ޕީޕީއެމްގެ އަސުރުމާގޮފީގެ ޒުވާނުން އިސްނަގައިގެން އެޕާޓީގެ ޖަގަހައެއް ކުޅުދުއްފުށީގައި ހުޅުވަނީ

ކުޅުދުއްފުށީ ޕީޕީއެމް އަސުރުމާ ގޮފީގެ ޖަގަހައެއް އަންނަ ފެބްރުއަރީގައި ހުޅުވުމަށް މަސައްކަތް ކުރަމުންދާ ކަމަށް އެގޮފިން ހާމަކޮށްފިއެވެ.

މިނޫހަށް މައުލޫމާތު ދެއްވަމުން ޒުވާނުންގެ ގޮފީގެ މެމްބަރު މުޖްތަބާ އަހުމަދު ވިދާޅުވީ މި ޖަގަހައިގެ މަސައްކަތް މިމަހުގެ ތެރޭގައި ފަށާނެ ކަމަށާއި އަމާޒަކީ 1 ފެބްރުއަރީގައި ހުޅުވުން ކަމަށެވެ.

“ރިއަލް އެޗް ކުރިމަތީގަ އޮތް ހުސް ބިމުގަ އަޅުގަނޑުމެންގެ ޖަގަހަ ހުންނާނީ. މިބަލަނީ ފެބްރުއަރީ މަހު ހުޅުވޭތޯ.” މުޖްތަބާ ވިދާޅުވި އެވެ.

އަސުރުމާ ގޮފީގެ ޒުވާނުން އިސްނަގައިގެން އެފަރާތުގެ ޚަރަދުގައި ހަދާ މި ޖަގަހާގައި އެޕާޓީގެ ޕްރައިމަރީ އަށް ކުރިމަތި ލާފައިވާ ފަރާތް ތަކުގެ ތެރެއިން ވަކި ކެނޑިޑޭޓަކަށް ތާއީދު ނުކުރާނެ ކަަމަށްވެސް މުޖްތަބާ ވިދާޅުވި އެވެ. އެހެން ނަމަވެސް ޕާޓީގެ ކަންކަން މި ޖަގަހާގައި ކުރިއަށް ގެންދާނެކަމަށް މުޖާތަބާ ވިދާޅުވި އެވެ.

މުޖްތަބާ ވިދާޅުވިގޮތުގައި ޖަގަހައިގެ ގުދަން ހެދުމަށް ބޭނުންވާ ބައެއް ފައިސާ އެ ޕާޓީގެ މާލޭގައި ތިއްބެވި ބައެއް ފަރާތްތަކުން ފައިސާ އެހީވެފައި ވެއެވެ.