ރައީސުލްޖުމްހޫރިއްޔާ ޑރ މުހައްމަދު ވަހީދު ހަސަން މަނިކު މާދަމާ ކުޅުދުއްފުއްޓަށް ވަޑައިގަންނަވާނެ

ރައީސުލްޖުމްހޫރިއްޔާ ޑރ މުހައްމަދު ވަހީދު ހަސަން މަނިކު މާދަމާ ކުޅުދުއްފުއްޓަށް ވަޑައިގަންނަވާނެއެވެ.

ރައީސްގެ މި ދަތުރުފުޅުގައި ކުޅުދުއްފުށީގައި އަލަށް ހަދާ މަގުތަކުގެ އެއްބަސްވުމުގައި ސޮއި ކުރެއްވުމުގެ އިތުރުން ކުޅުދުއްފުށީ އަމީނީ މަގުގައި ގައު އެތުރުމުގެ މަސައްކަތް ފައްޓަވާ ދެއްވާނެއެވެ. މި ޕްރޮޖެކްޓަކީ 2010 ވަނަ އަހަރު ކުރީގެ ރައީސް މުހައްމަދު ނަޝީދު އިފްތިތާހު ކޮށްދެއްވި ޕްރޮޖެކްޓެކެވެ.

ރައީސްގެ މި ދަތުރުފުޅުގައި އެމަނިކުފާނުގެ އަނބިކަނބަލުން އިލްހާމް ހުސައިންއާއި، ދިވެހިރާއްޖެއިން ސްރީލަންކާއަށް ކަނޑައަޅުއްވާފަ ހުންނަވާ ސަފީރު ހުސައިން ޝިހާބާއި، ދިވެހިރާއްޖެއިން މެލޭޝިއާ އަށް ކަނޑައަޅުއްވާފައިވާ ސަފީރު މުހައްމަދު ޒަކީ އާއި، ރައީސުލް ޖުމްހޫރިއްޔާގެ އޮފީހުގެ ޕޮލިޓިކަލް އެޑްވައިޒަރ އަހުމަދު ތައުފީގާއި، އެސްޓީއޯގެ ޗެއަރމަން އަބްދުﷲ ފާއިޒު ބައިވެރިވެވަޑައިގަންނަވާނެކަމަށް ރައީސް އޮފީހުން މައުލޫމާތު ދެއެވެ.

ރައީސުލް ޖުމްހޫރިއްޔާގެ މިދަތުރުފުޅުގައި ކުރިމަތިވެދާނެ ހަމަނުޖެހުމަކަށްޓަކައި ކުޅުދުއްފުށީ ޕޮލިސް ސްޓޭޝަނުންނާއި އެމްއެންޑީއެފް އިން ވަނީ ތައްޔާރުވެފައެވެ. މިގޮތުން ރައީސް ވަހީދު އެންމެ ފަހުން ކުޅުދުއްފުއްޓަށް ކުރެއްވި ޒިޔާރަތުގައި ދިމާވި ފަދަ ހަމަނުޖެހުންތަކެއް ކުރިމަތި ވިޔަ ނުދިނުމަށް މަސައްކަތް ކުރައްވަމުންދާކަމަށާއި އިތުރު ފުލުހުން ގެންނަން ޖެހިއްޖެ ހިނދެއްގައި އެކަންވެސް މިހާރު ހަމަޖެހިފާވާކަމަށް ފުލުހުން ހާމަކުރައްވައެވެ.

ރައީސް ކުޅުދުއްފުއްޓަށް ވަޑައިގަންނަވަން ހަމަޖެހިފައިވަނީ މާދަމާ ހެނދުނު އެވެ. އަދި ހަވީރު 16:15 ގައި ރައްޔިތުންނާއި ބައްދަލުކުރެއްވުމަށް ފަހު ކުޅުދުއްފުށިން ފުރާ ވަޑައިގަންނަވާނީ މާދަމާގެ 18:00 ގައި ކަމަށް ރައީސް އޮފީހުން މައުލޫމާތު ދެއްވައެވެ.