޑަށް ލިބެމުންދާ ކަމަށް ސަމީރު ބުންޏެވެ. އަދި މިޝްގާލް ބޮޑުބެރު ގުރޫޕުގެ ހުރިހާ ޝޯތަކަށްވެސް ރައްޔިތުން ދޭ ތަރުޚީބު ޝުކުރުވެރިކަމާއެކު ބަލައިގަންނަކަންވެސް ސަމީރު ފާހަގަ ކުރިއެވެ

މިޝްގާލު ބޮޑުބެރު ގުރޫޕަކީ 1 އަހަރު ވީ ގުރޫޕެއް ނަމަވެސް ރައްޔިތުންގެ ތެރޭގައި މަގުބޫލުކަމެއް ހޯދާފައިވާ ގުރޫޕެކެވެ.