ކުޅުދުއްފުށީގައި އަޅާ މެޓާރނިޓީ ވެއިޓިންގ ހޯމްގެ އަމަލީ މަސައްކަތް ރައީސް ޑރ. ވަހީދު ފައްޓަވައިދެއްވައިފި

ކުޅުދުއްފުށީގައި އެޅުމަށް ހަމަޖެހިފައިވާ މެޓާނިޓީ ވެއިޓިން ހޯމްގެ އަމަލީ މަސައްކަތް، ރައީސުލްޖުމްހޫރިއްޔާ ޑރ މުހައްމަދު ވަހީދު ހަސަން މަނިކު މިއަދު ފައްޓަވައި ދެއްވައިފި އެވެ.

ކުޅުދުއްފުއްޓަށް ރައީސުލްޖުމްހޫރިއްޔާ މިހާރު ކުރައްވަމުން ގެންދަވާ ދަތުރުފުޅުގައި، މެޓާނިޓީ ވެއިޓިން ހޯމްގެ އަމަލީ މަސައްކަތް ފެއްޓެވުމުގެ ރަސްމިއްޔާތު އޮތީ މެންދުރުފަހު އެވެ.

މެޓާރނިޓީ ވެއިޓިން ހޯމަކީ މާބަނޑުވުމާއި އަދި ވިހެއުމާގުޅިގެން އެފަދަ ފަރާތްތަށް ކުޅުދުއްފުށީގައި މަޑުކޮށްލުމަށް ތައްޔާރުކުރެވޭ އިމާރާތެކެވެ. މި ވެއިޓިން ހޯމަކީ ކުރީގެ ރައީސް މުހައްމަދު ނަޝީދުގެ ވެރިކަމުގައި އަޅަން ނިންމާފައިވާ ޕްރޮޖެކްޓެކެވެ. އަދި އޭރުގެ ހެލްތު މިނިސްޓަރ ޑރ އައިމިނަތު ޖަމީލް ވަނީ 2011 ވަނަ އަހަރުގެ ޖޫންމަހު އެތަނުގެ ބިންގާވެސް އަޅުއްވައިދެއްވާފައެވެ. އެހެންނަމަވެސް ގިނަ ދުވަސްތަކެއް ވެގެންދިޔައިރުވެސް އެތަނުގެ މަސައްކަތް ފަށާފައެއް ނުވެއެވެ.

އިޓަލީގެ ކަރިޓަސް އިޓާލިއާނާ އިން ދޭ ހިލޭ އެހީގެ ދަށުން އަޅާ މި އިމާރާތުގެ މަސައްކަތްކުރާނީ ރާއްޖެ އާއި ލަންކާގެ ކުންފުންޏަކާ ގުޅިގެން އުފައްދާފައިވާ ޖޮއިންޓް ވެންޗާއަކުން ނެވެ.  9.1 މިލިއަން ރުފިޔާ ހޭދަކޮށްގެން ހަދާ ދެ ބުރީގެ އިމާރާތުގައި 13 ކޮޓަރި އާއި ކެފޭއަކާއި ފެމެލީ ވެއިޓިން އޭރިއާއެއް ހިމެނެއެވެ.

މެޓާރނިޓީ ވެއިޓިން ހޯމްގެ އަމަލީ މަސައްކަތް ފައްޓަވައި ދެއްވުމަށްފަހުު، ރައީސުލްޖުމްހޫރިއްޔާ މިއަދު ކުޅުދުއްފުށީ ރީޖަނަލް ހޮސްޕިޓަލަށް ޒިޔާރަތް ކުރައްވާ އެތަނުގައި ތިބި ބަލިމީހުންގެ ހާލު ބައްލަވާލައްވާ ބަލިމީހުންގެ ޝަކުވާ އަޑުއައްސަވާފައިވެއެވެ. އަދި އެއަށްފަހު ކުޅުދުއްފުށީގައި ހުންނަ އެސްޓީއޯ ބޭސްފިހާރައަށް ޒިޔާރަތްކުރައްވާ އެތަނުގެ މަސައްކަތްތައް ހިނގާ ނުހިނގާ ގޮތްވެސް ވަނީ ބައްލަވާލައްވާފައެވެ.

ރައީސްގެ މިދަތުރުފުޅުގައި މިއަދު ހެނދުނު ކުޅުދުއްފުށީގެ މަގު ހެދުމުގެ މަޝްރޫއެއްވެސް ވަނީ ފައްޓަވައި ދެއްވާފައި އެވެ.

[yass cats=5]