ރައްޔިތުން އެކަތިގަނޑަކަށްވެ ތިބެ ރަށުގެ ތަރައްޤީއަށް މަސައްކަތްކުރުމަށް ރައީސް ޑރ. ވަހީދު ގޮވާލައްވައިފި

ރައްޔިތުން އެކަތިގަނޑަކަށްވެ އެއްބައިވަންތަ ބައެއްގެ ގޮތުގައި ކުޅުދުއްފުށީގެ ތަރައްޤީއަށް މަސައްކަތް ކުރުމަށް ރައީސުލްޖުމުހޫރިއްޔާ ޑރ. މުހައްމަދު ވަހީދު ހަސަން މަނިކު ގޮވާލައްވައިފި އެވެ.

ރައީސް ޑރ. ވަހީދު މިކަމަށް ގޮވާލެއްވީ މިއަދު ކުޅުދުއްފުށީ ރައްޔިތުންނާ ބައްދަލުކުރެއްވުމަށް ކުޅުދުއްފުށީ އަފީފުއްދީން ސްކޫލުގައި ބޭއްވި ޖަލްސާއެއްގައި ވާހަކަފުޅު ދައްކަވަމުންނެވެ.

ރައީސްގެ ވާހަކަފުޅުގައި ހދ އަތޮޅުގައި ރިސޯޓެއް ނެތްކަން ފާހަގަ ކުރައްވާ، އެކަމަށް އަވަސް ހައްލެއް ކުރުމުއްދަތެއްގައި އަންނާނެކަމަށް ވިދާޅުވި އެވެ. އަދި ކުޅުދުއްފުށީގެ ސަރަހައްދީ ބަނދަރަށް އަންނަ ބޮޑެތި ބޯޓުފަހަރަށް ތެޔޮ އަޅައިދިނުންފަދަ ތަފާތު ގިނަ މަސައްކަތްތަކެއް ކުޅުދުއްފުށީގައި ފައްޓަވާ ދެއްވާނެކަމަށް ވިދާޅުވި އެވެ. ޓުއަރިސްޓު ރިސޯޓު ހަދަން ދޫކޮށްފައި ހުރި ރަށްތައް ނުނިމި ދިގުލައިގެންދާނަމަ ސަރުކާރުން އެރަށްތައް ނެގުމަށްފަހު އެކަން ކުރެވޭނެ ބަޔަކާ ހަވާލުކުރަންޖެހިދާނެ ކަމަށްވެސް ޑރ. ވަހީދު ވިދާޅުވި އެވެ.

“މިއަތޮޅުގަ (ހދ އަތޮޅުގައި) އަވަސް މުއްދަތެއްގަ ރިސޯޓެއް ހުޅުވިގެންދާނެ. އަދި ރަށުގެ ބަނދަރުން ބޮޑެތި ބޯޓު ތަކަށް ތެޔޮ އެޅުމާއި އެހެންވެސް ތަފާތު ގިނަ ކަންތައްތަކެއް އިރާދަކުރެއްވިއްޔާ ފެށިގެން ދާނެ.” ރައީސް ވަހީދު ވިދާޅުވި އެވެ .

މިއަދުގެ ބައްދަލުވުމުގައި ހދ އަތޮޅު ކައުންސިލުގެ ކުރީގެ ރައީސް އަދި އެމްޑީޕީ ކުޅުދުއްފުށީ ދެކުނު ދާއިރާގެ ރައީސްކަން ކުރިން ކުރެއްވި އާދަމް ވަހީދު ވިދާޅުވީ، ޓުއަރިސްޓު ރިސޯޓެއް ނެތް ހަމައެކަނި އަތޮޅަކީ ހދ އަތޮޅުކަމަށެވެ. އަދި އެކަމާމެދު އަވަސް ފިޔަވަޅެއް އަޅުއްވައި ދެއްވުމަށް ރައީސްގެ އަރިހުން އެދިލެއްވި އެވެ. އަދި ހަމައެހެންމެ މާލެއަށްވުރެ 3 ގުނަ ބޮޑުކޮށް ކުޅުދުއްފުށީގެ ފެނުން ފައިސާ ނަގަމުންދާ ކަމަށާއި، ނަރުދަމާއަށް ފައިސާ ނަގާ ހަމައެކަނި ރަށަކީ ކުޅުދުއްފުށިކަން ފާހަގަ ކުރެއްވިއެވެ. އަދި މިކަންކަމަކީ ޤާނޫނު އަސާސީން ދިވެހި ރައްޔިތުންނަށް ލިބިދީފައިވާ ހަމަހަމަކަމާއި ޚިލާފަށް ކުރެވޭ ކަމަކަށްވާތީ މިކަމަށްވެސް އަވަސް ފިޔަވަޅެއް އެޅުމަށް ރައީސްގެ އަރިހުން އެދިލެއްވި އެވެ.

މި ބައްދަލުވުމުގައި އާދަމް ވަހީދު ވަނީ ރައީސް ޑރ. ވަހީދަށް ވަރަށް ބޮޑަށް ތައުރީފުކުރައްވާ ވާހަކަ ދައްކަވާފައި އެވެ.

މިބައްދަލުކުރުމުގައި ރައީސުލްޖުމްހޫރިއްޔާގެ އޮފީހުގެ ޕޮލިޓިކަލް އެޑްވައިޒަރ އަހުމަދު ތައުފީގާއި، އެސްޓީއޯގެ ޗެއަރމަން އަބްދުﷲ ފާއިޒާއި، ހައުސިން މިނިސްޓަރ ޑރ. މުހައްމަދު މުއިއްޒުގެ އިތުރުން ހދ އަތޮޅު ކައުންސިލްގް ރައީސް ހުސައިން ރަޝީދާއި އަތޮޅު ކައުންސިލްގެ ކުޅުދުއްފުށީ އުތުރު ދާއިރާގެ މެމްބަރު ނަސްރުﷲ އިސްމާއިލްވެސް ބައިވެރިވެވަޑައިގެންނެވި އެވެ. އޭގެ އިތުރުން ކުޅުދުއްފުށީގެ އާއްމު ރައްޔިތުންގެ ގިނަ ބަޔަކުވެސް ޖަލްސާގައި ބައިވެރިވެފައި ވެއެވެ.

ރައީސް ކުޅުދުއްފުއްޓަށް ކުރެއްވި ދަތުރުފުޅު ނިންމަވާލެއްވުމަށްފަހު މިއަދު އިރުއޮސި 6:45 ހާއިރު ވަނީ ހދ. ހަނިމާދޫ އަށް ފުރާ ވަޑައިގަންނަވާފައެވެ.

[yass cats=6]