މަގުތައް ހެދުމުގެ 54 މިލިއަން ރުފިޔާގެ މަޝްރޫއެއް ރައީސުލްޖުމުހޫރިއްޔާ ކުޅުދުއްފުށީގައި ފައްޓަވައި ދެއްވައިފި

ކުޅުދުއްފުށީގެ މަގުތައް ރަނގަޅު ފެންވަރަކަށް ހެދުމުގެ މަޝްރޫއެއް ރައީސުލްޖުމުހޫރިއްޔާ ޑރ. މުހައްމަދު ވަހީދު ހަސަން މަނިކު މިއަދު ފައްޓަވައިދެއްވައިފި އެވެ.

މިއަދު ހެނދުނު ކުޅުދުއްފުށީގައި ބޭއްވި ރަސްމިއްޔާތެއްގައި ރައީސް ޑރ. ވަހީދު ފައްޓަވައިދެއްވި މި މަޝްރޫއުގައި، ކުޅުދުއްފުށީގެ 5.8 ކިލޯމީޓަރުގެ މަގުގައި ތާރު އެޅުމަށް ހަމަޖެހިފައި ވެއެވެ.

އަމީނީމަގުގެ ދެކުނު ކޮޅުގައި، ކުޅުދުއްފުށީގެ މަގުހަދާ ޔުނިޓު ހުންނަ ސަރައްހައްދުގައި މިއަދު ބޭއްވި ރަސްމިއްޔާތުގައި ޑރ.  ވަހީދު ވިދާޅުވީ، ކުޅުދުއްފުށީގެ މަގުތައް ހެދުމުގެ މަސައްކަތް ހުއްޓާލަންޖެހޭ އެއްވެސް ސަބަބެއްނެތް ކަމަށެވެ. އެގޮތުން އެމަޝްރޫއަށް ބަޖެޓު ހަމަޖެހިފައިވާ ކަމަށް ވިދާޅުވި އެވެ. އަދި މަޝްރޫއު ހުއްޓާނުލާ ކުރިއަށް ގެންގޮސް ނިންމާލުމަށް މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަނަށް ގޮވާލެއްވި އެވެ.

މި ރަސްމިއްޔާތުގައި ހައުސިން މިނިސްޓަރ ޑރ. މުހައްމަދު މުއިއްޒު ވިދާޅުވީ، މިއަހަރުގެ ނިމުމުގެ ކުރިން ކުޅުދުއްފުށީގެ ބޮޑެތި މަގުތަކުގައި ތާރުއަޅާ ނިންމާލެވޭނެ ކަމަށެވެ. މުއިއްޒު ވިދާޅުވީ ކުރީގެ ސަރުކާރު ތަކުން އުތުރުގެ ތަރައްޤީއަށް އަހައްމިއްޔަތު ކަމެއް ދީފައިނުވާ ކަމަށެވެ. އެހެންނަމަވެސް މިހާރުގެ ސަރުކާރުން އުތުރުގެ ތަރައްޤީއަށް މުހިއްމު ކަންކަންރޭވިފައި ހުރިކަމަށެވެ. މިއަދު ކުޅުދުއްފުށީގައި ފެށިގެންދިޔަ މަޝްރޫއަކީވެސް އެކަމުގެ ހެއްކެއް ކަމަށް މުއިއްޒު ވިދާޅުވިއެވެ.

ރައީސް ޑރ.  ވަހީދު ކުޅުދުއްފުއްޓަށް ވަޑައިގަތީ މިއަދު ހެނދުނުއެވެ. ރައީސް ވަޑައިގެންނެވިއިރުގަޔާއި މަގުހެދުމުގެ މަޝްރޫއު ފެއްޓެވުމަށް ރަސްމިއްޔާތު ބޭއްވި ވަގުތުގައިވެސް ވަރަށް ވަރުގަދަ ސެކިޔުރިޓީއެއް އޮތްކަން ފާހަގަކޮށްލެވެއެވެ. އެގޮތުން ރަސްމިއްޔާތު އޮތް ސަރަހައްދުގެ ގިނަ މަގުތައް އޮތީ ބަންދުކޮށްފައެވެ.

މިރަސްމިއްޔާތުގައި ހދ އަތޮޅު ކައުންސިލުގެ ރައީސާއި މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަނުގެ މެނޭޖިންގ  ޑިރެކްޓަރ ވާހަކަދައްކަވާފައި ވެއެވެ.

ރައީސް ކުޅުދުއްޓަށް ވަޑައިގެންނެވިއިރު ރައީސަށް މަރުހަބާ ދެންނެވުމަށް ގިނަބަޔަކު އެއްވެ ތިބި އެވެ. އަދި މިއަދު ހެނދުނު ބޭއްވި ރަސްމިއްޔާތުގައިވެސް ގިނަ އަދަދެއްގެ އާއްމު ރައްޔިތުން ވަނީ ބައިވެރިވެފައި އެވެ. ރައީސް ވަޑައިގެންނެވުމާ ދިމާކޮށް އެމްޑީޕީއިން މިފަހަރު އެއްވެސް ހަމަނުޖެހުމެއް ހިންގާފައެއް ނުވެއެވެ. މިދިޔަ އަހަރު ޑރ. ވަހީދު ކުޅުދުއްފުއްޓަށް ވަޑައިގެންނެވި އިރު ބޮޑެތި ހަމަނުޖެހުންތަކެއް ހިނގާފައިވިޔަސް މިއަދު އެއްވެސް ބަޔަކު ހަމަނުޖެހުން އުފައްދަން މަސައްކަތްނުކުރާކަން ފާހަގަކޮށްލެވެއެވެ.

[yass cats=4]