ޤައުމީ އިއްތިހާދު ޕާޓީގެ ޖަލްސާއެއް ކުޅުދުއްފުށީގައި ފުރަތަމަ ފަހަރަށް ބާއްވައިފި

ކުޅުދުއްފުށީގައި ފުރަތަމަ ފަހަރަށް ޤައުމީ އިއްތިހާދު ޕާޓީގެ ޖަލްސާއެއް ބާއްވައިފި އެވެ.

އެޕާޓީއަށް މެމްބަރުން އިތުރު ކުރުމުގެ ގޮތުން ރޭ އަފީފުއްދީން ސްކޫލު ހޯލުގައި އޮތް މި ބައްދަލުވުމުގައި ޕާޓީގެ އިސް ސަފުގައި އުޅުއްވާ ފަރާތްތަކުން ވަނީ ވާހަކަ ދައްކަވާފައެވެ. މިގޮތުން ޕާޓީގެ ނާއިބު ރައީސް މުހައްމަދު ޒަކީ (ނަޒާކީ ޒަކީ) ދެއްކެވި ވާހަކައިގާ ރާއްޖޭގައި ތަފާތު ވިސްނުމުގެ ގިނަ ބަޔަކު ގޮވައިގެން ސުލްހަވެރިކަމާއެކު އުޅެވޭނެ ހަމައެކަނި ޕާޓީ އަކީ ޤައުމީ އިއްތިހާދު ކަން ފާހަގަ ކުރެއްވިއެވެ.

ސަރުކާރުގެ ހިއުމަން ރައިޓްސް އެމްބެސެޑަރު ސަންދާނު އަހައްމައިދީގެ ވާހަކައިގާ ޤައުމީ ލޯތްބަކީ ރަނާއި ރިއްސަށްވުރެވެސް އަގުބޮޑު އެއްޗެއް ކަމަށާއި ރައީސް ވަހީދާއި އެއްކޮށް ކުރިއަށް ދިޔުމަށް އެބޭފުޅާ ތައްޔާރަށް ހުންނެވީ ޤައުމު ދެކެ ވާ ލޯތްބެއްގެ ބޮޑުކަމުންކަމަށް ވިދާޅުވިއެވެ. އަދި ބޮޑެތި ޕާޓީ ތަކުގެ މީހުން މަސައްކަތް ކުރަނީ ކުދި ޕާޓީ ތައް ކާލަން ކަމަށާއި މިހާރު މި އޮތް ގޮތުން ސިޔާސީ ޕާޓީ ތައް ހެދޭނީ ވަރަށް ބޮޑެތި މުއްސަނދިންނަށް ކަމަށް ވިދާޅުވިއެވެ. ސަންދާނު އަހަންމައިދީ އިތުރަށް ވިދާޅުވީ ސިޔާސީ ޕާޓީ ތަކުގެ ބިލް ތަސްދީގުނުކޮށް އަނބުރާ މަޖިލީހަށް ރައީސް ވަހީދު ފޮނުވާލި ފޮނުވާލުމަކީ އެބޭފުޅާ ނުހަނު ޝުކުރުވެރިވާ ކަމެއް ކަމަށެވެ.

މި ބައްދަލުވުމުގައި ފިނޭންސް މިނިސްޓްރީގެ ސްޓޭޓް މިނިސްޓަރު އައްބާސް އާދިލް ރިޒާ ގެ ވާހަކައިގާ  ރައީސް ވަހީދު ވެރިކަމާއި ހަވާލުވެލެއްވި އިރު އޭރުގެ ރައީސް ނަޝީދު ވަނީ  ރާއްޖޭގެ ގިނަ ތަންތަން ވިއްކާލާފައި ކަމަށް ވިދާޅުވިއެވެ. މިގޮތުން ހަނިމާދޫ އެއާޕޯޓާއި އައްޑޫ އެއާޕޯޓާއި އެސްޓީއޯ ފަަދަ މުހިއްމު ތަންތަން،  މާލޭ އިންޓަނޭޝަނަލް އެއާޕޯޓް ޖީއެމްއާރަށް ވިއްކާލި ގޮތަށް ވިއްކާލަން ނިންމާފައިވާ ކަން ފާހަގަ ކުރެއްވިއެވެ. އާދިލް ރިޒާ ވިދާޅުވީ 7 ފެބްރުއަރީގައި ރައީސް ވަހީދު ވެރިކަމާއި ހަވާލުވެލެއްވިއިރު ދައުލަތުގެ ބަޖެޓުން ދޮޅު ލައްކަ އަށް ވުރެ ގިނަ މީހުން އާސަންދަ ނިޒާމު މެދުވެރިކޮށް އައިނު ހައްދާފައިވާ ކަމަށާއި އެހެން ނަމަވެސް އެފައިސާ ނުދައްކާ ފިނޭންސް މިނިސްޓްރީގައި ހުރުމުގެ ސަބަބުން ހުރިހާ ފައިސާ އެއްވެސް ދައްކަން ޖެހުނީ ވަހީދުގެ ވެރިކަމުގައި ކަމަށެވެ.

މި ބައްދަލުވުމުގައި ބައިވެރި ވެފައިވަނީ ގާތްގަނޑަކަށް 60 ކަށް މީހުންނެވެ. މިއަދު ހެނދުނު ޤައުމީ އިއްތިހާދުގެ ޖަގަހައެއްވެސް ވަނީ ކުޅުދުއްފުށީގައި ހުޅުވާފައެވެ.

[yass cats=3]