ހދ އަތޮޅުގައި ދަތުރުކުރާ ބައެއް ފެރީތަކުގެ ޚިދުމަތް މެދުކަނޑާލައި

ޓްރައިނަސް ސީއޭއީ ހޯލްޑިންގ އިން ހދ އަތޮޅުގައި ދަތުރުކުރާ ބައެއް ފެރީތަކުގެ ޚިދުމަތް މެދުކަނޑާލައިފި އެވެ.

މިނޫހަށް މައުލޫމާތު ދެއްވަމުން ޓްރައިންސަސް ހޯލްޑިންގ ގެ އޮޕަރޭޝަންތަކާބެހޭ ބައިގެ އޮފިޝަލެއް ކަމަށްވާ މުހައްމަދު ނާސިރު ވިދާޅުވީ މިހާރު ހދ އަތޮޅުގައި ދަތުރުކުރަމުންދާނީ އެއްމެ ފެރީއެއް ކަމަށެވެ. ފެރީގެ ދަތުރުތައް މެދުކަނޑާލަން ޖެހުނީ ފައިސާގެ ދަތިތަކެއް ހުރެގެން ކަމަށާއި، މިވީ 3 އަހަރުގެ ތެރޭގައި ފެރީގެ ޚިދުމަތް ދެމުން ގެންދިޔައީ ކުންފުނީގެ ފައިސާއިން ޚަރަދު ކޮށްގެން ފައިދާއެއް ނެތް ގޮތެއްގައި ކަމަށް ނާސިރު ވިދާޅުވި އެވެ.

މީގެ އިތުރުން ނާސިރު ވިދާޅުވީ ކުރޮސް ސަބްސިޑީޒްގެ ދަށުން 15 ހެކްޓަރުގެ ބިމެއް ސަރުކާރުން ދޭން ނިންމިކަމުގައި ވިޔަސް އެބިން އަދި ލިބުނުތާ އަދި މިވީ 2 މަސް ދުވަސް ކަމަށެވެ. މި ބިމަކީ އެފަރާތުން ފައިދާ ނަގާނެ މަސައްކަތެއް ކުރުމަށް ދިނުމަށް ހަމަޖެހިފައިވާ ބިމެކެވެ.

ނާސިރު އިތުރަށް ވިދާޅުވީ ސީދާ ދަތުރުތައް އަލުން ފެށޭނެ ދުވަހެއް ދަންނަވަން ދަތިކަމަށާއި ވީހާވެސް އަވަހަކަށް ޚިދުމަތް ދެވޭތޯ ބަލަމުންދާ ކަމަށެވެ.

ޓްރައިނަސް ސީއޭއީ ހޯލްޑިންގ ގެ ކުޅުދުއްފުށީގައި ހުންނަ އޮފީސް ބަންދުކޮށްފައި ހުންނަތާ މިހާރު މަހަކަށް ވުރެ ގިނަދުވަސް ވަނީ ވެފައެވެ. މިދިޔަ އަހަރުގެ ނޮވެމްބަރު މަހުގެ ކުރީކޮޅުވެސް ވަނީ މި ފެރީ ނިޒާމުގެ ބައެއް ދަތުރުތައް ހުއްޓާލާފައެވެ.

ދާދި ފަހުން އެކްޓިން ޓްރާންސްޕޯޓް މިނިސްޓަރ ނާޒިމް، ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމެޓީގައި ވިދާޅުވެފައިވަނީ، ގިނަ ސަރަހައްދުތަކުގެ ދަތުރުފަތުރު ނިޒާމު ހިންގަން ހަވާލުކޮށްފަ ހުރި ކުންފުނިތަކުން އެންމެ ރަނގަޅަށް މަސައްކަތްކުރަމުން ނުދާ ކަމަށެވެ. އަދި އެ ކުންފުނިތަކަށް ދޭންޖެހޭ ގިނަ ބިންތަކެއް ކުންފުނިތަކަށް ހަވާލުކޮށްފައިވާއިރު، އެތަންތަނުގައި އެއްވެސް މަސައްކަތެއް ފަށާފައިނުވާ ކަމަށް މިނިސްޓަރު ވިދާޅުވެފައި ވެއެވެ.