ޕީޕީއެމް އަސުރުމާ ގޮފިން ޑިފެންސް މިނިސްޓަރާއި ޕޮލިސް ކޮމިޝަނަރާ ބައްދަލުކޮށްފި

ޕީޕީއެމް އަސުރުމާ ގޮފިން މިނިސްޓަރ އޮފް ޑިފެންސް އެންޑް ނެޝަނަލް ސެކިއުރިޓީ މުޙައްމަދު ނާޒިމާއި ކޮމިޝަނަރ އޮފް ޕޮލިސް އަބްދު ﷲ ރިޔާޒާ ބައްދަލުކޮށްފި އެވެ.

މިނޫހަށް މައުލޫމާތު ދެމުން އަސުރުމާ ގޮފީގެ ރައީސް މުހައްމަދު އަލީ ވިދާޅުވީ،  މާލެއަށް އެގޮފިން ޒިޔާރަތް ކުރި ކުރުމުގައި ކޮމިޝަނަރ އޮފް ޕޮލިސް އަދި ޑިފެންސް މިނިސްޓަރާ ބައްދަލުކުރެވޭނެ ފުރުސަތު ލިބުމުން އެފުރުސަތުގެ ބޭނުންހިފާފައިވާ ކަމަށެވެ. އަދި މިބައްދަލު ކުރުމުގައި ކުޅުދުއްފުށީގެ ހާލަތާއި ރަށުގެ ރައްޔިތުންނާއި ޕޮލިހުން ގުޅިގެން ކަންތައްތައް ކުރެވޭނެ ގޮތުގެ މަޝް ވަރާ ކޮށްފައިވާނޭ ކަމަށް މުޙައްމަދު ވިދާޅުވި އެވެ.

އަސުރުމާ ގޮފީގެ ރައީސް ވިދާޅުވީ މި ބައްދަލުކުރުމަކީ “ވެދުން ދަންނަވާލުމު”ގެ ބައެއް ކަމަށެއެވެ. ނަމަވެސް ބައްދަލުވުމުގައި މަޝްވަރާކުރި ކަންތައްތަކުގެ އިތުރު ތަފްޞީލެއް ދެއްވާފައެއް ނުވެއެވެ.

ޕީޕީއެމް އަސުރުމާ ގޮފިން މާލެއަށް ކުރި މި ޒިޔާރަތަކީ ޕީޕީއެމްގެ ފުރަތަމަ ކޮންގްރެސްގައި ބައިވެރިވުމަށް ކުރި ދަތުރެކެވެ. މިދަތުރުގައި ޕީޕީއެމްގެ އިސްބޭފުޅުންނާ ބައްދަލު ކުރެވިފައިވާކަމަށް އަސުރުމާ ގޮފިން ބުނެއެވެ. ކޮންގްރެސްއަށްފަހު ޕީޕީއެމް އަސުރުމާ ގޮފީގެ ޓީމް މިއަދު ވަނީ އެނބުރި ކުޅުދުއްފުއްޓަށް އައިސްފައެވެ.