އެމްއެންޑީއެފް ނޮދަން އޭރިޔާއިން އެމަޖެންސީ މެނޭޖްމަންޓް ވޯކްޝޮޕެއް ބާއްވައިފި

އެމްއެންޑީއެފް ނޮދަން އޭރިޔާއިން ތިޒާމްކޮށްގެން އެމަޖެންސީ މެނޭޖްމަންޓް ވޯކްޝޮޕެއް ބާއްވައިފި އެވެ.

“ރައްކާވެ ތިބިއްޔާ ދަތުރު” މިނަމުގައި ޖެނުއަރީ 27 އިން 30 އަށް ބޭއްވުނު މި ވޯކްޝޮޕް ގެ މައިގަނޑު މަޤްޞަދަކީ މިސަރަޙައްދަށް ކުރިމަތިވެދާނެ އިމަޖެންސީ ހާލަތްތައް ދެނެގަތުމާއި، އެފަދަ އިމަޖެންސީތަކުން ރައްކާތެރިވުމަށް އެޅިދާނެ ފިޔަވަޅު ތަކާއި އަދި ކަމާބެހޭ ހުރިހާ ފަރާތްތަކެއް ގުޅިގެން މަސައްކަތް ކުރެވޭނެ ގޮތްތައް ދެނެގަނެ އިމަޖެންސީއެއްގައި ކަންތައްކުރާނެ ހަރުދަނާ ނިޒާމެއް ޤާއިމު ކުރުން ކަމުގައި އެމްއެންޑީއެފް ނޮދަން އޭރިއާއިން މަޢުލޫމާތު ދެއްވައެވެ.

މިވޯކްޝޮޕް ނިންމުމުގެ ގޮތުން އިއްޔެ ޤައުމީ އިދާރާގެ ހޯލްގައި ބޭއްވި ރަސްމިއްޔާތު ޝަރަފުވެރި ކޮށްދެއްވައި، ބައިވެރިންނަށް ހަނދާނީ ލިޔުން ޙަވާލު ކޮށްދެއްވީ އެމްއެންޑީއެފް ނޮދަން އޭރިއާ ގެ ކޮމާންޑަރ ކާނަލް އަބްދުﷲ ޒުހުރީއެވެ.

މިރަސްމިއްޔާތުގައި ވާހަކަފުޅު ދައްކަވަމުން ނޮދަން އޭރިއާގެ އެކްޓިންގ ކޮމާންޑަރ ކާނަލް ޢަބްދުﷲ ޒުހުރީ ވިދާޅުވީ މިފަދަ ވޯކްޝޮޕެއް ހިންގުމުގެ ބޭނުމަކީ ދިމާވެދާނެ ކުއްލި ނުރައްކާތެރި ޙާދިސާއަކުން ރައްކާތެރިވުމަށް އެޅިދާނެ ފިޔަވަޅުތައް ދަސްކޮށްދިނުމާއި މިފަދަ ޙާދިސާތަކުން ސަލާމަތްވުމަށް އަމިއްލައަށް ކުރެވޭނެ ކަންކަން އޮޅުންފިލުވައިދީ އެކަމަށް އަހުލުވެރި ކުރުވުން ކަމަށެވެ. އަދި މިވޯކްޝޮޕް ނިމުމުން އަސްލު މަސައްކަތް ފެށޭނެ ކަމަށާއި ސްކޫލްތަކާއި މުއައްސަސާތަކުގެ ފެންވަރުގައާއި ފަރުދީގޮތުން އެމެޖެންސީ ޙާލަތްތަކަށް ހޭލުންތެރި ކުރުވުމަށް މަސައްކަތް ކޮށްދިނުމަށް އެދިލެއްވިއެވެ.

ކާނަލް ޒުހުރީ ވިދާޅުވީ ދިމާވާ ނުރައްކާތެރި ހާދިސާތަކުގައި ޙަރަކާތްތެރި ވާނެ ގޮތުގެ ޕްލޭންތައް ހެދުމަށާއި އޭގެ ރިހާސަލްތައް ބޭއްވުމުގެ އިތުރުން ކުދިކުދި އެކްސައިޒްތައް ހިންގަންޖެހޭނެ ކަމަށެވެ. އަދި މިފަދަ ކަންތައްތަކަށް އެމް.އެން.ޑީ.އެފްގެ ފަރާތުން ފަންނީ ގޮތުންނާއި އެހެނިހެން ގޮތްގޮތުން ވިޔަސް ވެދެވެން އޮތް އެހީތެރިކަމެއް ފޯރުކޮށްދެމުން ދާނެކަމުގައިވެސް ވިދާޅުވި އެވެ.

މިވޯކްޝޮޕްގައި މަޢުލޫމާތުދެއްވީ އެމްއެންޑީއެފްގެ ކެޕްޓަން މުޙަންމަދު ނަދީމާއި، އަޙްމަދު ރަމީޒް އަދި ފަސްޓް ލެފްޓިނެންޓް އިބްރާޙީމް ތައުފީގެވެ. މިރަސްމިއްޔާތުގައި ޝަރަފްވެރިމެހެމާނުގެ އިތުރުން އަތޮޅު ކައުންސިލްގެ ރައީސް ހުސައިން ރަޝީދުވެސް ވަނީ ވާހަކަ ދައްކަވާފައެވެ.

މިވޯކްޝޮޕްގައި އެމްއެންޑީއެފް އާއި ކައުންސިލްތަކާއި، ސްކޫލްތަކުގެ މުވައްޒަފުން ހިމެނޭގޮތަށް ޖުމްލަ 43 ބޭފުޅުން ވަނީ ބައިވެރިވެފައެވެ.