ޤައުމީ ޔުނިވަރސިޓީގެ ކުޅުދުއްފުށީ ކެމްޕަސް ތަރައްޤީ ކުރާނެ ގޮތާއި ބެހޭ ގޮތުން މަޝްވަރާކޮށްފި

ޤައުމީ ޔުނިވަރސިޓީގެ ކުޅުދުއްފުށީ ކެމްޕަސް ތަރައްޤީ ކުރާނެ ގޮތާއި ބެހޭ ގޮތުން ހދ އަތޮޅު ކައުންސިލާއި ޔުނިވަރސިޓީގެ އެންމެ އިސްވެރިން ހިމެނޭ ވަފްދަކުން މަޝްވަރާ ބައްދަލުވުމެއް ބާއްވައިފި އެވެ.

މިދިޔަ އަންގާރަ ދުވަހު ބޭއްވި މިބައްދަލުވުމުގައި ކެމްޕަސްގެ ކުރިމަގާއިމެދުގަޔާއި އަދި އެކެމްޕަސް ތަރައްޤީ ކުރުމަށް ކުރަން ރޭވިފައިވާ ކަންކަމާ ބެހޭގޮތުން މަޝްވަރާކޮށްފައިވާ ކަމަށް ހދ އަތޮޅު ކައުންސިލުން މައުލޫމާތު ދެއެވެ. މިގޮތުން ކެމްޕަހުގެ އިމާރާތަށް އިތުރު ކުރުމަށް ހަމަޖެހިފައިވާ ކުލާސްރޫމުތަކާއި، ސްޓާފްރޫމުތަކުގެ މައުލޫމާތު ހުށަހަޅާ މަޝްވަރާކޮށްފައި ވެއެވެ. އަދި މީގެ އިތުރުން އެ އިމާރާތުގެ ހުޅަނގުން ބޭނުންވާ ބިމުގެ މައުލޫމާތުވެސް އެ ބައްދަލުވުމުގައި ވަނީ ހިއްސާކޮށްފައެވެ.

އަތޮޅު ކައުންސިލުގެ އިދާރާގައި ބޭއްވުނު މިބައްދަލުވުމުގައި ޤައުމީ ޔުނިވަސިޓީގެ ޗާންސެލަރ ޑޮކްޓަރ ޒާހިރު ޙުސައިނާއި، ވައިސް ޗާންސެލަރ ޑޮކްޓަރ ޙަސަން ޙަމީދާއި، ޑެޕިއުޓީ ވައިސް ޗާންސެލަރ ޙުސައިން ޙަލީމުގެ އިތުރުން ކުޅުދުއްފުށީ  ކެމްޕަސްގެ މެނޭޖަރ އިބްރާހީމް ފައިސަލް ބައިވެރިވެވަޑައިގަތެވެ.

އަތޮޅު ކައުންސިލުން މައުލޫމާތު ދޭ ގޮތުގައި މިބައްދަލުވުމުގައި އެ ކައުންސިލުގެ ފަރާތުން ބައިވެރިވެޑައިގަތީ ރައީސް ހުސައިން ރަޝީދާއި، އަތޮޅު ކައުންސިލުގެ މެމްބަރު އާދަމް ވަހީދާއި އަލީ މުހައްމަދާއި އަލީ ހުސައިން އެވެ. އަދި ކުޅުދުއްފުށީ ކައުންސިލްގެ ރައީސް އިބްރާހިމް ރަމީޒުވެސް މިމަޝްވަރާތަކުގައި ވަނީ ބައިވެރިވެވަޑައިގެންފައި އެވެ.